అమరావతి: ‘స్వర్ణాంధ్ర 2047’ విజన్‌ను సాకారం చేసే దిశగా ఆంధ్రప్రదేశ్ ప్రభుత్వం కీలక అడుగులు వేసింది. ముఖ్యమంత్రి నారా చంద్రబాబు నాయుడు సోమవారం రాష్ట్రవ్యాప్తంగా 26 జిల్లాల్లో, 175 నియోజకవర్గాల్లో ప్రత్యేకంగా ఏర్పాటు చేసిన ‘విజన్ యాక్షన్ ప్లాన్ యూనిట్’ కార్యాలయాలను వర్చువల్‌గా ప్రారంభించారు. ఈ కార్యాలయాల ఏర్పాటుతో రాష్ట్రాభివృద్ధికి కొత్త చరిత్ర ఆరంభమైందని సీఎం ఈ సందర్భంగా పేర్కొన్నారు. ప్రతి కార్యాలయ నిర్వహణకు రూ.10 లక్షలు కేటాయిస్తున్నట్లు ప్రకటించారు.

జిల్లా, నియోజకవర్గ స్థాయిల్లో ప్రగతి రథం

ప్రజాప్రతినిధులు, జిల్లా కలెక్టర్లు, అధికారులతో నిర్వహించిన వీడియో కాన్ఫరెన్స్‌లో సీఎం చంద్రబాబు మాట్లాడుతూ, “నియోజకవర్గ స్థాయిలో ఎమ్మెల్యేలకు ఇప్పటివరకు ప్రభుత్వ కార్యాలయం లేదు. ఇప్పుడు విజన్ యాక్షన్ ప్లాన్ యూనిట్ల ఏర్పాటుతో ఆ లోటు తీరింది. కార్యాలయం ఏర్పాటుతో పాటు 9 మంది సభ్యులతో కూడిన బృందాన్ని కూడా అందిస్తున్నాం. ఇక విజన్ అమలును తదుపరి స్థాయికి తీసుకెళ్లాల్సిన బాధ్యత మీదే” అని ఉద్ఘాటించారు. ఎమ్మెల్యేలకు ఇది ఒక అద్భుతమైన అవకాశమని, దీనిని సద్వినియోగం చేసుకొని ప్రజలను ఈ అభివృద్ధి ప్రక్రియలో భాగస్వాములను చేయాలని సూచించారు.

నియోజకవర్గ యాక్షన్ ప్లాన్ యూనిట్‌కు ఎమ్మెల్యే అధ్యక్షుడిగా వ్యవహరిస్తారు. నియోజకవర్గ స్పెషల్ ఆఫీసర్ కార్యనిర్వహణ ఉపాధ్యక్షులుగా ఉంటారు. స్థానిక సంస్థల ఎమ్మెల్సీ, మున్సిపాలిటీ/నగర పంచాయతీ ఛైర్మన్, ఆర్డీఓ/సబ్ కలెక్టర్, తహసీల్దార్లు, ఎంపీడీవోలు, మున్సిపల్ కమిషనర్లు సభ్యులుగా ఉంటారు. నియోజకవర్గ కేంద్రానికి చెందిన ఎంపీడీవో కన్వీనర్‌గా వ్యవహరిస్తారు. ప్రతి నియోజకవర్గంలో ఈ కార్యాలయాలు ఎమ్మెల్యే, జిల్లా నోడల్ ఆఫీసర్, అకడెమిషియన్, యువ ప్రొఫెషనల్, ఐదుగురు విజన్ స్టాఫ్ (GSWS) – మొత్తం 9 మంది బృందంతో పనిచేస్తాయి.

‘స్వర్ణాంధ్ర 2047’ లక్ష్యాలు: పేదరికం లేని సమాజం, గ్లోబల్ లీడర్‌షిప్

ప్రధాని నరేంద్ర మోదీ దార్శనికతతో ‘వికసిత్ భారత్ – 2047’ కు అనుగుణంగా, ‘స్వర్ణాంధ్ర – 2047’ విజన్‌ను రాష్ట్రంలో రూపొందించినట్లు సీఎం చంద్రబాబు వెల్లడించారు. “భారత్ ప్రస్తుతం ప్రపంచంలో నాలుగో అతిపెద్ద ఆర్థిక వ్యవస్థగా అవతరించింది. రాబోయే రెండేళ్లలో మూడో స్థానానికి చేరుకుంటాం. ప్రపంచంలో అత్యధిక తలసరి ఆదాయం ఆర్జిస్తున్న భారతీయుల్లో 30 శాతానికి పైగా తెలుగువారే ఉన్నారు. ఈ వృద్ధిని కొనసాగించి, మరింత ఉన్నత స్థానానికి చేరుకోవాలి” అని ఆయన అన్నారు.

