ముంబై: పొరుగు వ్యక్తిని కుక్క కరిచిన ఏడేళ్ల నాటి కేసులో ముంబైలోని దాదర్ మెట్రోపాలిటన్ మేజిస్ట్రేట్ కోర్టు సంచలన తీర్పు వెలువరించింది. ఈ కేసులో వర్లీకి చెందిన 40 ఏళ్ల రిషబ్ పటేల్‌కు నాలుగు నెలల జైలు శిక్ష, ₹4,000 జరిమానా విధించింది. 2018 ఫిబ్రవరి 1న జరిగిన ఈ ఘటనపై మే 21, 2025న కోర్టు తీర్పు వెలువరించింది.

అసలేం జరిగింది?

బాధితుడు రమిక్ షా తన కొడుకు, పనిమనిషితో కలిసి నాలుగో అంతస్తు నుంచి లిఫ్ట్‌లో కిందకు వస్తున్నారు. మూడో అంతస్తులో రిషబ్ పటేల్ తన కుక్కతో లిఫ్ట్ ఎక్కాడు. తన కొడుకుకు కుక్కలంటే భయమని, కుక్కను బయట ఉంచమని లేదా తాము లిఫ్ట్ దిగిపోతామని షా పటేల్‌ను కోరాడు. అయితే, పటేల్ తన కుక్కను లిఫ్ట్‌లోకి లాగడంతో ఇద్దరి మధ్య వాగ్వాదం జరిగింది. ఈ క్రమంలో కుక్క షా ఎడమ చేతిని కరిచింది. చికిత్స అనంతరం షా వర్లీ పోలీసులకు ఫిర్యాదు చేశాడు.

పోలీసుల దర్యాప్తు, కోర్టు తీర్పు

వర్లీ పోలీసులు రిషబ్ పటేల్‌పై ఎఫ్‌ఐఆర్ నమోదు చేసి కోర్టులో హాజరుపరిచారు. విచారణ సందర్భంగా పటేల్ తరఫు న్యాయవాది తన క్లయింట్‌పై తప్పుడు ఆరోపణలు చేశారని, సీసీటీవీ ఫుటేజ్ సేకరించడంలో జాప్యం జరిగిందని వాదించారు. అయితే, కోర్టు ఈ వాదనలను తోసిపుచ్చి, పటేల్‌ను దోషిగా నిర్ధారించింది.

అందుబాటులో ఉన్న సాక్ష్యాధారాల ఆధారంగా, పటేల్ షా అభ్యర్థనను పట్టించుకోలేదని, మానవ ప్రాణాలకు ఎటువంటి ప్రమాదం జరగకుండా తన పెంపుడు కుక్కకు ఆదేశాలు ఇవ్వకుండా ఉద్దేశపూర్వకంగా విడిచిపెట్టాడని కోర్టు పేర్కొంది.

బాధితుడి ఏడాది కుమారుడు లిఫ్ట్‌లో ఉన్నాడని ప్రస్తావించింది. “అతను ఫిర్యాదుదారుడిని లేదా అతని కొడుకును పట్టించుకోకుండా, సాధారణంగా మనుషులు ఉపయోగించే లిఫ్ట్‌లోకి తన పెంపుడు జంతువును తెచ్చాడు” అని జ్యుడిషియల్ మేజిస్ట్రేట్ ఆఫ్ ఫస్ట్ క్లాస్ ప్రస్తావించారు. బాధితుడు శారీరకంగా, మానసికంగా బాధపడి ఉండవచ్చని కోర్టు అభిప్రాయపడింది.