గోవాలో కురుస్తున్న భారీ వర్షాల కారణంగా విమానాల రాకపోకలపై ప్రభావం ఉంటుందని ఇండిగో ఎయిర్‌లైన్స్ బుధవారం ప్రయాణికులను హెచ్చరించింది. దీనివల్ల విమానాలు ఆలస్యం కావచ్చు లేదా రద్దు కావచ్చని సూచించింది.

ఎక్స్ (గతంలో ట్విట్టర్)లో ఇండిగో పోస్ట్ చేస్తూ, “#6ETravelAdvisory: #గోవాలో వర్షాలు కురుస్తున్నాయి. ఇది విమాన కార్యకలాపాలను ప్రభావితం చేయవచ్చు. తాజా సమాచారం కోసం ఇండిగో ఎయర్ లైన్స్ వెబ్ సైట్ ద్వారా మీ విమానం స్థితిని తెలుసుకోండి” అని చెప్పింది.

“వాతావరణం సరిగా లేకపోవడం, గోవాలో వర్షాల కారణంగా, విమాన కార్యకలాపాలు ఆలస్యం కావొచ్చు లేదా అంతరాయం కలగవచ్చు” అని ఎయిర్‌లైన్ తెలిపింది.

విమానాశ్రయానికి బయలుదేరే ముందు ప్రయాణికులు తమ విమానం స్థితిని చెక్ చేసుకోవాలని సూచించారు. “వాతావరణ పరిస్థితులు స్థానిక ట్రాఫిక్‌ను కూడా ప్రభావితం చేయవచ్చు కాబట్టి, విమానాశ్రయానికి బయలుదేరే ముందు అందరు ప్రయాణికులు తమ విమాన సమయం తాజా స్థితిని తనిఖీ చేయాలని, అదనపు ప్రయాణ సమయాన్ని కేటాయించాలని మేం గట్టిగా సిఫార్సు చేస్తున్నాం” అని ఇండిగో పేర్కొంది.

తమ కస్టమర్ సర్వీస్ బృందాలు ప్రయాణికులకు సహాయం చేయడానికి అందుబాటులో ఉన్నాయని ఎయిర్‌లైన్ తెలిపింది. “మా బృందాలు అన్ని కస్టమర్ సర్వీస్ పాయింట్ల వద్ద అందుబాటులో ఉంటాయి. మీ ప్రయాణంలో ప్రతి అడుగులోనూ మీకు సహాయం చేయడానికి కట్టుబడి ఉన్నాం” అని తెలిపింది.

క్లిష్టమైన వాతావరణ పరిస్థితులు ఉన్నప్పటికీ, ప్రయాణికులకు సహాయం చేయడానికి, సున్నితమైన ప్రయాణ అనుభవాన్ని అందించడానికి కట్టుబడి ఉన్నామని భరోసా ఇచ్చింది.

ఐఎండీ ప్రకటన ఇదీ

ఉత్తర గోవా, దక్షిణ గోవాలోని కొన్ని ప్రాంతాల్లో ఈరోజు తేలికపాటి ఉరుములతో కూడిన గాలి, 30-40 కి.మీ వేగంతో వీచే గాలులతో కూడిన తేలికపాటి నుండి మధ్యస్థ వర్షపాతం కొనసాగే అవకాశం ఉందని వాతావరణ శాఖ హెచ్చరించింది.

ఐఎండి గోవా స్టేషన్ ఇన్‌ఛార్జ్ ఎన్.పి. కులకర్ణి మాట్లాడుతూ, “మేము రెండు రోజుల పాటు ఆరెంజ్ హెచ్చరికను ఇచ్చాం. ఆ తర్వాత ఎల్లో అలెర్ట్‌కు మారుస్తున్నాం. ఈరోజు, రేపు భారీ నుండి అతి భారీ వర్షపాతం ఉంటుందని అంచనా వేశాం. మేము సమాచారాన్ని అప్‌డేట్ చేస్తూనే ఉంటాం. నిన్న, దక్షిణ గోవాలో సుమారు 70 మిమీ వర్షపాతం నమోదైంది. మొన్న కూడా దాదాపు అంతే వర్షపాతం నమోదైంది. ఇవన్నీ రుతుపవనాలకు ముందు వాతావరణ సంకేతాలు. రేపు భారీ నుండి అతి భారీ వర్షం కురుస్తుంది” అని అన్నారు