తెలుగు టీవీ సీరియల్స్ లేటెస్ట్ టీఆర్పీ రేటింగ్స్ రిలీజ్ చేశారు. అయితే రాను రాను ఇటు స్టార్ మా, అటు జీ తెలుగు సీరియల్స్ రేటింగ్స్ దారుణంగా పతనమవుతూ వస్తున్నాయి. కార్తీకదీపం మళ్లీ టాప్ లోకి వచ్చినా కనీసం 11 రేటింగ్ దాటలేకపోయింది. అటు జీ తెలుగులో అయితే ఒక్క సీరియల్ రేటింగ్ కూడా 6కు మించకపోవడం గమనార్హం.

తెలుగులో నంబర్ వన్ సీరియల్ ఇదే

తెలుగు టీవీ సీరియల్స్ కు సంబంధించి 17వ వారం టీఆర్పీ రేటింగ్స్ వచ్చాయి. ఎప్పటిలాగే స్టార్ మా సీరియల్స్ ఆధిపత్యాన్ని కొనసాగించాయి. మూడు, నాలుగు వారాలుగా తన నంబర్ వన్ స్థానాన్ని కోల్పోయిన కార్తీకదీపం.. ఈ వారం మళ్లీ టాప్ లోకి వచ్చింది.

అయితే దాదాపు అన్ని సీరియల్స్ రేటింగ్స్ పతనమవుతున్నాయి. ఒకప్పుడు 13కుపైగా ఉండే కార్తీకదీపం రేటింగ్.. ఇప్పుడు 10.86గా ఉంది. ఇక రెండో స్థానంలో ఉన్న ఇల్లు ఇల్లాలు పిల్లలు ఒక దశలో 12కుపైగా రేటింగ్ సాధించినా.. ఇప్పుడు 10.54తో సరిపెట్టుకుంది.

ఆ తర్వాతి స్థానాల్లో ఉన్న సీరియల్స్ పరిస్థితి కూడా ఇలాగే ఉంది. గత వారం టాప్ లో ఉన్న గుండె నిండా గుడి గంటలు ఇప్పుడు 10.32తో మూడో స్థానానికి పడిపోయింది. ఇంటింటి రామాయణం 9.6 రేటింగ్ తో నాలుగో స్థానంలో ఉంది.

ఇక చిన్ని 7.4తో ఐదోస్థానంలో కొనసాగుతుండగా.. బ్రహ్మముడి 7.10 రేటింగ్ తో మరోసారి ఆరో స్థానానికి దూసుకొచ్చింది. నువ్వుంటే నా జతగా 7 రేటింగ్ తో ఏడో స్థానానికి పడిపోయింది. పలుకే బంగారమాయనా 6.56తో 8వ స్థానంలో ఉంది.

జీ తెలుగు సీరియల్స్ మరీ దారుణం

జీ తెలుగు సీరియల్స్ పరిస్థితి ఇంకా దారుణంగా ఉంది. ఆ ఛానెల్ కు చెందిన ఒక్క సీరియల్ కు కూడా ఈవారం రేటింగ్ 6కు మించలేదు. చామంతి సీరియల్ 5.94తో టాప్ లో ఉంది. ఓవరాల్ గా 9వ స్థానంలో కొనసాగుతోంది. ఇక మేఘసందేశం 5.91తో పదో స్థానంలో ఉంది.

ఆ లెక్కన టాప్ 10 తెలుగు సీరియల్స్ లో జీ తెలుగుకు చెందిన కేవలం రెండు సీరియల్స్ మాత్రమే చోటు దక్కించుకున్నాయి. అది కూడా చివరి రెండు స్థానాల్లోనే. ఇక పడమటి సంధ్యారాగం 5.78, జగద్ధాత్రి 5.33, లక్ష్మీ నివాసం 4.71 రేటింగ్స్ సాధించాయి.

మొత్తంగా చూస్తే అటు స్టార్ మా సీరియల్స్, ఇటు జీ తెలుగు.. రెండు ఛానెల్స్ కు చెందిన సీరియల్స్ క్రమంగా తమ టీఆర్పీ రేటింగ్స్ కోల్పోతున్నట్లు స్పష్టంగా కనిపిస్తోంది.