8వ పే కమీషన్​ అప్డేట్స్​పై కేంద్ర ప్రభుత్వ ఉద్యోగులు ఉత్కంఠగా ఎదురుచూస్తున్నారు. ఉద్యోగుల జీతాలు, రిటైర్​ అయిన వారి పెన్షన్​ని సవరించేందుకు 8వ వేతన సంఘం కమిటీ తర్వలోనే ఏర్పడనుంది. అయితే, జీతాలు, పెన్షన్​ల విషయంలో కీలకమైన ఫిట్​మెంట్​ ఫ్యాక్టర్​పై సర్వత్రా చర్చలు జరుగుతున్నాయి. ఈ ఫిట్​మెంట్​ ఫ్యాక్టర్​ ఈసారి 2.86x వరకు పెరిగే అవకాశం ఉందని వార్తలు వస్తున్నాయి. ఇదే నిజమైతే.. ఉద్యోగుల బేసిక్​ పే 186శాతం పెరిగే అవకాశం ఉందని నిపుణులు చెబుతున్నారు.

8వ వేతన సంఘం- ఫిట్​మెంట్​ ఫ్యాక్టర్​ అంటే ఏంటి? ఎలా నిర్ణయిస్తారు?

ప్రభుత్వ ఉద్యోగుల శాలరీ, పెన్షన్​ని లెక్కించేందుకు ఉపయోగించేదే ఈ ఫిట్​మెంట్​ ఫ్యాక్టర్​. ద్రవ్యోల్బణం, ఉద్యోగుల అవసరాలు, ప్రభుత్వ ఆర్థిక సామర్థ్యం వంటి వాటిని పరిగణలోకి తీసుకుని 8వ వేతన సంఘం సిఫార్సుల్లో దీనిని నిర్ణయిస్తారు.

గత వేతన సంఘాల్లో ఫిట్​మెంట్​ ఫ్యాక్టర్​ ఎలా ఉంది?

ప్రభుత్వ ఉద్యోగులకు ప్రతి 10ఏళ్లకు ఒకసారి వేతన సంఘాలు జీతాలు పెంచుతుంటాయి. 2006లో 6వ పే కమిషన్​, 2016లో 7వ పే కమిషన్​లు ఏర్పడ్డాయి. వాటి ద్వారా బేసిక్​ పే, అలొవెన్స్​లు గణనీయంగా పెరిగాయి. 6వ పేకమిషన్​లో భాగంగా కేంద్ర ప్రభుత్వ ఉద్యోగుల మినిమమ్​ బేసిక్​ శాలరీ రూ. 2,750 నుంచి రూ. 7000కు, 7వ వేతన సంఘం వల్ల రూ. 7వేల నుంచి రూ. 18వేలకు పెరిగాయి.

ఈసారి ఫిట్​మెంట్​ ఫ్యాక్టర్​ ఎంత ఉండొచ్చు? జీతాలు ఎంత పెరగొచ్చు?

8వ పే కమీషన్​లో ఫిట్​మెంట్​ ఫ్యాక్టర్​పై ఇంకా ఎలాంటి అధికారిక ప్రకటన రాలేదు. కానీ ఈసారి ఫిట్​మెంట్​ ఫ్యాక్టర్​ 2.6 నుంచి 2.86 మధ్యలో ఉండొచ్చను ఊహాగానాలు బయటకు వచ్చాయి. ఇదే జరిగితే.. ప్రభుత్వ ఉద్యోగుల కనీస బేసిక్​ శాలరీ మూడు రెట్లు పెరగొచ్చు!

ఉదాహరణకు బేసిక్​ పే (నెలకు) రూ. 18000 ఉంటే, ఫిట్​మెంట్​ ఫ్యాక్టర్​ 2.86గా ఉంటే. సవరించిన బేసిక్​ పే రూ. 51,480 అవుతుంది! (18,000x 2.86)

అదే విధంగా బేసిక్​ పే రూ. 20వేలు ఉంటే.. సరించిన బేసిక్​ పే రూ. 57,200 (రూ. 20000×2.86) అవుతుంది.

ఇది 186శాతం వృద్ధి! ఫలితంగా 8వ వేతన సంఘం ద్వారా ప్రభుత్వ ఉద్యోగుల టేక్​ హోం శాలరీ గణనీయంగా పెరుగుతుంది.

2025 జనవరిలో 8వ పే కమిషన్​ని ప్రభుత్వ అధికారికంగా ప్రకటించింది. ఈ కమిటీ.. తన సిఫార్సులను వచ్చే ఏడాది తొలినాళ్లల్లో ప్రభుత్వానికి అందించే అవకాశం ఉంది. 2026 జనవరి 1 నాటికి ఈ 8వ పే కమిషన్​ సిఫార్సులు అమల్లోకి రావాల్సి ఉంది. దీని ద్వారా 50 లక్షల మంది ప్రభుత్వ ఉద్యోగులు, 65 లక్షలు పింఛనుదారులు లబ్దిపొందనున్నారు.