అమెరికాలోని భారతీయ విద్యార్థులతో పాటు అంతర్జాతీయ స్టూడెంట్స్​కి డొనాల్డ్​ ట్రంప్​ యంత్రాంగం మరో షాక్​ ఇచ్చింది! యూనివర్సిటీల్లో క్లాస్​లకు వెళ్లకపోతే వీసా రద్దు చేస్తామని, భవిష్యత్తులో మళ్లీ యూఎస్​ వీసాకు అప్లై చేయనివ్వమని అధికారులు వార్నింగ్​ ఇచ్చారు.

అలా చేస్తే యూఎస్​ స్టూడెంట్​ వీసా రద్దు..

“డ్రాపౌట్​ అయినా, క్లాస్​లు స్కిప్​ చేసినా, యూనివర్సిటీకి చెప్పకుండా స్టడీ ప్రోగ్రామ్​ని మధ్యలో వదిలేసినా మీ స్టూడెంట్​ వీసాను రద్దు చేస్తాము. భవిష్యత్తులో యూఎస్​ వీసా అప్లికేషన్​కి మీరు అర్హతను కూడా కోల్పోవచ్చు. వీసా నిబంధనలకు కట్టుబడి ఉండి, సమస్యలు రాకుండా చూసుకోండి,” అని భారత్​లోని యూఎస్​ ఎంబసీ నుంచి వచ్చిన అధికారిక ప్రకటన పేర్కొంది. ఈ మేరకు ఎక్స్​లో ఒక ట్వీట్​ కనిపించింది. ఈ ట్వీట్​ని ముంబై, చెన్నై, హైదరాబాద్​ కోల్​కతాలోని యూఎస్​ కాన్సులేట్స్​ రీట్వీట్​ చేశాయి.

ఈ వ్యవహారంపై మరిన్ని వివరాలు తెలియాల్సి ఉంది. ఈ విషయంలో అమెరికా యంత్రాంగం ఎంత కఠినంగా ఉంటుందనేది రానున్న రోజుల్లో తెలుస్తుంది.

అసలెలాంటీ ముందస్తు హెచ్చరికలు ఇవ్వకుండా, ఉన్నపళంగా స్టూడెంట్​ వీసాలను అమెరికా ప్రభుత్వం రద్దు చేస్తున్న ఈ సమయంలో, కొత్త ప్రకటన భారతీయ విద్యార్థులను మరింత ఆందోళనకు గురిచేస్తోంది. పాలస్తీనా అనుకూల నిరసనల నుంచి ట్రాఫిక్​ ఉల్లంఘనల వరకు ఏదో ఒక కారణం చెప్పి వీసాలు రద్దు చేస్తోంది ట్రంప్​ యంత్రాంగం. దీని వల్ల విద్యార్థులు లీగల్​గా పోరాటం చేయాల్సి వచ్చి మానసిక క్షోభకు గురవుతున్నారు.

అంతర్జాతీయ విద్యార్థుల సమాచారం కోసం డీపార్ట్​మెంట్​ ఆఫ్​ హోంలాండ్​ సెక్యూరిటీస్​లో ఎస్​ఈవీఐఎస్​ అనే సిస్టెమ్​ ఉంటుంది. ఇదొక వెబ్​ ఆధారిత ప్లాట్​ఫామ్​. ఇటీవలి కాలంలో చాలా మంది విద్యార్థుల పేర్లు ఇందులో నుంచి మాయమైపోతున్నాయి. ఈ విషయం విద్యార్థులకే కాదు, యూనివర్సిటీలకు కూడా తెలియడం లేదు.

వీటన్నింటి మధ్య అమెరికాలో చదువుకున్న భారతీయ విద్యార్థులు, ఇతర దేశాల స్టూడెంట్స్​కి మరో భయం పట్టుకుంది. గ్యాడ్యుయేషన్​ తర్వాత అమెరికాలో ఉద్యోగం చేసేందుకు అనుమతినిచ్చే ఓపీటీ (ఆప్షనల్​ ప్రాక్టికల్​ ట్రైనింగ్​)ని ట్రంప్​ ప్రభుత్వం రద్దు చేస్తుందేమో అని సర్వత్రా ఊహాగానాలు వినిపిస్తున్నాయి. ఇందుకు సంబంధించి అమెరికా చట్ట సభ్యులు ఇప్పటికే ఒక బిల్లును (ఫైర్​నెస్​ ఫర్​ హై స్కీల్డ్​ అమెరికన్స్​ యాక్ట్​ 2025) ప్రవేశపెట్టారు.

ఓపీటీ, ఎస్​టీఈఓఎం ఓపీటీ ప్రోగ్రామ్స్​ని రద్దు చేస్తామని యూఎస్​సీఐఎస్​ (అమెరికా సిటిజెన్​షిప్​ అండ్​ ఇమ్మిగ్రేషన్​ సర్వీసెస్​) చీఫ్​ జోసెఫ్​ ఎడ్​లో మాటిమాటికి చెబుతూనే ఉంటున్నారు.