కాఫీ మిమ్మల్ని మేల్కొని ఉంచడానికి సహాయపడుతుంది. కానీ మీరు నిద్రలోకి జారుకున్న తర్వాత కెఫీన్ నిజంగా మీ మెదడుపై ఏం చేస్తుంది? కృత్రిమ మేధస్సు (AI) సహాయంతో, పరిశోధకుల బృందం ఒక సమాధానాన్ని కనుగొంది. ఇది మెదడు “క్రెడికాలిటీ”ని ప్రభావితం చేస్తుందని తేల్చింది.

నేచర్ కమ్యూనికేషన్స్ బయాలజీలో ఏప్రిల్‌లో ప్రచురించిన ఒక అధ్యయనంలో, యూనివర్శిటీ డి మాంట్రియల్ పరిశోధకుల బృందం, కెఫీన్ నిద్రను ఎలా మారుస్తుందో, రాత్రిపూట మెదడు కోలుకోవడాన్ని – శారీరకంగా, మానసికంగా – ఎలా ప్రభావితం చేస్తుందో కొత్త విషయాలను వెల్లడించింది.

UdeMలోని కాగ్నిటివ్ అండ్ కంప్యూటేషనల్ న్యూరోసైన్స్ లాబొరేటరీ (CoCo ల్యాబ్)లో పరిశోధనా శిక్షణ పొందుతున్న ఫిలిప్ థోల్కే ఈ పరిశోధనకు నాయకత్వం వహించారు. ఈ ల్యాబ్ డైరెక్టర్, సైకాలజీ ప్రొఫెసర్, మిలా – క్యుబెక్ AI ఇన్‌స్టిట్యూట్‌లో పరిశోధకుడు కరీం జెర్బీ కూడా ఈ పరిశోధనకు సహ-నాయకత్వం వహించారు.

అధ్యయనంలో తేలిన విషయాలు:

UdeMలోని సెంటర్ ఫర్ అడ్వాన్స్‌డ్ రీసెర్చ్ ఇన్ స్లీప్ మెడిసిన్ డైరెక్టర్, స్లీప్-అండ్-ఏజింగ్ సైకాలజీ ప్రొఫెసర్ జూలీ క్యారియర్, ఆమె బృందంతో కలిసి, శాస్త్రవేత్తలు AI మరియు ఎలక్ట్రోఎన్సెఫలోగ్రఫీ (EEG)ని ఉపయోగించి నిద్రపై కెఫీన్ ప్రభావాన్ని అధ్యయనం చేశారు.

కెఫీన్ మెదడు సంకేతాల సంక్లిష్టతను పెంచుతుందని, నిద్రలో మెదడు “క్రెడికాలిటీ”ని మెరుగుపరుస్తుందని వారు మొదటిసారి చూపించారు. ఆసక్తికరంగా, ఇది యువకులలో మరింత స్పష్టంగా కనిపించింది.

“క్రెడికాలిటీ అంటే మెదడు క్రమం, గందరగోళం మధ్య సమతుల్యంగా ఉండే స్థితి” అని జెర్బీ చెప్పారు.

“ఇది ఒక ఆర్కెస్ట్రా లాంటిది. మరీ నిశ్శబ్దంగా ఉంటే ఏమీ జరగదు. మరీ గందరగోళంగా ఉంటే అరుపులు తప్ప ఇంకేమీ ఉండవు. క్రెడికాలిటీ అనేది మెదడు పనితీరు వ్యవస్థీకృతంగా, సరళంగా ఉండే ఒక మధ్యస్థ స్థితి. ఈ స్థితిలో, మెదడు మెరుగ్గా పనిచేస్తుంది. ఇది సమాచారాన్ని సమర్థవంతంగా ప్రాసెస్ చేయగలదు. త్వరగా మారగలదు, నేర్చుకోగలదు, చురుకుగా నిర్ణయాలు తీసుకోగలదు” అని జెర్బీ తెలిపారు.

క్యారియర్ ఇంకా మాట్లాడుతూ “కెఫీన్ మెదడును ఉత్తేజపరుస్తుంది. అది ‘క్రెడికాలిటీ’ అనే స్థితికి నెట్టివేస్తుంది. ఇక్కడ అది మరింత మేల్కొని, అప్రమత్తంగా, ప్రతిస్పందనాత్మకంగా ఉంటుంది. పగటిపూట ఏకాగ్రతకు ఇది ఉపయోగకరంగా ఉన్నప్పటికీ, ఈ స్థితి రాత్రిపూట విశ్రాంతికి ఆటంకం కలిగించవచ్చు. ఆ సమయంలో మెదడు సరిగా విశ్రాంతి తీసుకోదు, కోలుకోదు.” అని చెప్పారు.

నిద్రలో మెదడు విద్యుత్ లయలలో ఆశ్చర్యకరమైన మార్పులను కూడా పరిశోధకులు కనుగొన్నారు. కెఫీన్ థెటా మరియు ఆల్ఫా తరంగాలు వంటి నెమ్మదిగా ఉండే తరంగాలను తగ్గించింది. ఇవి సాధారణంగా గాఢమైన, పునరుజ్జీవింపజేసే నిద్రతో ముడిపడి ఉంటాయి. బీటా తరంగ కార్యకలాపాలను ప్రేరేపించింది. ఇది మేల్కొని ఉన్నప్పుడు, మానసిక కార్యకలాపాలు ఎక్కువగా ఉన్నప్పుడు సాధారణంగా కనిపిస్తుంది.

“ఈ మార్పులు కెఫీన్ ప్రభావంతో నిద్రలో కూడా మెదడు మరింత చురుకుగా, తక్కువ విశ్రాంతి స్థితిలో ఉంటుందని సూచిస్తున్నాయి” అని కెనడా రీసెర్చ్ చైర్ ఇన్ కంప్యూటేషనల్ న్యూరోసైన్స్ అండ్ కాగ్నిటివ్ న్యూరోఇమేజింగ్ హోదాను కూడా కలిగి ఉన్న జెర్బీ అంటున్నారు. “మెదడులోని ఈ లయబద్ధమైన కార్యకలాపాలలో మార్పు, రాత్రిపూట మెదడు ఎంత సమర్థవంతంగా కోలుకుంటుందో చెప్పడానికి, జ్ఞాపకశక్తిపై దాని సంభావ్య ప్రభావాలను వివరించడానికి సహాయపడవచ్చు.” అని వివరించారు.

ఈ అధ్యయనం మెదడు పనితీరుపై కెఫీన్ ప్రభావాలు 20 నుండి 27 సంవత్సరాల వయస్సు గల యువకులలో.. 41 నుండి 58 సంవత్సరాల మధ్య వయస్సు గల వారితో పోలిస్తే గణనీయంగా ఎక్కువగా ఉన్నాయని చూపించింది, ముఖ్యంగా REM నిద్రలో, ఇది కలలు కనే దశ.

(పాఠకులకు గమనిక: ఈ కథనం కేవలం సమాచారం కోసం మాత్రమే. ఇది నిపుణులైన వైద్య సలహాకు ప్రత్యామ్నాయం కాదు. ఏదైనా ఆరోగ్య సమస్యలపై మీ డాక్టర్‌ను సంప్రదించడం ఎల్లప్పుడూ మంచిది.)