కెనడాలో జరిగిన ఒక ఘటన ఇప్పుడు సోషల్​ మీడియాలో వైరల్​గా మారింది. ఓ వ్యక్తి రూ. 30కోట్లు విలువ చేసే లాటరీని దక్కించుకున్నాడు. అది తన గర్ల్​ఫ్రెండ్​ పేరు మీద మార్చాడు. ఆ తర్వాత, ఆమె కనిపించకుండా పోయింది. చివరికి, తన గర్ల్​ఫ్రెండ్​ని ఆమె లవర్​తో కలిసి బెడ్​ మీద చూశాడు ఆ కెనడా వ్యక్తి.

అసలేం జరిగిందంటే..

విన్నిపెగ్​కి చెందిన లారెన్స్​ క్యాంప్​బెల్​ 2024లో ఒక లాటరీ టికెట్​ కొన్నాడు. లాటరీ గెలిచాడు. అందులో భాగంగా అతనికి 5 మిలియన్ల కెనెడియన్​ డాలర్లు (సుమారు రూ. 30కోట్లు)లభించాయి. అయితే ఆ వ్యక్తికి సరైన ఐడీ లేదు. అందుకే సొంతంగా ప్రైజ్​ మనీని పొందలేకపోయాడు.

2024లో క్రిస్టల్​ ఆనా మెక్​కే అనే మహిళతో క్యాంప్​బెల్​ రొమాంటిక్​ రిలేషన్​లో ఉన్నాడు. ఆమె చాలా లాయల్​ అని, నమ్మకస్తురాలని విశ్వసించాడు.

ప్రైజ్​ మనీ తనకు రావడం లేదని, ఏదైనా సలహా ఇవ్వమని లాటరీ అధికారులను క్యాంప్​బెల్​ అడిగాడు. క్యాంప్​బెల్ తరపున అతని​ గర్ల్​ఫ్రెండ్​ క్రిస్టల్​ ప్రైజ్​ మనీని తీసుకోవాలని సలహా ఇచ్చారు.

క్యాంప్​బెల్​కి బ్యాంక్​ అకౌంట్​ కూడా లేదట! ఫలితంగా ఆ రూ. 30కోట్లను క్రిస్టల్​ తన బ్యాంక్​ అకౌంట్​లో వేసుకుంది. దీనికి క్యాంప్​బెల్​ కూడా ఒప్పుకున్నాడు.

తొలుత అంతా బాగానే ఉంది. పెద్ద సైజు చెక్​తో ఇద్దరు కలిసి ఫొటోలు కూడా దిగారు. “క్రిస్టల్​కి క్యాంప్​బెల్​ ఇస్తున్న బర్త్​డే గిఫ్ట్​ ” అని క్యాంప్​బెల్​ చెప్పుకొచ్చాడు.

కానీ కొంత కాలానికి క్రిస్టల్ అనుమానాస్పదంగా ప్రవర్తించడం మొదలుపెట్టిందని క్యాంప్​బెల్​ ఆరోపించాడు.

“ఇద్దరం ఒక హోటల్​లో కలిసుండేవాళ్లం. కానీ డబ్బులు పడిన కొన్ని రోజుల తర్వాత క్రిస్టల్​ రూమ్​కి రాలేదు. నా ఫోన్​ కాల్స్​ ఎత్తలేదు. ఆమెను నేను ట్రాక్​ చేసుకుంటూ వెళ్లా. చివరికి ఆమె ఒక వ్యక్తితో మంచం మీద నాకు కనిపించింది,” అని క్యాంప్​బెల్​ చెప్పుకొచ్చాడు.

క్రిస్టల్​ తనని మోసం చేసిందని భావించిన క్యాంప్​బెల్​ కోర్టులో కేసు వేశాడు.

“క్యాంప్​బెల్​ని ఆమె ఒత్తిడికి గురుచేసింది. ఫోన్స్​ ఎత్తలేదు. సోషల్​ మీడియా అకౌంట్స్​లో బ్లాక్​ చేసింది, ప్రొటెక్షన్​ ఆర్డర్​ కూడా తీసుకుంది,” అని క్యాంప్​బెల్​ తరపు న్యాయవాది మీడియాకు వివరించారు.

అంతేకాదు సంబంధిత లాటరీ అధికారులపైనా క్యాంప్​బెల్​ కేసు వేశాడు. తన లాటరీని వేరొకరికి ఇవ్వాలన్న చెత్త ఐడియా ఇచ్చారని, అలా ఇస్తే వచ్చే నష్టం గురించి తనకు చెప్పలేదని క్యాంప్​బెల్​ తన పిటిషన్​లో పేర్కొన్నాడు.

ఈ పూర్తి వ్యవహారంపై క్రిస్టల్​ స్పందించింది. క్యాంప్​బెల్​ చెబుతున్నవన్నీ తప్పని పేర్కొంది.