బాలీవుడ్ సీనియర్ యాక్టర్ నవాజుద్దీన్ సిద్దిఖీ ప్రధాన పాత్ర పోషించిన కాస్తవ్ చిత్రం నేరుగా ఓటీటీలోకి వచ్చింది. 1990ల్లో గోవాలో కస్టమ్స్ అధికారిగా పని చేసిన కాస్తవ్ ఫెర్నాండెజ్ జీవితంలోని యథార్థ ఘటనల ఆధారంగా ఈ చిత్రం రూపొందింది. ఈ మూవీకి సేజల్ షా దర్శకత్వం వహించారు. ఈ బయోగ్రాఫికల్ క్రైమ్ డ్రామా సినిమా కాస్తవ్ స్ట్రీమింగ్‍లో ప్రస్తుతం అదరగొడుతోంది.

ట్రెండింగ్‍లో టాప్ ప్లేస్‍కు..

కాస్తవ్ చిత్రం మే 1వ తేదీన జీ5 ఓటీటీ ప్లాట్‍ఫామ్‍లో స్ట్రీమింగ్‍కు అడుగుపెట్టింది. ఈ మూవీకి మొదటి నుంచి మంచి వ్యూస్ దక్కుతున్నాయి. దీంతో స్ట్రీమింగ్‍కు వచ్చిన రెండు రోజుల్లోనే ప్రస్తుతం (మే 3) ఈ చిత్రం జీ5లో నేషనల్ వైడ్ ట్రెండింగ్‍లో టాప్ ప్లేస్‍కు వచ్చింది.

కాస్తవ్ చిత్రం జీ5 ఓటీటీలో హిందీలో ఒక్కటే స్ట్రీమింగ్‍కు వచ్చింది. ఇంగ్లిష్ సబ్‍టైటిల్స్ అందుబాటులో ఉన్నాయి. డబ్బింగ్‍లో ఇతర భాషల్లోనూ ఈ మూవీ వస్తుందా అనేది చూడాలి. ఇప్పుడైతే హిందీలో జీ5 ఓటీటీలో చూడొచ్చు.

స్మగ్లింగ్‍ను అడ్డుకునేందుకు..

గోవాలో గోల్డ్, డ్రగ్స్ స్మగ్లింగ్‍ను అడ్డుకునేందుకు కస్టమ్స్ ఆఫీసర్ కాస్తవ్ ఫెర్నాండెజ్ చేసిన కృషి, ప్రయత్నాల చుట్టూ ఈ మూవీ సాగుతుంది. ఈ చిత్రంలో కాస్తవ్ పాత్రను నావాజుద్దీన్ సిద్ధిఖీ పోషించారు. గ్రిప్పింగ్‍గా ఈ బయోగ్రాఫికల్ మూవీని తెరకెక్కించారు డైరెక్టర్ సేజల్ షా.

కాస్తవ్ సినిమాలో నవాజుద్దీన్‍తో పాటు ప్రియా బాపట్, కిశోర్ కుమార్, మహిక శర్మ, హుసేన్ దలాల్, దేవినా కొలాకో, గగన్ దేవ్ రియార్, రవి శంకర్ జైస్వాల్ కీలకపాత్రలు పోషించారు. ఈ మూవీని వినోద్ భానుశాలి, కమలేశ్ భానుశాలి, భవేశ్ మండాలియా, సేజల్ షా, శ్యామ్ సుందర్, ఫైజుద్దీన్ సిద్ధీఖీ సంయుక్తంగా నిర్మించారు. ఈ చిత్రానికి రఫే మహమూద్ సినిమాటోగ్రఫీ చేశారు.

జీ5లో రాబిన్‍హుడ్

జీ5 ఓటీటీలోకి తెలుగు యాక్షన్ కామెడీ మూవీ రాబిన్‍హుడ్ వచ్చేస్తోంది. మే 10వ తేదీన సాయంత్రం 6 గంటలకు ఈ చిత్రం జీ5 ఓటీటీలో స్ట్రీమింగ్‍కు అడుగుపెట్టనుంది. అదే సమయానికి జీ తెలుగు టీవీ ఛానెల్‍లో టెలికాస్ట్ కానుంది. నితిన్, శ్రీలీల జంటగా నటించిన రాబిన్‍హుడ్ సినిమా మార్చి 28న థియేటర్లలో రిలీజైంది. ఈ మూవీకి వెంకీ కుడుముల దర్శకత్వం వహించారు. ఈ మూవీలో ఆస్ట్రేలియా క్రికెటర్ డేవిడ్ వార్నర్ క్యామియో రోల్‍లో కనిపించారు. ఈ చిత్రంలో రాజేంద్ర ప్రసాద్, దేవ్‍దత్తా నాగే, వెన్నెల కిశోర్, షైన్ టామ్ చాకో, మైమ్ గోపీ, ఆడుకాలం నరేన్ కీలకపాత్రలు పోషించారు.