ఏపీలో నైరుతి రుతుపవనాలు పూర్తిస్థాయిలో విస్తరించటంతో విస్తారంగా వర్షాలు కురుస్తున్నాయి. మరో మూజు రోజులపాటు కూడా వానలు కురుస్తాయని అమరావతి వాతావరణ కేంద్రం తాజా బులెటిన్ లో పేర్కొంది. కొన్నిచోట్ల భారీ వర్షాలు కురిసే అవకాశం ఉండగా… మరికొన్ని ప్రాంతాల్లో తేలికపాటి వర్షాలు పడొచ్చని అంచనా వేసింది.

మరో 3 రోజులు వర్షాలు…

• అమరావతి వాతావరణ కేంద్రం తాజా బులెటిన్ వివరాల ప్రకారం…..ఉత్తర కోస్తాలో ఇవాళ కొన్నిచోట్ల భారీ వర్షాలు పడొచ్చు. మరికొన్ని ప్రాంతాల్లో తేలికపాటి నుంచి ఒక మోస్తారు వర్షాలు లేదా ఉరుములతో కూడిన జల్లులు పడుతాయి. రేపు, ఎల్లుండి తేలికపాటి నుంచి ఒక మోస్తారు వర్షాలు కురిసే అవకాశం ఉంది.
• దక్షిణ కోస్తాలో ఇవాళ కొన్ని ప్రాంతాల్లో భారీ వర్షాలు కురిసే అవకాశం ఉంది. మరికొన్నిచోట్ల 40- 50 కి.మీ వేగంతో ఈదురుగాలులు వీస్తాయి. మిగతా చోట్ల తేలికపాటి వర్షాలు పడొచ్చు. రేపు, ఎల్లుండి కూడా ఇదే మాదిరి పరిస్థితులు ఉంటాయి.
• రాయలసీమలో చూస్తే… ఇవాళ మోస్తారు వర్షాలు పడొచ్చు. రేపు, ఎల్లుండి కొన్ని ప్రాంతాల్లోబలమైన ఈదురుగాలులు వీచే అవకాశం ఉంది. ఇంకొన్నిచోట్ల ఉరుములు, మెరుపులతో కూడిన వర్షాలు పడుతాయి.

ఏపీ విపత్తుల నిర్వహణ సంస్థ పేర్కొన్న వివరాల ప్రకారం… ఇవాళ శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు, విశాఖ, అనకాపల్లి, కాకినాడ, డా.బి.ఆర్‌.అంబేడ్కర్‌ కోనసీమ, తూర్పు గోదావరి, పశ్చిమ గోదావరి, ఏలూరు, కృష్ణా, ఎన్టీఆర్, బాపట్ల, పల్నాడు, ప్రకాశం, నెల్లూరు, నంద్యాల, వైఎస్సార్‌ కడప, తిరుపతి జిల్లాల్లో అక్కడక్కడ తేలికపాటి నుంచి ఓ మోస్తరు వర్షాలు కురుస్తాయి.

తెలంగాణలోనూ వర్షాలు:

ఇవాళ తెలంగాణలోని కొన్ని ప్రాంతాల్లో తేలికపాటి నుంచి ఒక మోస్తారు వర్షాలు కురిసే అవకాశం ఉంది. రేపు (మే 31) ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, సిరిసిల్ల, కరీంనగర్, పెద్దపల్లి, భూపాలపల్లి, ములుగు, భువనగిరి, రంగారెడ్డి, హైదరాబాద్, మేడ్చల్, వికారాబాద్, సంగారెడ్డి, మహబూబ్ నగర్, నాగర్ కర్నూల్, వనపర్తి, నారాయణపేట, గద్వాల జిల్లాల్లో ఈదురుగాలులతో కూడిన వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది. ఈ జిల్లాలకు ఎల్లో హెచ్చరికలు జారీ అయ్యాయి.