ప్రముఖ రాజకీయ నాయకుడు, క్రికెట్ కామెంటేటర్, మాజీ క్రికెటర్ నవజ్యోత్ సింగ్ సిద్ధూ తిరిగి ‘ది గ్రేట్ ఇండియన్ కపిల్ షో’కు ‘శాశ్వత అతిథి’గా రాబోతున్నాడు. దీంతో అర్చన పూరణ్ సింగ్ తన జడ్జి స్థానాన్ని అతనితో పంచుకోవాల్సి వస్తుంది. నెట్‌ఫ్లిక్స్‌లో ఈ షోకు సిద్ధూ రావడం ఇదే మొదటిసారి అయినప్పటికీ, గతంలో కపిల్ మొదటి వెరైటీ షో ‘కామెడీ నైట్స్ విత్ కపిల్’లో అతడు ప్రముఖంగా కనిపించాడు.

అర్చనకు షాకిచ్చిన కపిల్

నెట్‌ఫ్లిక్స్ విడుదల చేసిన కొత్త సీజన్ ప్రోమోలో, కపిల్ శర్మ అర్చనకు ఒక పెద్ద సర్ ప్రైజ్ ఇవ్వబోతున్నట్లు ఆట పట్టించాడు. సిద్ధూ వివాదాస్పద రాజకీయ వ్యాఖ్యల కారణంగా షో నుండి వైదొలిగిన తర్వాత.. అర్చన ఆయన స్థానంలోకి వచ్చింది. ఈసారి నవజ్యోత్ తిరిగి వస్తున్నాడని తెలియగానే ఆమె దాదాపు స్పృహ కోల్పోయినంత పని చేస్తుంది.

కపిల్ ఆమెను హెచ్చరిస్తూ.. “ఇకపై సిద్ధూ ఆమెను మాట్లాడనివ్వడేమో” అని సరదాగా అంటాడు. నవజ్యోత్ తనదైన శైలిలో హాస్యభరితమైన ఓ కవితను వినిపించగా.. ఈ కొత్త సీజన్ గురించి మేకర్స్ అనౌన్స్ చేశారు.

కపిల్, సిద్ధూ మళ్లీ కలిశారు

సిద్ధూ పాజీ ఐకానిక్ రీ-ఎంట్రీ గురించి కపిల్ శర్మ తన ఉత్సాహాన్ని పంచుకుంటూ.. “హమ్నే ప్రామిస్ కియా థా కి హర్ ఫన్నీవార్ బఢేగా హమారా పరివార్ (ప్రతి ఫన్నీవార్ మా కుటుంబం పెరుగుతుందని నేను ప్రామిస్ చేశాను). సిద్ధూ పాజీ, అర్చన జీతో కలిసి ‘మస్తీ’ని ఆస్వాదించడానికి తిరిగి రావడం చాలా సంతోషంగా ఉంది. అంతా సిద్ధంగా ఉంది. కాబట్టి ఈ సీజన్ జోకులు, నవ్వులు రెండూ ట్రిపుల్ అవుతాయి!!!” అని అన్నాడు.

ఈ షోకి తాను తిరిగి రావడం గురించి నవజ్యోత్ సింగ్ సిద్ధూ మాట్లాడుతూ.. “ది గ్రేట్ ఇండియన్ కపిల్ షోకు రావడం మళ్లీ ఇంటికి వచ్చినట్లు అనిపిస్తుంది. ఇది నాకు హోమ్ రన్. మా సంభాషణలను ఇష్టపడి, మరింత చూడాలని కోరుకున్న చాలా మంది అభిమానుల, శ్రేయోభిలాషుల కోరికను మేము విన్నాము. నెట్‌ఫ్లిక్స్ ఈ అందమైన వ్యక్తుల సముదాయాన్ని ఒకచోట చేర్చగలిగినందుకు నేను సంతోషిస్తున్నాను. చిరునవ్వుకు ఒక్క పైసా కూడా ఖర్చు కాదు. కానీ అది మిలియన్ల డాలర్ల విలువైనది. ‘ది గ్రేట్ ఇండియన్ కపిల్ షో’లో మళ్లీ భాగం కావడం గౌరవం” అని అన్నాడు.

ఈ ది గ్రేట్ ఇండియన్ కపిల్ షోలో.. కపిల్ శర్మతో పాటు సునీల్ గ్రోవర్, కృష్ణ అభిషేక్ కికూ శారదా కూడా ఈ సీజన్‌లో నవ్వులు పంచడానికి తిరిగి వస్తున్నారు. ‘ది గ్రేట్ ఇండియన్ కపిల్ షో’ సీజన్ 3 జూన్ 21న నెట్‌ఫ్లిక్స్‌లో ప్రారంభం కానుంది.