ఇమ్మిగ్రేషన్​ అండ కస్టమ్స్​ ఎన్​ఫోర్స్​మెంట్​ (ఐసీఈ)కు వ్యతిరేకంగా అమెరికా లాస్​ ఏంజిల్స్​లో జరుగుతున్న నిరసనలు తారస్థాయికి చేరుకున్నాయి. ఈ నేపథ్యంలో తాజాగా ఓ వీడియో వైరల్​గా మారింది. పలువురు నిరసనకారులు అమెరికా జెండా మీద ఉమ్మేసి, దానిని తగలబెడుతున్న దృశ్యాలు ఈ వీడియో కనిపించాయి.

“అల్లర్లు ఇప్పుడు లాస్ ఏంజిల్స్ వీధుల్లో అమెరికా జెండాలను కాల్చి, ఉమ్మి వేస్తున్నారు, “ఎఫ్ *** ట్రంప్” అని నినదిస్తున్నారు,” అనే క్యాప్షన్​తో నిక్ సార్టర్ అనే యూజర్ తన ఎక్స్​ అకౌంట్​లో ఒక పోస్టును షేర్ చేశాడు. “వీళ్లు మన దేశాన్ని ద్వేషిస్తారు. వారిని ఎందుకు ఉండనివ్వాలి?!” అని ప్రశ్నించాడు.

ఈ వీడియోపై వ్యాపారవేత్త ఎలాన్​ మస్క్​ సైతం స్పందించాడు. ‘క్రేజీ’ అని కామెంట్​ చేశాడు.

అల్లర్లకు కారణం ఏంటి?

లాస్​ ఏంజిల్స్​ నగరం వ్యాప్తంగా ఐసీఈ అధికారులు ఆకస్మిక, హై-ప్రొఫైల్​ ఇమ్మిగ్రేషన్​ రైడ్లు నిర్వహించారు. సరైన డాక్యుమెంట్లు లేని 118 మందికిపైగా మంది వలసదారులను అరెస్ట్​ చేశారు. వీరిలో చాలా మందికి క్రిమినల్​ చరిత్ర ఉన్నట్టు తెలుస్తోంది.

లాస్​ ఏంజిల్స్​ మాత్రమే కాదు దేశవ్యాప్తంగా ఒక్క రోజులో ఏకంగా 2వేల మందిని అధికారులు అదుపులోకి తీసుకున్నారు.

ఈ పరిణామాలతో తమను టార్గెట్​ చేస్తున్నారంటే అనేక సమాజాలు, భారీ వలసదారుల జనాభా నిరసనలు చేయడం మొదలుపెట్టాయి.

జూన్​ 6న తొలిసారి ప్రజలు వీధుల్లోకి ఆందోళనలు చేపట్టారు. ఆ వెంటనే అధికారులు భారీ ఎత్తున్న అరెస్టులు చేపట్టారు. అయినా నిరసనలు ఆగలేదు. రెండు రోజుల్లో పరిస్థితి మరింత దిగజారిపోయింది. ఫెడరల్​ ఏజెంట్లు, స్థానికి పోలీసులు, నిరసనకారుల మధ్య ఘర్షణ నెలకొంది.

ఒకానొక దశలో నిరసనకారులు పాట్రోలింగ్​ వాహనాలపై రాళ్లు విసిరారు. విరిగిన కుర్చీలను పడేశారు. వారి మీద అధికారులు బాష్పవాయువు గోళాలు, పెప్పర్​ బాల్స్​ని ప్రయోగించారు.

నిరసనకారులపై ప్రజల్లో ఆగ్రహం..

నిరసనకారులు జాతీయ జెండాను అవమానించడంపై అమెరికా ప్రజలు ఆగ్రహం వ్యక్తం చేస్తున్నారు.

“దీన్ని ఇప్పుడే ముగించేందుకు ఎన్ని దళాలు అవసరమైతే అన్నింటిని వాడాలి. ఇది ఆమోదయోగ్యం కానిది. వలసదారుల సమస్యపై ఇంకా సీరియస్​గా ఉండాల్సిన సమయం వచ్చింది. డీపోర్టేషన్​ని పెంచాలి,” అని ఒక యూజర్​ ఎక్స్​లో రాసుకొచ్చారు.

“జాతీయ జెండాను తగలబెట్టడం అనేది ఫెడరల్​ క్రైమ్​గా పరిగణించాలి. ఇది ఫ్రీ స్పీచ్​ సమస్య కాదు. జాతీయ భద్రత సమస్య. వీళ్లందరు వెళ్లిపోతారు. నేను ఆ రోజు కోసం ఎదురుచూస్తాను. జాతీయ జెండాను తగలబెట్టిన దేశంలోనే ఉండాలనుకోవడం హాస్యాస్పదం,” అని మరొకరు అభిప్రాయపడ్డారు.

‘ట్రంప్​ వల్ల పరిస్థితి మరింత తీవ్రమైంది!’

మరోవైపు నిరసనలను అణచివేసేందుకు నేషనల్​ గార్డ్​ దళాలను ట్రంప్​ లాస్​ ఏంజిల్స్​లోకి పంపించారు. దీని తర్వాతే ఆందోళనలు మరింత పెరిగాయని తెలుస్తోంది! భద్రతా దళాలుతో ఆందోళనకారులు గొడవలు పడుతున్నారు. కార్లలను ధ్వంసం చేస్తున్నారు. కనపడిన వాటన్నింటికి నిప్పంటిస్తున్నారు.

నేషనల్​ గార్డ్​ దళాలను ట్రంప్​ పంపండాన్ని కాలిఫోర్నియా గవర్నర్​ గావిన్​ న్యూసోమ్​ వ్యతిరేకించారు.

“దళాలను వెనక్కి తీసుకోవాలని ట్రంప్​ యంత్రాంగాన్ని అధికారికంగా కోరాను,” అని ఆయన అన్నారు.

“ట్రంప్​ జోక్యం చేసుకోనంత వరకు మాకు పెద్ద సమస్యే లేదు. ట్రంప్​ రావడంతో రాష్ట్ర సార్వభౌమాధికారం దెబ్బతింది. ఘర్షణలు పెరిగాయి. కాలిఫోర్నియాకు అధికారాలను తిరిగివ్వండి,” అని అన్నారు.