పుష్ప 2 ది రూల్ తర్వాత ఐకానిక్ స్టార్ అల్లు అర్జున్ భారీ ప్రాజెక్ట్ మూవీ చేస్తున్నాడు. కోలీవుడ్ స్టార్ డైరెక్టర్ అట్లీ దర్శకత్వంలో అల్లు అర్జున్ ఏఏ22ఏ6 మూవీ తెరకెక్కుతోన్న విషయం తెలిసిందే. సైన్స్ ఫిక్షన్ యాక్షన్ థ్రిల్లర్‌‌గా తెరకెక్కుతోన్న ఈ మూవీ ప్రీ ప్రొడక్షన్ పనులు వేగంగా జరుగుతున్నాయి.

అల్లు అర్జున్ వీడియో

ఇందుకోసం హాలీవుడ్ ప్రముఖ టెక్నీషియన్స్ పని చేస్తున్నారు. ఇక ఈ సినిమా నుంచి విడుదలైన చేసిన అల్లు అర్జున్ మేకింగ్ వీడియో ఫుల్ వైరల్ అయింది. ఏప్రిల్ 8న అల్లు అర్జున్ పుట్టినరోజు సందర్భంగా ఆ వీడియోను రిలీజ్ చేశారు. ఇప్పుడు ఈ సినిమా నుంచి మరో క్రేజీ అప్డేట్ ఇచ్చింది నిర్మాణ సంస్థ సన్ పిక్చర్స్.

అల్లు అర్జున్-అట్లీ సినిమాలో హీరోయిన్ ఎవరనేది అధికారికంగా రివీల్ చేశారు. ఈ సినిమాలో బాలీవుడ్ బ్యూటి దీపికా పదుకొణె హీరోయిన్‌గా చేస్తోంది. దీనికి సంబంధించిన ‘ది ఫేస్ ఆఫ్ AA22xA6’ పేరుతో దీపికా పదుకొణె స్పెషల్ వీడియోను సన్ పిక్చర్స్ సోషల్ మీడియాలో రిలీజ్ చేసింది.

ఫేస్ చూపించకుండా

“విజయం దిశగా వెళ్తున్న మహారాణి. దీపికా పదుకొణెకు స్వాగతం” అంటూ మేకింగ్ వీడియోను రిలీజ్ చేశారు. ఈ వీడియోలో దీపికా పదుకొణె మొహం చూపించకుండా డైరెక్టర్ అట్లీ స్టోరీ, నెరేషన్ వినిపిస్తున్నట్లుగా చూపించారు. తర్వాత కాసేపటికి దీపికా పదుకొణె ఫేస్ రివీల్ చేస్తూ చూపించే షాట్ బాగుంది.

తర్వాత అట్లీ చెప్పిన స్టోరీకి ఫిదా అయినట్లుగా దీపికా పదుకొణె ఎక్స్‌ప్రెషన్స్ ఉన్నాయి. దాంతో సినిమాను ఒప్పుకుని దీపికా చేస్తున్నట్లు చూపించారు. కట్ చేస్తే.. కత్తి పట్టి గుర్రంపై దీపికా పదుకొణె స్వారీ చేసే సీన్‌ను వీఎఫెక్స్‌లో తెరకెక్కించారు. కేవలం మేకింగ్‌ను మాత్రమే చూపించారు. అవుట్‌పుట్ ఏది రివీల్ చేయలేదు.

యోధురాలిగా

ఇక మధ్యలో కొన్ని పెయింటింగ్స్, యోధురాలిగా, సూపర్ ఉమెన్‌గా దీపికా పదుకొణె కత్తి పట్టి యాక్షన్ చేసే కొన్ని సీన్స్, పిక్స్, చూపించారు. ఇలా ఆద్యంతం చాలా ఇంట్రెస్టింగ్‌గా దీపికా పదుకొణె వీడియో సాగింది. ఇదిలా ఉంటే, ఇటీవలే ప్రభాస్ స్పిరిట్ మూవీ నుంచి దీపికా పదుకొణె తప్పుకున్న విషయం తెలిసిందే.

దీపికా పదుకొణె పెట్టిన కండిషన్స్ కారణంగానే ఆమెను డైరెక్టర్ సందీప్ రెడ్డి వంగా తప్పించినట్లు టాక్ నడిచింది కూడా. మరి స్పిరిట్ మూవీని వద్దనుకును అల్లు అర్జున్ చిత్రాన్ని దీపికా చేయడానికి గల కారణాలేంటో అని నెటిజన్స్ ఆరా తీస్తున్నారు.

ఇదివరకు జవాన్‌లో

ఇకపోతే ఇదివరకు డైరెక్టర్ అట్లీ కుమార్ దర్శకత్వం వహించిన షారుక్ ఖాన్ జవాన్ మూవీలో ఓ హీరోయిన్‌గా దీపికా పదుకొణె నటించింది. ఇప్పుడు రెండోసారి డైరెక్టర్ అట్లీతో దీపికా పదుకొణె పనిచేస్తుంది.