మలయాళం మిస్టరీ థ్రిల్లర్ సినిమాకు అభిమానులా? అయితే ఈ నెలలో ఈటీవీ విన్ ఓటీటీలోకి ఆ ఇండస్ట్రీకి చెందిన ఈ జానర్ మూవీ తెలుగులో స్ట్రీమింగ్ కు రాబోతోంది. ఇదేకాదు మరో ఆరు సరికొత్త సినిమాలను కూడా మే నెలలో ప్రేక్షకుల ముందుకు తీసుకురానున్నట్లు ఆ ఓటీటీ గురువారం (మే 1) వెల్లడించింది.

ఈటీవీ విన్ ఓటీటీ రిలీజెస్

ఈటీవీ విన్ ఓటీటీ క్రమంగా దూకుడు పెంచుతోంది. ప్రతి నెలా మొదటి రోజే ఆ నెలలో తమ ఓటీటీలోకి రాబోతున్న సినిమాల గురించి వెల్లడించే ఆ ప్లాట్‌ఫామ్.. గురువారం (మే 1) తన ఎక్స్ అకౌంట్ ద్వారా మే నెల రిలీజెస్ గురించి తెలిపింది. ఈ నెల మొత్తంగా ఏడు సినిమాలు రిలీజ్ కాబోతున్నాయి.

వాటిలో మే నెల తొలి రోజే ముత్తయ్య అనే సినిమా స్ట్రీమింగ్ కు వచ్చేసింది. 70 ఏళ్ల వయసులోనూ నటనపై మక్కువతో సినిమాల్లో నటించాలని తపించే ఓ వృద్ధుడి చుట్టూ తిరిగే కథ ఇది. ప్రస్తుతం ఈ మూవీ స్ట్రీమింగ్ అవుతోంది.

అక్కడ అమ్మాయి ఇక్కడ అబ్బాయి ఓటీటీ రిలీజ్

ఇక యాంకర్ ప్రదీప్ నటించిన మూవీ అక్కడ అమ్మాయి ఇక్కడ అబ్బాయి కూడా ఇదే నెలలో ఓటీటీలోకి రాబోతోంది. మే 8న ఈ సినిమా ఈటీవీ విన్ ఓటీటీలోకి అడుగుపెడుతోంది. ఏప్రిల్ 11న థియేటర్లలో రిలీజ్ కాగా.. నెల రోజుల్లోపే డిజిటల్ ప్రీమియర్ కు సిద్ధమైంది.

ఓ ఊళ్లో 60 మంది అబ్బాయిల తర్వాత పుట్టిన ఏకైక అమ్మాయి.. ఆ ఊరి పెద్ద నిర్ణయానికి విరుద్ధంగా బయటి నుంచి వచ్చిన వ్యక్తిని ప్రేమించడం అనే సరికొత్త కథతో వచ్చిన సినిమా ఇది.

మలయాళం మిస్టరీ థ్రిల్లర్ మూవీ

ఇక మే నెలలోనే ఈటీవీ విన్ ఓటీటీలోకి ఓ మలయాళం మిస్టరీ థ్రిల్లర్ మూవీ వస్తోంది. జూన్, 2023లో థియేటర్లలో రిలీజైన ఈ సినిమా.. రెండేళ్ల తర్వాత తెలుగులో స్ట్రీమింగ్ కానుండటం విశేషం. ఈ మూవీ పేరు పెండులమ్. మే 22న ఈ మూవీని స్ట్రీమింగ్ చేయనున్నట్లు ఈటీవీ విన్ వెల్లడించింది. అంతు చిక్కని విధంగా జరిగిన ఓ ఘటన నిగ్గు తేల్చడానికి ఓ కల కనడం ద్వారా ప్రయత్నించే ఓ డాక్టర్ స్టోరీ ఇది.

ఇవే కాకుండా మరో ఐదు సినిమాలు కూడా సిద్ధంగా ఉన్నాయి. ఈటీవీ విన్ అందిస్తున్న కథాసుధ నుంచి పెంకుటిల్లు అనే మూవీ మే 4న స్ట్రీమింగ్ కానుంది. ఇక నాతి చరామి అనే మరో సినిమా మే 25న స్ట్రీమింగ్ అవుతుంది. ఇక అదే కథా సుధ నుంచి మే 18న కాలింగ్ బెల్ అనే మరో సినిమా రానుంది.