చిప్స్ అంటే పిల్లలకు ప్రాణం. పిల్లలే కాదు పెద్దలు కూడా చిప్స్ ను ఇష్టంగా తింటారు. ఎప్పుడూ ఆలూ చిప్స్ మాత్రమే కాదు కాస్త కొత్తగా జాక్ ఫ్రూట్ చిప్స్ టేస్ట్ చూడండి. పనసకాయతో చేసే ఈ చిప్స్ ఎంతో రుచిగా ఉంటాయి.

కేరళలో ఎక్కడా చూసినా పనసకాయ చిప్స్ కనిపిస్తాయి. పనసపండు అనగానే మనకు తిరునల్వేలి, కేరళ గుర్తుకు వస్తాయి. ఆ ప్రాంతాల్లో పనస చెట్లు అధికం. అందుకే అక్కడ పనస కాయ చిప్స్ వ్యాపారం మీదే ఎక్కువ మంది ఆధారపడి బతుకుతున్నారు. ఈ పనసకాయ చిప్స్ కోసం బాగా పండినది తీసుకోకూడదు. పచ్చిగా ఉన్న పనసకాయను ఎంపిక చేసుకోవాలి.

పనసకాయ చిప్స్ రెసిపీకి కావాల్సిన పదార్థాలు

పచ్చి పనసకాయ ముక్కలు – అరకిలో

కారం – రెండు స్పూన్లు

రాక్ సాల్ట్ – రుచికి సరిపడా

నూనె – సరిపడినంత

పసుపు – అరస్పూను

పనసకాయ చిప్స్ రెసిపీ

1. పనస కాయలోని పసుపు భాగాన్ని తీసి ఒక గిన్నెలో వేయాలి. వీటిని పొడవుగా కట్ చేసుకోవాలి.
2. ఇప్పుడు ఒక గిన్నెలో నీరు, ఉప్పు, పసుపు వేసి పక్కన పెట్టుకోవాలి. కాసేపటి తరువాత చేత్తోనే పిండి ఒక ప్లేటులో తడి లేకుండా ఆరబెట్టుకోవాలి.
3. ఒక కళాయిలో చిప్స్ వేయించడానికి తగినంత నూనె వేయాలి.
4. నూనె బాగా మరుగుతున్నప్పుడు పనస ముక్కలను తీసి చేత్తోనే పిండి నూనెలో వేయాలి.
5. అవి బాగా వేగాక తీసి ఒక గిన్నెలో వేయాలి. వాటిలో కారం, ఉప్పు వేసి బాగా కలుపుకోవాలి. అంతే టేస్టీ పనసకాయ చిప్స్ రెడీ అయినట్టే.

ఇది కేరళలో తయారు చేసిన ప్రసిద్ధ చిరుతిండి వంటకం. పిల్లల నుంచి పెద్దల వరకు దీన్ని తినవచ్చు. కొలెస్ట్రాల్ ఉన్నవారు మాత్రం కొద్దిగా తినడం తగ్గించాలి. మితంగా తినాలి. మీరు ఇంట్లో కూడా ప్రయత్నించవచ్చు.