ఆమిర్ ఖాన్ తాను తాజాగా నిర్మించిన మూవీ సితారే జమీన్ పర్ కేవలం థియేటర్లలోనే రిలీజ్ అవుతుందని, తర్వాత ఓటీటీలోకి రాదని సంచలన నిర్ణయం తీసుకున్న విషయం తెలుసు కదా. ఈ సినిమా కోసం నెట్‌ఫ్లిక్స్ ఏకంగా రూ.125 కోట్ల ఆఫర్ ఇచ్చినా అతడు తిరస్కరించాడని వార్తలు వచ్చాయి. ఇప్పుడీ మూవీ జూన్ 20న థియేటర్లలో రిలీజ్ కానుండగా.. ఆమిర్ ఖాన్ ప్రొడక్షన్స్ నిర్మించిన కొన్ని సినిమాలను నెట్‌ఫ్లిక్స్ తన ప్లాట్‌ఫామ్ పై నుంచి తొలగించడం ఆశ్చర్యం కలిగిస్తోంది.

ఈ సినిమాలన్నీ మాయం..

సితారే జమీన్ పర్ మూవీ థియేటర్లలో మాత్రమే రిలీజ్ అవుతుందన్న ఆమిర్ ఖాన్ ప్రకటన సినిమా ఇండస్ట్రీలో సంచలనం రేపింది. అయితే ఆ తర్వాత తాజాగా నెట్‌ఫ్లిక్స్ తీసుకున్న నిర్ణయం మరింత ఆశ్చర్యం కలిగిస్తోంది. ఆమిర్ ఖాన్ ప్రొడక్షన్స్ నిర్మించిన ‘సీక్రెట్ సూపర్‌స్టార్’, ‘దంగల్’, ‘ఢిల్లీ బెల్లీ’, ‘పీప్లీ లైవ్’, ‘ధోబీ ఘాట్’, ‘జానే తూ… యా జానే నా’, ‘తారే జమీన్ పర్’, ‘లగాన్’లాంటి సినిమాలను నెట్‌ఫ్లిక్స్ తొలగించింది.

రాబోయే ఆమిర్ ఖాన్ థియేట్రికల్ ఎక్స్‌క్లూజివ్‌లను, ‘తారే జమీన్ పర్’ ఫ్రాంఛైజ్‌లోని సినిమాలను థియేటర్లలోకి రాకముందే దక్కించుకోవాలనుకునే ఒక పెద్ద వ్యూహంలో ఇది భాగం అని తెలుస్తోంది.

అయితే నెట్‌ఫ్లిక్స్ లో ఇంకా ఈ నిర్మాణ సంస్థ నుండి వచ్చిన కొన్ని సినిమాలు ఉన్నాయి. ‘లాపతా లేడీస్’, ‘లాల్ సింగ్ చద్దా’, ‘తలాష్: ది ఆన్సర్ లైస్ వితిన్’ అనే మూడు మూవీస్ ఇప్పటికీ అందుబాటులో ఉన్నాయి.

ఓటీటీ రిలీజ్‌లపై ఆమిర్ అసంతృప్తి

సినిమాలు చాలా త్వరగా థియేటర్ల నుండి స్ట్రీమింగ్ సేవలకు మారుతుండటంపై ఆమిర్ ఖాన్ అసంతృప్తి వ్యక్తం చేశాడు. దీనికి ‘లాపతా లేడీస్’ ఉదాహరణను ప్రస్తావించాడు. 2024 మార్చి 1న థియేటర్లలో విడుదలైన ఎనిమిది వారాల తర్వాత అది నెట్‌ఫ్లిక్స్‌లో విడుదలైంది.

మూవీకి పాజిటివ్ రెస్పాన్స్ వచ్చినా ఇలా త్వరగానే ఓటీటీలోకి తీసుకురావడంతో దాని బాక్సాఫీస్ కలెక్షన్లు పరిమితమైపోయాయన్నది ఆమిర్ వాదన. దీంతో తన నెక్ట్స్ మూవీ సితారే జమీన్ పర్ ను కేవలం థియేటర్లలో రిలీజ్ చేయాలని, తర్వాత ఓటీటీ లేదా వీడియో ఆన్ డిమాండ్ సర్వీసులకు ఇవ్వకూడదని ఆమిర్ సంచలన నిర్ణయం తీసుకున్నాడు. ఈ నిర్ణయం ఓటీటీల ఆధిపత్యాన్ని సవాలు చేస్తోంది.

అంతేకాదు తమ కొత్త సినిమాను భారీ మొత్తానికి కూడా ఇవ్వకపోవడం ద్వారా థియేటర్లలో సినిమాల ప్రదర్శన ప్రాముఖ్యతను ఆమిర్ ఖాన్ ప్రొడక్షన్స్ చాటి చెప్పినట్లయింది. ఇక ఇప్పుడు సితారే జమీన్ పర్ సినిమాను ప్రేక్షకులు కేవలం థియేటర్లలోనే చూడాల్సి వస్తుంది. తర్వాత ఓటీటీలో చూద్దాంలే అనే అవకాశం లేదు. మరి దీనికి ప్రేక్షకుల రెస్పాన్స్ ఎలా ఉంటుందో చూడాలి.