ఎల్లలు లేని ప్రేమకు ప్రతిరూపం తల్లి. బిడ్డ పుట్టిన క్షణం నుండి, వారి సంరక్షణే తన మొదటి బాధ్యతగా భావిస్తుంది అమ్మ. బిడ్డలకు వెచ్చదనాన్ని, ప్రేమను అందించడమే ఒక మాతృమూర్తి తన ప్రధాన పనిగా మార్చుకుంటుంది . జీవితంలోని ప్రతి దశలోనూ పిల్లలకు అండగా నిలిచి, హద్దులు లేని ప్రేమను ఇచేందుకే తల్లిని ఆ దేవుడు సృష్టించాడేమో అనిపిస్తుంది. ఆ తల్లి గొప్పతనాన్ని ప్రపంచానికి తెలియజేసేందుకే ప్రతి ఏడాది మాతృ దినోత్సవం నిర్వహించుకుంటాము.

ప్రతి ఏడాది మే రెండో ఆదివారం మదర్స్ డే నిర్వహించుకుంటాము. ఈసారి మే 11న ఈ ప్రత్యేక దినోత్సవం వచ్చింది. ఈ రోజున తల్లుల గొప్పతనాన్ని ప్రతి బిడ్డ అర్థం చేసుకోవాలి. వారికి సన్మానించడం, బహుమతులతో ముంచెత్తడం, సర్ ప్రైజ్‌లు ప్లాన్ చేయడం వంటివి చేస్తారు.

మదర్స్ డే జరుపుకోవడానికి సన్నద్ధమవుతున్న తరుణంలో, ఈ రోజును మీ తల్లికి మరింత ప్రత్యేకమైనదిగా మార్చడానికి ఇక్కడ కొన్ని మార్గాలు ఉన్నాయి.

1. విహారయాత్రకు వెళ్లండి

మీరు, మీ అమ్మ కలిసి రోజంతా బయటికి వెళ్లేందుకు ప్లాన్ చేయండి. పార్కుకు వెళ్లేందుకు కూడా ప్లాన్ చేయవచ్చు. మీ అమ్మకు ఇష్టమైన భోజనంతో పిక్నిక్ కు వెళ్లవచ్చు. ఒక అందమైన ప్రదేశంలో, పచ్చని చెట్ల మధ్య మీ అమ్మతో ఆమెకు ఇష్టమైన వంటకాలతో అవుటింగ్ ప్లాన్ చేస్తే అదిరిపోవడం ఖాయం.

2. ఫోటో ఆల్బమ్ తయారు చేయండి

తల్లులు చిన్నప్పటి నుండి మీ జ్ఞాపకాలన్నింటినీ భద్రపరుస్తారు. కానీ వారి ఫోటోలను మాత్రం మర్చిపోతారు. ఈ మదర్స్ డే సందర్భంగా, ఆమె ఫోటో ఆల్బమ్ ను బహుమతిగా ఇవ్వండి. మీ అమ్మ స్కూల్లో ఉన్నప్పుడు, కాలేజ్ ఫ్రెండ్స్ తో సరదాగా గడిపినప్పటి ఫోటోలు, పెళ్లి ఫోటోలు సేకరించి ఓ స్పెషల్ ఫోటో ఆల్బమ్‌ను రూపొందించండి.

3. కలిసి వంట చేయండి

వంటగదిలో మీ అమ్మతో కలిసి ఒక రోజు గడిపేందుకు ప్రయత్నించండి. ఆమెతో కబుర్లు చెప్పడం, నవ్వులు పంచుకోవడం, రకరకాల వంటకాలు వండడం చేయండి. ఈసారి మదర్స్ డే రోజున కేక్ తయారు చేసి కట్ చేయండి. ఆ కేక్ మీరే తయారు చేస్తే ఇంకా రుచిగా ఉంటాయి.

4. లాంగ్ డ్రైవ్ కు వెళ్లండి

తల్లులు ఇంట్లో చాలా బిజీగా ఉంటారు. వారు తరచుగా ఇతరుల కోసం వారి కలలు, ఆకాంక్షలను వదులుకుంటారు. ఈ మదర్స్ డే రోజున, మీ అమ్మను లాంగ్ డ్రైవ్ కు తీసుకెళ్లండి. ఆమెకు ఇష్టమైన పాటలను ప్లే చేయండి. ఆమెకు ఇష్టమైన ప్రాంతానికి తీసుకెళ్లేందుకు ప్రయత్నించండి. ముందుగా ఆమెకు ఏ ప్రాంతాలు ఇష్టమో తెలుసుకునేందుకు ట్రై చేయండి.

5. రోజంతా కలిసి గడపండి

తల్లులు కోరుకునేది బిడ్డలు తమ కోసం కొంత సమయాన్ని కేటాయించాలని, అలాగే తనపై కాస్త శ్రద్ధ పెట్టాలని కోరుకుంటారు. అందుకే మదర్స్ డే కొంత సమయం తల్లులతో సంతోషంగా గడిపేలా ప్లాన్ చేయండి. ఈ మదర్స్ డే రోజున ఒక రోజు సెలవు తీసుకుని మీ అమ్మతోనే ఉండేందుకు ప్రయత్నించండి.