ఒకప్పుడు ఒక సాధువు తన ఆశ్రమంలో కూర్చుని ఉన్నాడు. అప్పుడు ఆయన శిష్యులలో ఒకరు సాధువు దగ్గరికి వస్తాడు. అతను స్వతహాగా కొంచెం కోపిష్టి. అతను సాధువు దగ్గరకు వచ్చి ఇలా అన్నాడు.. ‘గురూజీ.. మీరు ఎవరిపైనా కోపం తెచ్చుకోకుండా, మంచిగా ఎలా ఉంటున్నారు.. మీ మంచి ప్రవర్తన రహస్యం ఏమిటో దయచేసి మాకు చెప్పండి’ అని అడిగాడు.

నువ్వు చనిపోతావని తెలిస్తే..

అప్పుడు సాధువు ఇలా అన్నాడు.. ‘నా రహస్యం నాకు తెలియదు. కానీ నీ రహస్యం నాకు కచ్చితంగా తెలుసు’ అని అన్నాడు. “నా రహస్యం ఏమిటి స్వామి” ఆశ్చర్యంగా అడిగాడు శిష్యుడు. “వచ్చే వారంలోపు నువ్వు చనిపోతావని తెలిస్తే బాధపడతావు” అన్నాడు సాధువు. వేరే ఎవరైనా ఇలా చెప్పి ఉంటే.. శిష్యుడు దానిని హాస్యాస్పదంగా తోసిపుచ్చగలిగేవాడు. కానీ సాధువు నోటి నుండి వచ్చిన దానిని ఎవరైనా ఎలా ఖండిస్తారు.

క్షమించమని అడిగేవాడు..

‘శిష్యుడు విచారంగా గురువు ఆశీస్సులు తీసుకున్న తర్వాత అక్కడి నుండి వెళ్లిపోయాడు. అప్పటి నుండి శిష్యుడి స్వభావం పూర్తిగా మారిపోయింది. ఆయన అందరినీ ప్రేమగా చూసేవాడు. ఎవరిపైనా ఎప్పుడూ కోపం తెచ్చుకోలేదు. ఆయన ఎక్కువ సమయం ధ్యానం, పూజలలో గడిపేవారు. అతను ఎవరితో చెడుగా ప్రవర్తించాడో వారి దగ్గరికి వెళ్లి.. క్షమించమని వేడుకునేవాడు.

గురూజీ ఆశీర్వదించండి..

ఈ క్రమంలోనే శిష్యుడు గురువును చివరిసారిగా చూసి ఆయన ఆశీస్సులు పొందుదాం అనుకున్నాడు. సాధువు ముందుకు వచ్చి ఇలా అన్నాడు.. “గురూజీ, నా సమయం ముగియబోతోంది. దయచేసి నన్ను ఆశీర్వదించండి” అని కోరాడు. ‘నా ఆశీస్సులు ఎప్పుడూ నీతోనే ఉంటాయి నాయనా. సరే, గత ఏడు రోజులు ఎలా గడిచాయో చెప్పు.. నువ్వు ఇంతకు ముందులాగా ప్రజలపై కోపం తెచ్చుకున్నావా’ అని అడిగాడు.

రహస్యం ఇదే..

‘లేదు లేదు. నాకు బతకడానికి ఏడు రోజులే మిగిలి ఉన్నాయి. దాన్ని పనికిరాని వాటి కోసం ఎలా వృథా చేస్తాను. నేను అందరినీ ప్రేమగా చూసాను. నేను బాధపెట్టిన వారిని క్షమించమని కూడా అడిగాను’ అని శిష్యుడు చెప్పాడు. అప్పుడు సాధువు నవ్వి.. ‘నా మంచి ప్రవర్తన రహస్యం ఇదే’ అన్నాడు. ‘నేను ఎప్పుడైనా చనిపోవచ్చని నాకు తెలుసు కాబట్టి నేను అందరినీ ప్రేమగా చూస్తాను’ అని చెప్పాడు.

మిగిలింది 7 రోజులే..

జీవిత పాఠాన్ని నేర్పించడానికి మాత్రమే సాధువు తనకు మరణ భయాన్ని చూపించాడని శిష్యుడు అర్థం చేసుకున్నాడు. వాస్తవానికి మనకు ఇంకా ఏడు రోజులు మాత్రమే మిగిలి ఉన్నాయి అని శిష్యుడికి అర్థం అయ్యింది. అవి ఆదివారం, సోమవారం, మంగళవారం, బుధవారం, గురువారం, శుక్రవారం, శనివారం. ఎనిమిదో రోజు సృష్టించబడలేదు. కాబట్టి మనం ప్రతీరోజు.. ప్రతీఒక్కరితో మంచిగా మెలగాలని శిష్యుడు గ్రహించాడు.