ఓటీటీలోకి ఈ వారం కొన్ని ఇంట్రెస్టింగ్ సినిమాలు, వెబ్ సిరీస్ అడుగుపెట్టబోతున్నాయి. ముఖ్యంగా మూడు సినిమాలు, ఓ వెబ్ సిరీస్ మాత్రం మిస్ కాకుండా చూడాల్సిందే. ఇవి జియోహాట్‌స్టార్, ఆహా వీడియో, సన్ నెక్ట్స్ లాంటి ఓటీటీ ప్లాట్‌ఫామ్స్ లో అందుబాటులో ఉన్నాయి. వీటి గురించి ఓసారి చూద్దాం.

టూరిస్ట్ ఫ్యామిలీ – జియోహాట్‌స్టార్

టూరిస్ట్ ఫ్యామిలీ మూవీ జియోహాట్‌స్టార్ ఓటీటీలోకి సోమవారం (జూన్ 2) స్ట్రీమింగ్ కు వచ్చింది. ఈ తమిళ కామెడీ మూవీ తెలుగులోనూ స్ట్రీమింగ్ అవుతోంది. శశి కుమార్, సిమ్రన్ లీడ్ రోల్స్ లో నటించిన ఈ మూవీ థియేటర్లలోనే కాదు.. ఓటీటీలోనూ సంచలనాలు సృష్టిస్తోంది. ఈ ఫ్యామిలీ ఎమోషనల్ డ్రామాను ప్రతి ఒక్కరూ కచ్చితంగా చూడాల్సిందే. శ్రీలంక నుంచి తమిళనాడులోని రామేశ్వరానికి అక్రమంగా శరణార్థులుగా వచ్చిన ఓ కుటుంబం చుట్టూ తిరిగే కథే ఈ టూరిస్ట్ ఫ్యామిలీ.

వడక్కన్ – ఆహా వీడియో ఓటీటీ

మలయాళ హారర్ థ్రిల్లర్ మూవీ వడక్కన్. ఎప్పుడూ మూడు నెలల కిందట థియేటర్లలో రిలీజైంది. ఆ తర్వాత గత నెలలోనే అమెజాన్ ప్రైమ్ వీడియోలో అడుగుపెట్టింది. అయితే కేవలం మలయాళం, కన్నడలాంటి భాషల్లోనే స్ట్రీమింగ్ అవుతోంది. అయితే ఈ శుక్రవారం (జూన్ 6) నుంచి ఆహా ఓటీటీలో తెలుగు, తమిళం భాషల్లోనూ అందుబాటులోకి రానుంది. అతీత శక్తుల గురించి శోధించే ఇద్దరు వ్యక్తులు కేరళలోని ఓ చోట జరిగిన కొన్ని అంతు చిక్కని మరణాల గురించి తెలుసుకోవడానికి వస్తారు. అక్కడ వాళ్లకు ఎలాంటి పరిస్థితి ఎదురైందన్నదే ఈ వడక్కన్ లో చూడొచ్చు.

లాల్ సలామ్ – సన్ నెక్ట్స్ ఓటీటీ

గతేడాది రజనీకాంత్ అతిథి పాత్రలో నటించిన మూవీ లాల్ సలామ్. ఈ సినిమా ఏడాది తర్వాత ఓటీటీలోకి వస్తోంది. శుక్రవారం (జూన్ 6) నుంచి సన్ నెక్ట్స్ ఓటీటీలో స్ట్రీమింగ్ కానుంది. ఇందులో మొయినుద్దీన్ అనే ఓ గ్యాంగ్‌స్టర్ పాత్రలో రజనీ నటించాడు. అయితే బాక్సాఫీస్ దగ్గర డిజాస్టర్ గా నిలిచిన మూవీ.. చాలా కాలం తర్వాత ఇప్పుడు డిజిటల్ ప్రీమియర్ కు సిద్ధమైంది.

దేవిక అండ్ డానీ వెబ్ సిరీస్ – జియోహాట్‌స్టార్

ఈ వారం తెలుగులో వస్తున్న మరో వెబ్ సిరీస్ దేవిక అండ్ డానీ. జియోహాట్‌స్టార్ ఓటీటీలో శుక్రవారం (జూన్ 6) నుంచి స్ట్రీమింగ్ కానుంది. రీతూ వర్మ లీడ్ రోల్లో నటించిన ఈ వెబ్ సిరీస్ ఆసక్తి రేపుతోంది. పెళ్లికి సిద్ధమైన దేవిక జీవితంలోకి డానీ అనే వ్యక్తి వచ్చిన తర్వాత మొత్తం కథ మలుపు తిరుగుతుంది. బి. కిశోర్ డైరెక్ట్ చేసిన ఈ రొమాంటిక్ థ్రిల్లర్ వెబ్ సిరీస్ ను కూడా ఈ వీకెండ్ లిస్ట్ లో చేర్చుకోవచ్చు.