అర్జున్ సర్కార్ ఐపీఎస్ గా నాని యాక్షన్ విశ్వరూపం చూపించారు. హిట్ 3 మూవీలో మునుపెన్నడూ లేని విధంగా ఫుల్ రక్తపాతంతో ఇంటెన్సివ్ యాక్షన్ సీన్స్ లో నాని ఇరగదీశారు. గురువారం (మే 1) థియేటర్లకు వచ్చిన ఈ మూవీపై మిక్స్ డ్ టాక్స్ వినిపిస్తున్నాయి. ఫస్ట్ హాఫ్ మరింత బెటర్ గా ఉంటే బాగుండేదనే కామెంట్లు వస్తున్నాయి. అయితే రిలీజైన ఫస్ట్ రోజు మాత్రం హిట్ 3 కలెక్లన్ల దుమ్ము రేపింది. నాని కెరీర్ లో సెకండ్ బిగ్గెస్ట్ ఓపెనింగ్ గా నిలిచింది.

ఎన్ని కోట్లంటే

హిట్ ఫ్రాంఛైజీలో వచ్చిన మూడో మూవీ హిట్ 3. శైలేష్ కొలను డైరెక్ట్ చేసిన ఈ మూవీలో నాని, శ్రీనిధి శెట్టి, ప్రతీక్ స్మితా పాటిల్ లీడ్ రోల్స్ ప్లే చేశారు. ఈ మూవీ ఫస్ట్ డే ఇండియాలో రూ.18 కోట్ల నెట్ కలెక్ట్ చేసిందని సక్నిల్క్ తెలిపింది. ఇది నాని కెరీర్ లో సెకండ్ బిగ్గెస్ట్ ఓపెనింగ్ కావడం విశేషం.

ఆ మూవీస్ ను దాటి

హిట్ 3 సినిమాకు 87.82% తెలుగు ఆక్యుపెన్సీ ఉండగా, మధ్యాహ్నం షోలో 92.37% ఆక్యుపెన్సీ నమోదైంది. తొలిరోజు రూ.23.2 కోట్లు కలెక్ట్ చేసిన దసరా (2023)కు నాని కెరీర్ లోనే బిగ్గెస్ట్ ఓపెనింగ్. హిట్ 3 ఆ మూవీకి దగ్గరగా వచ్చి ఆగిపోయింది. అయితే నాని సినిమాల్లో సరిపోదా శనివారం (రూ.9 కోట్లు), అంటే సుందరానికి (రూ.6.25 కోట్లు), హాయ్ నాన్న (రూ.4.9 కోట్లు) ఫస్ట్ డే కలెక్షన్లను హిట్ 3 దాటేసింది.

అద్భుతమన్న నాని

హిట్ 3లో వీర లెవెల్ యాక్షన్ తో అదరగొట్టిన నాని ఈ మూవీకి వస్తున్న రెస్పాన్స్ పట్ల థ్రిల్ అయ్యారు. నాని తన ఇన్ స్టాగ్రామ్ లో ‘ఇది బాక్సాఫీస్ వద్ద అద్భుతం’ అని రాసుకొచ్చాడు. ‘‘ఐ లవ్ యూ ఆల్. ఈ రోజు అర్జున్ వంతు వచ్చింది. ఇది నిజంగా చిరస్మరణీయం. ముందుకు, పైకి (హార్ట్ ఎమోజీ)’’ అని నాని పోస్టు చేశాడు.

కథ ఏమిటంటే?

హిట్ 3 లో ఎస్పీ అర్జున్ సర్కార్ (నాని) దేశవ్యాప్తంగా ఒకేలా జరిగే వరుస హత్యలను పరిష్కరించేందుకు రంగంలోకి దిగుతాడు. ఈ హత్యల వెనుక ఉన్న మిస్టరీ సీరియల్ కిల్లర్ కంటే భయంకరమైంది. ఈ కేసులను సాల్వ్ చేసి, క్రిమినల్స్ ను నాని ఎలా మట్టికరిపించాడన్నది కథ. ఈ క్రైమ్ ఇన్విస్టిగేషన్ థ్రిల్లర్ చిత్రంలో శ్రీనిధి మృదులగా, ప్రతీక్ ఆల్ఫాగా నటించారు. లాస్ట్ లో తమిళ స్టార్ హీరో కార్తీ తళుక్కుమన్నారు. హిట్ 4లో ఆయన హీరోగా యాక్ట్ చేసే ఛాన్స్ ఉంది.