‘స్వర్ణాంధ్ర 2047’ విజన్ ప్రధానంగా 10 సూత్రాలపై ఆధారపడి ఉంది:

• పేదరికం లేని సమాజం
• ఉద్యోగ కల్పన
• నైపుణ్యం-మానవ వనరుల అభివృద్ధి
• నీటి భద్రత
• వ్యవసాయ సాంకేతికత
• అంతర్జాతీయ స్థాయి లాజిస్టిక్స్
• ఇంధన వనరుల సమర్థ వినియోగం
• నాణ్యమైన ఉత్పత్తులు-బ్రాండింగ్
• స్వచ్ఛాంధ్ర
• డీప్ టెక్
• సమాన అభివృద్ధి, సంక్షేమం – డిజిటల్ గవర్నెన్స్

రాష్ట్రంలోని అన్ని జిల్లాలు సమానంగా అభివృద్ధి చెందాలని ముఖ్యమంత్రి ఆకాంక్షించారు. “ఆంధ్రప్రదేశ్ ‘ఆరోగ్యవంతమైన, సంపన్నమైన, సంతోషకరమైన’ రాష్ట్రంగా ఉండాలనేది మన అంతిమ లక్ష్యం” అని ఆయన అన్నారు. వాట్సాప్ గవర్నెన్స్ ద్వారా ఇప్పటికే 400కి పైగా ప్రభుత్వ సేవలను అందిస్తున్నామని, రాబోయే 2 నెలల్లో అన్ని ప్రభుత్వ సేవలను ‘మన మిత్ర’ ద్వారా పొందవచ్చని తెలిపారు.

రాష్ట్ర, జిల్లా, నియోజకవర్గ, సచివాలయ స్థాయిల్లో ఈ విజన్ అమలు జరుగుతుంది. ప్లానింగ్ విభాగం, జీఏడీ, ఐటీఈ &సీ, ఆర్టీజీఎస్, గ్రామ, వార్డు సచివాలయ వ్యవస్థ, ఫైనాన్స్, ఐ&పీఆర్, సీఎంఓ కలిసికట్టుగా విజన్ అమలుకు కృషి చేస్తాయి. 26 జిల్లాలకు గాను 5 ఏళ్ల రోడ్‌మ్యాప్‌ను రూపొందించారు.

ప్రజా భాగస్వామ్యం, ఆర్థిక వృద్ధి – మౌలిక సదుపాయాల కల్పన

“ఆగస్టు 15 నాటికి 15 లక్షల ‘బంగారు కుటుంబాలను’ దత్తత తీసుకునేలా ప్రయత్నిస్తున్నాం. ‘జీరో పావర్టీ – పీ4’ కార్యక్రమం దీనిలో భాగం” అని సీఎం చంద్రబాబు ప్రకటించారు. ఈ కార్యక్రమంలో భాగంగా మార్గదర్శులుగా ఎక్కువ మందిని పరిచయం చేసే అధికారులకు అవార్డులు అందజేస్తామని తెలిపారు. కేంద్రమంత్రి రామ్మోహన్ నాయుడు ఈ కార్యక్రమంలో పాల్గొని 10 బంగారు కుటుంబాలను దత్తత తీసుకుంటానని ప్రకటించగా, సీఎం ఆయన్ను అభినందించి, మిగిలిన ప్రజాప్రతినిధులు కూడా మార్గదర్శులు కావాలని పిలుపునిచ్చారు.

ఆగస్టు 15న మహిళలకు ఉచిత బస్సు ప్రయాణం, ఈ నెలలో ‘తల్లికి వందనం’ పథకం ప్రారంభం, ‘దీపం’ పథకం కింద నేరుగా అకౌంట్‌కు డబ్బు జమ చేయడం వంటి సంక్షేమ కార్యక్రమాలను ప్రభుత్వం అమలు చేయనుంది.