ఏపీ డిఎస్సీ 2025లో స్పోర్ట్స్‌ కోటా ఉద్యోగాల భర్తీకి నోటిఫికేషన్‌ విడుదలైంది. స్పోర్ట్స్‌ కోటా ఉద్యోగాలకు రాత పరీక్ష ఉండదు. మే2వ తేదీ నుంచి 31 వరకు దరఖాస్తులను ఆన్‌లైన్‌లో స్వీకరిస్తారు.

ఏపీ మెగా డిఎస్సీలో మొత్తం 421 ఉద్యోగాలను స్పోర్ట్స్‌ కోటాలో భర్తీ చేస్తారు. డీఎస్సీ-2025 లో భాగంగా 3శాతం క్రీడా కోటా ఉద్యోగాల భర్తీకి నోటిఫికేషన్ శుక్రవారం అధికారికంగా విడుదల చేశారు. స్పోర్ట్స్‌ కోటా డిఎస్సీ నోటిఫికేషన్‌ లింకు కోసం క్లిక్‌ చేయండి.

https://sportsdsc.apcfss.in/

మెగా డిఎస్సీలో స్పోర్ట్స్‌ కోటా ఉద్యోగాల భర్తీకి నోటిఫికేషన్‌ విడుదలైంది. క్రీడాకారుల ప్రతిభకు న్యాయమైన గుర్తింపు ఇవ్వడం రాష్ట్ర ప్రభుత్వ ప్రధాన లక్ష్యాలలో ముఖ్యమైనదని స్పోర్ట్స్‌ అథారిటీ ఆఫ్‌ ఆంధ్రప్రదేశ్‌ ప్రకటించింది. డిఎస్సీ నియామకాల్లో భాగంగా అర్హత కలిగిన క్రీడాకారులకు 3% హారిజాంటల్ రిజర్వేషన్ కల్పిస్తూ, ప్రభుత్వ ఉద్యోగాల్లో అవకాశాలు కల్పిస్తున్నారు.

మెగా డీఎస్సీలో విడుదల చేసిన 16,347 పోస్ట్ ల్లో క్రీడల కోటా క్రింద 421 పోస్టులను స్పోర్ట్స్ కోటా క్రింద కేటాయించారు. స్పోర్ట్స్ కోటా కు ఎంపికలో పారదర్శకతకు పెద్దపీట వేస్తూ కేవలం అర్హులకు మాత్రమే న్యాయం జరిగిలా చర్యలు తీసుకున్నట్టు క్రీడా శాఖ మంత్రి వివరించారు.

గత ప్రభుత్వ హయాంలో క్రీడాకారులను కనీసం పట్టించుకోలేదని కూటమి ప్రభుత్వం వచ్చిన తరువాత క్రీడాకారులకు 3 శాతం రిజర్వేషన్ సౌకర్యం కల్పించినట్టు చెప్పారు.

దరఖాస్తులు ఇలా…

ప్రతిభ చూపిన క్రీడాకారులకు ఇన్సెంటీవ్ లు అందిస్తామని మంత్రి తెలిపారు. క్రీడల్లో ఫేక్ సర్టిఫికెట్లతో అర్హత పొందేందుకు ప్రయత్నించే వారిపై ఉక్కుపాదం మోపుతామని హెచ్చరించారు. మెగా డీఎస్సీకి అర్హులైన క్రీడాకారులు మే 2 నుండి మే 31 వరకు https://sports.ap.gov.in , https://sportsdsc.apcfss.in వెబ్‌సైట్లలో ఆన్లైన్ దరఖాస్తు చేసుకోవాలని మంత్రి రాంప్రసాద్ రెడ్డి తెలిపారు.

మెగా డీఎస్సీలో క్రీడా కోటా క్రింద ప్రభుత్వ, జడ్పీ, ఎంపీపీ పాఠశాలల్లో 333 పోస్టులు, మున్సిపల్, కార్పొరేషన్ పాఠశాలల్లో 30 పోస్టులు, ఏపీ ట్రైబల్ వెల్ ఫేర్ ఆశ్రమ్ పాఠశాలల్లో 22 పోస్టులు, ఏపీ రెసిడెన్షియల్ పాఠశాలల్లో 2 పోస్టులు, ఏపీ మోడల్ పాఠశాలల్లో 4 పోస్టులు, ఏపీ సోషల్ వేల్పేర్ రెసిడెన్షియల్ పాఠశాలల్లో 7 పోస్టులు, ఏపీ గురుకుల వెల్ఫేర్ రెసిడెన్షియల్ పాఠశాలల్లో 23 పోస్టులు ఉన్నాయి.

స్పోర్ట్స్‌ కోటాలో ఉద్యోగాలకు దరఖాస్తు చేసేవారికి రాత పరీక్ష నుంచి మినహాయింపు ఉంటుంది. జిల్లాల వారీగా పోస్టుల వివరాలు, షెడ్యూల్, నోటిఫికేషన్ ఆన్‌లైన్‌లో ఉంటాయి.