థాయ్​లాండ్​కి చెందిన ఒళ్లు గగుర్పొడిచే వీడియో ఒకటి సోషల్​ మీడియాలో తాజాగా వైరల్​ అయ్యింది. ఓ యానిమల్​ పార్కులోని ఓ పులి.. ఓ టూరిస్ట్​పై అకస్మాత్తుగా దాడి చేసింది. పులితో అతను సెల్ఫీ దిగేందుకు ప్రయత్నిస్తున్న సమయంలో ఈ ఘటన జరిగింది. ఈ వీడియోని చూసిన వారందరు షాక్​ అవుతున్నారు. అటవీ జంతువులతో ఇలాంటి పనులు చేస్తే ప్రమాదం తప్పదని హెచ్చరిస్తున్నారు.

టూరిస్ట్​పై పులి దాడి..

ఎక్స్ (గతంలో ట్విట్టర్) లో ప్రత్యక్షమైన ఈ వీడియోలో ఒక భారతీయ టూరిస్ట్​, ఒక పులి, కర్ర పట్టుకున్న ఒక గైడ్​ కనిపిస్తున్నారు. ఆ టూరిస్ట్ మోకరిల్లి పులిని పెట్​ చేస్తూ ఫోటోకు ఫోజులు ఇవ్వడం మొదలుపెట్టాడు. కానీ అప్పటివరకు ప్రశాంతంగా ఉన్న ఆ పులు.. అకస్మాత్తుగా అతనిపై దాడికి దిగింది. ఇదంతా వీడియోలో రికార్డు అయ్యింది. ఆ వెంటనే వీడియో కట్​ అయ్యింది కానీ, బాక్​గ్రౌండ్​లో టూరిస్ట్​ అరుపులు వినొచ్చు. ఒళ్లు గగుర్పొడిచే ఈ వీడియో, ఆడియోతో భయపడటం ఖాయం!

“థాయ్​లాండ్​లో ఓ భారతీయుడిపై పులి దాడి చేసింది. పులులను పెంపుడు జంతువుల్లా పెంచుకునే ప్రదేశాల్లో ఇదొకటి. ప్రజలు సెల్ఫీలు తీసుకోవచ్చు, వాటికి ఆహారం ఇవ్వవచ్చు,” ఎక్స్​ పోస్ట్​ కింద క్యాప్షన్​లో రాసి ఉంది.

పులి దాడి తర్వాత ఆ వ్యక్తి పరిస్థితి ఎలా ఉంది? అనేది తెలియరాలేదు. కాగా ఈ వీడియో ఇలాంటి వన్యప్రాణుల పర్యాటక ప్రదేశాల గురించి తీవ్రమైన ఆందోళనలను రేకెత్తించింది.

సోషల్​ మీడియాలో వైరల్​గా మారిన దృశ్యాలను ఇక్కడ చూడండి :

ఈ ప్రదేశం ఫుకెట్​లోని టైగర్ కింగ్ డమ్​ అని తెలుస్తోంది. థాయ్​లాండ్​లోని ప్రసిద్ధ పర్యాటక ఆకర్షణ ఇది. ఇక్కడ సందర్శకులను పులులతో సన్నిహితంగా ఉండటానికి అనుమతిస్తారు. వీటిలో ఆహారం, నడక, సెల్ఫీలకు కూడా పోజులివ్వడం వంటివి ఉంటాయి.

ఈ ఘటనపై పలువురు కామెంట్స్ విభాగంలో తమ ఆందోళనను వ్యక్తం చేశారు.

“క్యాట్స్​కి శరీరం వెనుక భాగం, మరీ ముఖ్యంగా బట్​ దగ్గర పెట్​ చేస్తే నచ్చదు. ఈ వ్యక్తి పులిని అదే చోట నిరంతరం పెట్​ చేశాడు. ఇది పులికి చిరాకు తెప్పించుండొచ్చు. అంత చిరాకులో ఉన్న పులితో సెల్ఫీ దిగాలని ప్రయత్నించినప్పుడు ఇలా జరిగి ఉండొచ్చు,” అని ఒక నెటిజన్​ కామెంట్​ చేశారు.

“ఈ వీడియోకు నా తక్షణ ప్రతిస్పందన ఒక భయంకరమైన సాక్షాత్కారం. అది నేను కావచ్చు! ఈ భయానక వీడియో ఒక ప్రమాదకరమైన ధోరణిని బహిర్గతం చేస్తుంది. చాలా మంది భారతీయ పర్యాటకులు థాయ్​లాండ్​లో పులులతో ప్రమాదకరమైన విధంగా ఫొటోలు దిగాలని చూస్తుంటారు. ఈ క్రూరమృగాలు ఇలా కనిపించడానికి భారీగా మత్తుమందు ఇస్తారు. కానీ వాటి నిజస్వరూపాన్ని మచ్చిక చేసుకోలేరు. మత్తు మసకబారినప్పుడు, పులి హింసాత్మకంగా మారుతుంది. తీవ్రమైన ముప్పును కలిగిస్తుంది,” అని మరొకరు పేర్కొన్నారు.

ఓ యూజర్ కామెంట్ చేస్తూ.. ‘గతంలో నేను ఈ ప్రదేశానికి వెళ్లాను. ఫుకెట్​లోని టైగర్​ కింగ్​డమ్​ ఇది. ప్రజలపై దాడి చేయకుండా ఉండేందుకు పులులకు మత్తుమందు ఇస్తారు. ఇలా జరుగుతుందేమోనని ఎప్పుడూ భయపడతాను,” అని ఇంకొకరు అన్నారు.

ఈ సంఘటన జరిగిన ప్రదేశాన్ని హెచ్​టీ తెలుగు, HT.com స్వతంత్రంగా ధృవీకరించలేదు.