సూపర్ స్టార్ మహేశ్ బాబు హీరోగా నటించిన ఖలేజా సినిమాకు ఓ రేంజ్‌‍లో క్రేజ్ ఉంది. మాటల మాంత్రికుడు త్రివిక్రమ్ శ్రీనివాస్ దర్శకత్వం వహించిన ఈ యాక్షన్ కామెడీ చిత్రం 2010 అక్టోబర్‌లో రిలీజైంది. అప్పట్లో మిక్స్డ్ టాక్‍తో ఈ చిత్రం ప్లాఫ్ అయింది. ఆ తర్వాత టీవీల్లో వందలసార్లు ప్రసారమైనా ఈ సినిమా టీఆర్పీల్లో అదరగొట్టింది. కల్ట్ ఫాలోయింగ్ దక్కించుకుంది. అంతటి హైప్ సాధించిన ఖలేజా సుమారు పద్నాలుగున్నరేళ్ల తర్వాత ఈ శుక్రవారం (మే 30) థియేటర్లలో మళ్లీ రీ-రిలీజైంది. తొలి రోజే సూపర్ కలెక్షన్లతో దుమ్మురేపింది.

ఖలేజా రీ-రిలీజ్ ఫస్ట్ డే కలెక్షన్లు

ఖలేజా సినిమా రీ-రిలీజ్‍లో తొలి రోజు ఏకంగా రూ.6.5 కోట్ల గ్రాస్ కలెక్షన్లను దక్కించుకుంది. ఈ చిత్రం రీ-రిలీజ్‍కు ఫుల్ బజ్ కనిపించింది. బుకింగ్స్ జోరుగా జరిగాయి. అభిమానులు థియేటర్లలో ఫుల్ హంగామా చేశారు. అందుకు తగ్గట్టే రీ-రిలీజ్‍లో ఫస్ట్ డే కలెక్షన్లలో కుమ్మేసింది ఖలేజా.

గబ్బర్ సింగ్ తర్వాతి ప్లేస్‍లో..

తెలుగు రీ-రిలీజ్ సినిమాల్లో తొలి రోజు అత్యధిక కలెక్షన్లు సాధించిన మూవీగా పవన్ కల్యాణ్ ‘గబ్బర్ సింగ్’ ఉంది. గతేడాది ఈ చిత్రం రీ-రిలీజై ఫస్ట్ డే సుమారు రూ.8కోట్ల గ్రాస్ సొంతం చేసుకుంది. ఇప్పుడు ఖలేజా ఫస్ట్ డే రూ.6.5 కోట్లను దక్కించుకొని రీ-రిలీజ్ బిగ్గెస్ట్ ఓపెనింగ్ జాబితాలో రెండో స్థానానికి దూసుకొచ్చింది. గబ్బర్ సింగ్ గతేడాది పవన్ కల్యాణ్ పుట్టిన రోజు సందర్భంగా రీ-రిలీజైంది. ఇప్పుడు ఖలేజా మాత్రం బర్త్ డే సహా ఎలాంటి స్పెషల్ రోజు లేకుండా రీ-రిలీజై కూడా ఆ స్థాయిలో ఫస్ట్ డే కలెక్షన్లు సాధించి సత్తాచాటింది.

టాలీవుడ్ రీ-రిలీజ్‍ల్లో తొలి రోజు రూ.5కోట్లకుపైగా కలెక్షన్లు సాధించిన మూడు చిత్రాలు మహేష్ బాబువి ఉన్నాయి. మురారి, బిజినెస్‍మ్యాన్ ఫస్ట్ డే రూ.5కోట్లకు పైగా దక్కించుకోగా.. ఇప్పుడు ఖలేజా కూడా ఆ మార్క్ దాటేసింది. రీ-రిలీజ్ ఫస్ట్ డే అత్యథిక కలెక్షన్ల జాబితాలో గబ్బర్ సింగ్ తర్వాతి మూడు సినిమాలు మహేశ్‍వే.

ఖలేజా గురించి..

ఖలేజా చిత్రం ఫస్ట్ రిలీజైనప్పుడు ప్లాఫ్‍గా నిలిచింది. మహేశ్, అనుష్క శెట్టి హీరోహీరోయిన్లుగా నటించిన ఈ మూవీ 2010 అక్టోబర్ 7వ తేదీన విడుదలైంది. సుమారు రూ.35కోట్ల బడ్జెట్‍తో రూపొందిన ఈ మూవీ రూ.20కోట్ల కలెక్షన్ల మార్క్ కూడా దాటలేకపోయింది. త్రివిక్రమ్ శ్రీనివాస్ తెరకెక్కించిన ఈ సినిమా కమర్షియల్‍గా డిజాస్టర్ అయింది.

టీవీల్లోకి వచ్చాక ఖలేజా సినిమాకు ఎనలేని క్రేజ్ వచ్చింది. మహేశ్ బాబు కామెడీ టైమింగ్, డిఫరెంట్ బాడీ లాంగ్వేజ్, సినిమా కాన్సెప్ట్, త్రివిక్రమ్ టేకింగ్ జనాలకు బాగా ఎక్కేసింది. మణిశర్మ మ్యూజిక్ కూడా ఈ మూవీకి మరో హైలైట్. ఈ చిత్రంలో సునీల్, ప్రకాశ్ రాజ్, అలీ, బ్రహ్మానందం కీలకపాత్రలు చేశారు. కనకరత్న మూవీస్ పతాకంపై ఈ చిత్రాన్ని సింగనమల రమేశ్ బాబు, సి.కల్యాణ్, సత్యరామ మూర్తి ప్రొడ్యూజ్ చేశారు.