బాలీవుడ్ లో విషాదం అలుముకుంది. సీరియల్స్, సినిమాల్లో తన యాక్టింగ్ తో మెప్పించిన యువ నటుడు విభు రాఘవ్ కన్ను మూశారు. క్యాన్సర్ తో సోమవారం (జూన్ 2) తుదిశ్వాస విడిచారు. ‘నిషా ఔర్ ఉస్కే కజిన్స్’ టీవీ సీరియల్ తో విభు రాఘవ్ పాపులర్ అయ్యారు. దీర్ఘ కాలంగా నాలుగో దశ పెద్ద పేగు క్యాన్సర్ తో పోరాడి విభు మరణించారు.

2022లో క్యాన్సర్

విభు రాఘవ్ అసలు పేరు.. వైభవ్ కుమార్ సింగ్ రాఘవ్. ఈ యువ నటుడు ముంబైలో తుది శ్వాస విడిచారు. జూన్ 2న ఆయన మరణించారు. ముంబై నానావతి ఆసుపత్రిలో ఆయన చికిత్స పొందేవారు. విభుకు 2022లో పెద్దపేగు క్యాన్సర్‌ని నిర్ధారించారు. ఆయన మరణ వార్తను విభు ఫ్రెండ్స్ అదితి మాలిక్, సౌమ్య టాండన్ ధృవీకరించారు.

ఎంతో మిస్ అవుతాం

అదితి మాలిక్ తన ఇన్‌స్టాగ్రామ్ స్టోరీలో భావోద్వేగంతో కూడిన నోట్ ద్వారా అంత్యక్రియల వివరాలను పంచుకుంది. ఆ నోట్‌లో.. “అత్యంత స్వచ్ఛమైన ఆత్మ. బలం, పాజిటివిటీ కలిగిన వెలుగు. ఆయన నవ్వు ఏ గదినైనా వెలిగించగలదు. ఆయన ఉనికి మాత్రమే ప్రతిదీ మెరుగ్గా అనిపించేలా చేస్తుంది. ఆయన అసమానమైన అనుగ్రహంతో జీవితాన్ని ఎదుర్కొన్నాడు మరియు ఎప్పటికీ మసకబారని ప్రేమను వదిలి వెళ్లాడు. ఆయనను ఎల్లప్పుడూ ఎంతో మిస్ అవుతాం” అని అదితి రాసింది.

విభు అంతిమ దర్శనం ఈ రోజు (జూన్ 3) మధ్యాహ్నం 12:30 గంటల నుంచి జరుగుతుంది. అనంతరం మధ్యాహ్నం 1 గంట నుంచి అంత్యక్రియలు జరుగుతాయి. చిరునామా.. 11, రిలీఫ్ రోడ్, ప్రకాశ్ నగర్, ధన్యేశ్వర్ నగర్, జోగేశ్వరి వెస్ట్, ముంబై అని ఆ పోస్ట్ లో అదితి అడ్రస్ షేర్ చేసింది.

వాళ్ల సంతాపం

విభు మరో క్లోజ్ ఫ్రెండ్ సింపుల్ కౌల్ తన ఇన్‌స్టాగ్రామ్ స్టోరీలో ఒక చిత్రాన్ని పంచుకుంది. “నా ప్రియమైన స్నేహితుడా నిన్ను మిస్సవుతాం (హృదయం ఎమోజి). నీకు ప్రేమ కాంతి, సంతోషం” అని పోస్టు చేసింది. నటుడు కరణ్ వీర్ మెహ్రా “శాంతితో విశ్రమించు బ్రదర్ (పగిలిన హృదయం ఎమోజి) ఇంత త్వరగానా” అని రాశాడు.

ఆ సీరియల్ తో

విభు టెలివిజన్ పరిశ్రమలో ప్రసిద్ధి చెందిన వ్యక్తి. నిషా ఔర్ ఉస్కే కజిన్స్, సావ్ధాన్ ఇండియా వంటి షోలలో నటించి పేరు తెచ్చుకున్నారు. రిథమ్, పిచ్ఫార్క్, యాద్వి సినిమాల్లో చేశారు. 2022లో ఆయనకు పెద్దపేగు క్యాన్సర్‌ని నిర్ధారించారు. చికిత్స కొనసాగుతున్న సమయంలోనూ ఇన్‌స్టాగ్రామ్‌లో తన అభిమానులతో టచ్ లోనే ఉన్నాడు. విభూకు తల్లి, సోదరుడు, సోదరి ఉన్నారు.

క్రౌడ్ ఫండింగ్ తో

విభు క్యాన్సర్ ట్రీట్మెంట్ ఎంతో ఖర్చుతో కూడుకున్నది. అందుకే ఆయన చికిత్సకు నిధులు సేకరించడానికి సోషల్ మీడియాలో ఫ్రెండ్స్ రిక్వెస్ట్ చేశారు. మే 27న క్రౌడ్ ఫండింగ్ చేపట్టారు. ఇన్‌స్టాగ్రామ్‌లో ఒక నోట్‌లో, “హలో అందరికీ! మా స్నేహితుడు విభు నాలుగో దశ క్యాన్సర్‌తో నానావతి ఆసుపత్రిలో గత రెండు వారాలుగా పోరాడుతున్నాడు.ఆయనను కాపాడటానికి తక్షణమే డబ్బు అవసరం. మీరు సాయం చేయండి’’ అని విభు ఫ్రెండ్స్ రిక్వెస్ట్ చేశారు.