ఓదెల 2 ఓటీటీ రిలీజ్ డేట్: ఓదెల రైల్వేస్టేషన్ సినిమాకు సీక్వెల్ గా వచ్చిన సూపర్ నేచురల్ థ్రిల్లర్ మూవీ ఓదెల 2. భారీ అంచనాల మధ్య రిలీజైన ఈ మూవీ.. బాక్సాఫీస్ దగ్గర దారుణంగా బోల్తా కొట్టింది. బడ్జెట్ లో కనీసం సగం కూడా వసూలు చేయలేకపోయింది. దీంతో 20 రోజుల్లోనే ఓటీటీలోకి వస్తోంది. మరికొన్ని గంటల్లోనే ఓదెల 2 డిజిటల్ ప్రీమియర్ కానుంది.

ఓదెల 2 ఓటీటీ రిలీజ్ డేట్

తమన్నా భాటియా నటించిన ఓదెల 2 మూవీ గురువారం (మే 8) నుంచి అమెజాన్ ప్రైమ్ వీడియోలో స్ట్రీమింగ్ కానుంది. ఈ విషయాన్ని ఆ ఓటీటీయే వెల్లడించింది. తెలుగుతోపాటు తమిళం, కన్నడ, మలయాళం, హిందీ భాషల్లో ఓదెల 2 స్ట్రీమింగ్ కాబోతోంది.

ఏప్రిల్ 17న థియేటర్లలో రిలీజైన ఈ మూవీ.. మూడు వారాల్లోనే డిజిటల్ ప్రీమియర్ కు సిద్ధమవడం విశేషం. ప్రముఖ దర్శకుడు సంపత్ నంది కథ అందించిన ఈ సినిమాను అశోక్ తేజ డైరెక్ట్ చేశాడు.

ఓదెల 2 మూవీ ఎలా ఉందంటే?

తమన్నా భాటియా చాలా రోజుల తర్వాత నటించిన తెలుగు మూవీ ఈ ఓదెల 2. అందులోనూ ఓదెల రైల్వేస్టేషన్ కు మంచి రెస్పాన్స్ రావడంతో ఈ సీక్వెల్ పై అంచనాలు కాస్త ఎక్కువగా ఉన్నాయి. ఈ సినిమాను మైథలాజికల్, హారర్ జానర్లో తెరకెక్కించారు. తొలి సినిమా ఎక్కడ ముగిసిందో అక్కడి నుంచే ఈ సీక్వెల్ మొదలవుతుంది.

పెళ్లయిన ఆడవాళ్లను పాశవికంగా అనుభవించే ఓ సైకో చనిపోయి ప్రేతాత్మగా మారితే ఎలా ఉంటుంది అనే కాన్సెప్ట్‌తో ఓదెల 2ను తెరకెక్కించారు. ఇందులో తమన్నా ఓ నాగసాధువుగా నటించడం విశేషం. ఓ థ్రిల్లర్ మూవీ కావడంతో కథను అందుకు తగినట్లుగానే నడిపించినా, మ్యూజిక్ అందుకు ప్లస్ అయినా.. ఈ మూవీ మాత్రం ప్రేక్షకులను పెద్దగా మెప్పించలేకపోయింది.

ఓదెల 2 బాక్సాఫీస్ దగ్గర మేకర్స్ కు నష్టాలను మిగిల్చింది. ఈ మూవీని రూ.25 కోట్ల బడ్జెట్ తో తెరకెక్కించారు. కానీ 20 రోజుల్లో ఈ సినిమాకు ఇండియా నెట్ కలెక్షన్లు రూ.6 కోట్లు కూడా దాటలేదు.