ట్రావెల్ వ్లాగర్ విక్టోరియా ఆరు వారాలపాటు భారతదేశంలోని వివిధ ప్రాంతాల్లో ఒంటరిగా ప్రయాణించారు. తన ప్రయాణం, అనుభవాల ఆధారంగా, ఆమె భారతదేశం గురించి తెలుసుకున్న 10 నిజాలను తన ఇన్‌స్టాగ్రామ్ ఫాలోవర్లతో పంచుకున్నారు. భారతదేశాన్ని ఒంటరిగా అన్వేషించడం ఎలా ఉంటుందో ఆమె వ్యక్తిగత, నిష్కపటమైన అభిప్రాయాలను అందించారు.

1. చెత్త సమస్య తీవ్రంగా ఉంది:

“ఇది అబద్ధం కాదు, నేను చాలా మందిని రోడ్డు మీదనే చెత్త పడేయడం చూశాను” అని విక్టోరియా రాశారు. చెత్త వేయడం అనేది ఆమె మొదట గమనించిన విషయాలలో ఒకటి. ముఖ్యంగా రద్దీగా ఉండే ప్రాంతాలలో దీన్ని విస్మరించడం కష్టమని ఆమె గుర్తించారు.

2. మీ బడ్జెట్ మీ అనుభవాన్ని తీర్చిదిద్దుతుంది:

భారతదేశంలో ప్రయాణించేటప్పుడు డబ్బు మీ సౌలభ్యాన్ని గణనీయంగా ప్రభావితం చేస్తుంది. “చాలా మంది పర్యాటకులు చూడటానికి ఇష్టపడని భారతదేశంలోని మరో కోణం నుండి డబ్బు మీకు సౌకర్యాన్ని, దూరాన్ని అందిస్తుంది” అని ఆమె వివరించారు. వసతి, పరిసరాలలో ఉన్న స్పష్టమైన వ్యత్యాసాలను ఆమె ప్రస్తావించారు.

3. ఉత్తమ రవాణా వ్యవస్థ:

భారతదేశంలో ఇంటర్ సిటీ ప్రయాణ వ్యవస్థను, ముఖ్యంగా స్లీపర్ బస్సుల లభ్యతను విక్టోరియా ప్రశంసించారు. “మీరు ఒక రోజు ముందుగానే బస్సు టిక్కెట్‌ను సులభంగా కొనుగోలు చేయవచ్చు. అనేక ఆప్షన్లు ఉంటాయి. ఆన్‌లైన్‌లో బుక్ చేసుకోవడం సులభం. చాలా సౌకర్యవంతంగా ఉంటుంది,” అని ఆమె అన్నారు.

4. అద్భుతమైన సంస్కృతి:

ప్రతి నగరం ఒక కొత్త ప్రపంచంలా అనిపించింది. “విభిన్న వాతావరణం, విభిన్న నిర్మాణం, దానికంటూ ఒక ప్రత్యేక కథ.” అని ఆమె రాశారు. ప్రతి ప్రాంతంలోనూ భారతదేశం ఎంత వైవిధ్యభరితంగా, సజీవంగా ఉందో ఆమె నొక్కి చెప్పారు.

5. మీరు తరచుగా నడిచే పర్సుగా కనిపిస్తారు:

ఆమె గమనించిన ప్రతికూల విషయాలలో ఒకటి. వీధి వ్యాపారులు, దళారుల నుండి నిరంతర ఒత్తిడి. “మీరు బయట అడుగు పెట్టిన ప్రతిసారీ, చిరు వ్యాపారులు మిమ్మల్ని ఆపుతారు. మీరు స్పష్టంగా వద్దు అని చెప్పినప్పటికీ. వారు మిమ్మల్ని వదలరు. చాలా అలసిపోతాం.” అని వివరించారు.

6. మీరు చాలా జాగ్రత్తగా ఉండాలి:

ముఖ్యంగా ఒంటరి మహిళా ప్రయాణికురాలిగా, జాగ్రత్తగా ఉండాల్సిన అవసరాన్ని విక్టోరియా నొక్కి చెప్పారు. దృష్టి ఆకర్షించడం అధికంగా ఉండటంతో, ఆమె ప్రయాణించేటప్పుడు పూర్తిగా విశ్రాంతి తీసుకోవడం కష్టమైంది.

7. అత్యుత్తమ యోగా:

యోగా పుట్టిన ప్రదేశం కాబట్టి, భారతదేశం తన ఆధ్యాత్మిక ఖ్యాతిని నిలబెట్టుకుంది. “మీరు దాని వివిధ రూపాలను అన్వేషించవచ్చు. అనుభవించవచ్చు” అని ఆమె పేర్కొన్నారు. సాంప్రదాయ ఆశ్రమాల నుండి ఆధునిక తరగతుల వరకు అన్నింటినీ ఆమె ప్రస్తావించారు.

8. అద్భుతమైన సహజ సౌందర్యం:

పచ్చని పొలాలు, ఎడారులు, పర్వతాలు… భారతదేశంలోని ప్రకృతి దృశ్యాలు చెరగని ముద్ర వేశాయి. వివిధ ప్రాంతాలలో ఉన్న సహజ దృశ్యాల వైవిధ్యాన్ని చూసి విక్టోరియా నిరంతరం ఆశ్చర్యపోయారు.

9. ప్రతిచోటా చాలా జంతువులు:

వీధుల్లో ఆవులు, పైకప్పులపై కోతులు, కాలిబాటలపై కుక్కలు వంటివి భారతదేశంలో ప్రజల దైనందిన జీవితంలో సాధారణం.

10. విదేశీయులకు వేర్వేరు ధరలు:

విదేశీ పర్యాటకుల నుండి పర్యాటక ప్రదేశాలు, సేవల్లో తరచుగా ఎక్కువ వసూలు చేయడాన్ని విక్టోరియా గమనించారు. “కొన్నిసార్లు ఇది 10 రెట్లు కూడా ఎక్కువగా ఉంటుంది. వాటిలో కొన్ని నాకు భరించడం సాధ్యం కాలేదు” అని ఆమె అన్నారు. ఇది తన ప్రయాణంలో నిరాశ కలిగించే భాగమని ఆమె అభివర్ణించారు.

“భారతదేశం అద్భుతంగా ఉంది, కానీ నేను ఇప్పటివరకు ప్రయాణించిన దేశాలలో ఇది అత్యంత కఠినమైనది” అని ఆమె ముగించారు.