వైద్య విద్యలో ప్రవేశాల కోసం నిర్వహించే నీట్‌ యూజీకి సంబంధించి అసత్యాలు ప్రచారం అవుతున్నాయి. ఇలా తప్పుడు సమాచారాన్ని వ్యాప్తి చేసే సోషల్ మీడియా ఛానళ్లపై ఎన్టీఏ చర్యలు చేపట్టింది. నీట్ యూజీ పరీక్ష మే 4న జరగనుంది. 550 నగరాల్లో 5 వేలకు పైగా పరీక్షా కేంద్రాలను ఏర్పాటు చేశారు. ఈ సమయంలో కొంతమంది పేపర్ లీకేజీకి సంబంధించి ఫేక్ న్యూస్ వ్యాప్తి చేస్తున్నారు. ఇలాంటి 120పైగా ఖాతాలను ఎన్టీఏ గుర్తించింది. ఈ మేరకు కేసులు కూడా నమోదు అయ్యాయి.

ఇలా సమాచారం ఇవ్వొచ్చు

కొత్తగా ప్రారంభించిన అనుమానాస్పద క్లెయిమ్స్ రిపోర్టింగ్ పోర్టల్(https://neetclaim.centralindia.cloudapp.azure.com/) ద్వారా తమకు సమాచారం అందిందని ఎన్టీఏ వర్గాలు తెలిపాయి. పరీక్షకు సంబంధించిన నకిలీ స్టేట్‌మెంట్స్ ఫార్వర్డ్ చేస్తున్న 106 టెలిగ్రామ్ ఛానళ్లు, 16 ఇన్‌స్టాగ్రామ్ ఖాతాలను ఎన్టీఏ గుర్తించింది. తప్పుడు సమాచారంపై అణచివేతలో భాగంగానే ఎన్టీఏ ఈ నిర్ణయం తీసుకుంది. జాతీయ స్థాయి వైద్య ప్రవేశ పరీక్షకు ముందు అభ్యర్థులను తప్పుదోవ పట్టించి భయాందోళనలు సృష్టించడమే ఈ ఫేక్ ఇన్ఫర్మేషన్ ఉద్దేశంగా కనిపిస్తుంది.

అడ్మిన్లపై చర్యలు

నీట్ యూజీ 2025 ప్రశ్నాపత్రం అందుబాటులో ఉందని ఈ ఛానళ్లు తప్పుడు ప్రచారం చేసి విద్యార్థులను తప్పుదోవ పట్టిస్తున్నాయి. ఈ కేసులన్నింటినీ కేంద్ర హోంశాఖ పరిధిలోని ఇండియన్ సైబర్ క్రైమ్ కోఆర్డినేషన్ సెంటర్(ఐ4సీ)కు రిఫర్ చేశారు. అందుకే తప్పుడు సమాచారం వ్యాప్తి చెందకుండా, విద్యార్థులు భయాందోళనకు గురికాకుండా ఈ ఛానళ్లను తక్షణమే తొలగించాలని టెలిగ్రామ్, ఇన్‌స్టాకు కూడా ఆదేశాలు వెళ్లాయి. తదుపరి చట్టపరమైన చర్యలు తీసుకునేందుకు వీలుగా ఈ గ్రూపుల వెనక ఉన్న అడ్మిన్ల వివరాలను పంచుకోవాలని ఎన్టీఏ తెలిపింది.

ఏప్రిల్ 26న ప్రారంభించిన క్లెయిమ్స్ రిపోర్టింగ్ పోర్టల్‌కు ఇప్పటికే 1,500 కంటే ఎక్కువ సబ్మిషన్లు వచ్చాయి. వీటిలో ఎక్కువ భాగం టెలిగ్రామ్ ఆధారిత నకిలీ లీక్ క్లెయిమ్‌లతో ముడిపడి ఉన్నాయి.