విజయ్ దేవరకొండ, భాగ్యశ్రీ బోర్సే లీడ్ రోల్స్ లో నటిస్తున్న మూవీ కింగ్డమ్ (Kingdom). గౌతమ్ తిన్ననూరి డైరెక్ట్ చేస్తున్న ఈ సినిమా నుంచి శుక్రవారం (మే 2) ఫస్ట్ సింగిల్ రిలీజైంది. హృదయం లోపల కదనం జరిగెనా అంటూ సాగిన ఈ పాట రాబోయే రోజుల్లో బ్లాక్‌బస్టర్ గా నిలిచేలా కనిపిస్తోంది.

హృదయం లోపల సాంగ్ రిలీజ్

కింగ్డమ్ మూవీ నుంచి ఫస్ట్ సింగిల్ వస్తున్న విషయాన్ని రెండు రోజుల ముందే ఓ ప్రోమో ద్వారా మేకర్స్ వెల్లడించారు. ఇందులో విజయ్, భాగ్యశ్రీ మధ్య ఓ ఘాటు కిస్సింగ్ సీన్ కూడా ఉంది. ఆ ప్రోమో ఇన్‌స్టాంట్ హిట్ అయింది. ఇక ఇప్పుడు ఫుల్ సాంగ్ రిలీజైంది. దీనికి కూడా నిమిషాల్లోనే వేల సంఖ్యలో వ్యూస్ వచ్చాయి.

అనిరుధ్ రవిచందర్ అదిరిపోయే మ్యూజిక్ తో ‘హృదయం లోపల’ పాటను అందంగా మలిచాడు. అంతేకాదు అతడే ఈ పాట పాడాడు. అనుమిత నదేశన్ తో కలిసి ఈ డ్యుయెట్ పాడటం విశేషం. ఈ పాటకు కేకే లిరిక్స్ అందించాడు.

ఈ సాంగ్ రిలీజ్ విషయాన్ని విజయ్ తన ఇన్‌స్టా ద్వారా వెల్లడించాడు. “కాస్త మృదత్వం, కాస్త ప్రేమ, ఇదే వాళ్ల ప్రపంచం అనుమతించేది. బయోలో పూర్తి సాంగ్ లింక్ ఉంది. కింగ్డమ్ ప్రపంచం నుంచి వచ్చిన పాట. మీ అందరినీ అందులోకి, మా ప్రయాణంలోకి, భావోద్వేగాల్లోని, మా హృదయాల్లోకి స్వాగతిస్తున్నాం. ” అనే క్యాప్షన్ తో విజయ్ పోస్ట్ చేశాడు.

కింగ్డమ్ మూవీ గురించి..

సితార ఎంటర్‌టైన్‌మెంట్స్, ఫార్చూన్ ఫోర్ సినిమాస్, శ్రీకరా స్టూడియోస్ పతాకాలపై సూర్యదేవర నాగ వంశీ, సాయి సౌజన్య ప్రతిష్టాత్మకంగా ఈ చిత్రాన్ని నిర్మిస్తున్నారు. మే 30వ తేదీన ప్రపంచవ్యాప్తంగా భారీస్థాయిలో ఈ చిత్రం విడుదల కానుంది.

విజయ్ దేవరకొండ, దర్శకుడు గౌతమ్ తిన్ననూరి, సంగీత దర్శకుడు అనిరుధ్ త్రయం చేతులు కలిపితే అంచనాలు ఏ స్థాయిలో ఉంటాయో ప్రత్యేకంగా చెప్పాల్సిన అవసరం లేదు. ఆ అంచనాలకు ఏ మాత్రం తగ్గకుండా ‘హృదయం లోపల’ పాట ఉంది. కింగ్డమ్ మూవీతో ఓ మంచి ఆల్బమ్ రానున్నట్లు తొలి పాటతోనే స్పష్టమైంది.

డైరెక్టర్ గౌతమ్ తిన్ననూరి అద్భుతమైన కథను, అంతే అద్భుతంగా తెరకెక్కిస్తూ ‘కింగ్డమ్’తో ప్రేక్షకులకు సరికొత్త అనుభూతిని అందించడానికి సిద్ధమవుతున్నాడు. ఈ సినిమా మే 30న రిలీజ్ కానుంది.