కమల్ హాసన్, మణిరత్నం కాంబినేషన్లో వచ్చిన లేటెస్ట్ మూవీ ‘థగ్ లైఫ్’. థియేటర్లలో ఈ మూవీ తీవ్రంగా నిరాశపరుస్తోంది. అంచనాలను అందుకోలేకపోయింది. ఈ నేపథ్యంలో త్వరలోనే ఈ సినిమా ఓటీటీ బాట పట్టబోతోందనే క్రేజీ బజ్ వినిపిస్తోంది. ఈ మేరకు ఓటీటీ ప్లాట్ ఫామ్, మేకర్స్ మధ్య చర్చలు సాగుతున్నట్లు సమాచారం. ఈ మూవీలో కమల్ హాసన్, సిలంబరసన్ టీఆర్, త్రిష, అభిరామి తదితరులు కీలక పాత్రలు పోషించారు.

రిలీజ్ కు ముందే ఓటీటీ రైట్స్

థగ్ లైఫ్ మూవీ జూన్ 5న ప్రపంచవ్యాప్తంగా రిలీజైంది. అయితే ఈ సినిమా థియేటర్లలో విడుదలకు ముందే ఓటీటీ, శాటిలైట్ రైట్స్ అమ్ముడుపోయాయి. డిజిటల్ స్ట్రీమింగ్ హక్కులను నెట్‌ఫ్లిక్స్‌ ఓటీటీ సొంతం చేసుకుంది. ఇందుకోసం ఏకంగా రూ.149.7 కోట్లు ఖర్చు చేసింది. మరోవైపు శాటిలైట్ రైట్స్ ను విజయ్ టీవీ రూ.60 కోట్లకు కొనుగోలు చేసింది. దీంతో థగ్ లైఫ్ థియేట్రికల్ రిలీజ్ కు ముందే ఓటీటీ, శాటిలైట్ హక్కుల ద్వారా రూ.210 కోట్లు వచ్చాయి.

ఆ డేట్

సాధారణంగా అయితే ఏ సినిమా అయినా థియేటర్లలో రిలీజైన నాలుగు వారాల తర్వాత ఓటీటీలోకి వస్తుంది. స్టార్ హీరోల సినిమాలు, బ్లాక్ బస్టర్ మూవీస్ కొన్నిసార్లు ఆలస్యంగా ఓటీటీలోకి వస్తుంటాయి. కానీ థగ్ లైఫ్ మూవీని థియేట్రికల్ రిలీజ్ అయిన 8వ వారం తర్వాత ఓటీటీలోకి తీసుకొస్తామని నెట్‌ఫ్లిక్స్‌ ఇప్పటికే అనౌన్స్ చేసింది. అంటే ఆగస్టు 7న ఈ మూవీ ఓటీటీలోకి వచ్చే అవకాశముంది.

ప్లాన్ ఛేంజ్ అయ్యేనా?

అయితే థియేటర్లలో థగ్ లైఫ్ కు షాక్ తగలడంతో ఈ సినిమా ముందుగానే ఓటీటీలోకి వచ్చే సూచనలు కనిపిస్తున్నాయి. నాలుగు వారాల్లో లేదంటే అంతకంటే ముందే ఈ మూవీని డిజిటల్ స్ట్రీమింగ్ కు తీసుకొచ్చే అవకాశాలున్నాయి. అంటే జూన్ నెల చివర్లో లేదా జులై మొదటి వారంలో ఈ మూవీని ఓటీటీలో చూసే ఛాన్స్ ఉంది. ఈ మేరకు మేకర్స్ తో నెట్‌ఫ్లిక్స్‌ చర్చలు జరుపుతున్నట్లు టాక్. మొదట తమిళ్, తెలుగు, కన్నడ మలయాళ భాషల్లో ఈ సినిమా ఓటీటీలోకి వస్తుందని.. ఆ తర్వాత హిందీలో యాడ్ చేస్తారని తెలిసింది.

షాకింగ్ కలెక్షన్లు

భారీ అంచనాలతో థియేటర్లకు వచ్చిన హై వోల్టేజీ యాక్షన్ థ్రిల్లర్ థగ్ లైఫ్ కు షాకింగ్ కలెక్షన్లు వస్తున్నాయి. 9 రోజుల్లో కలిపి ఇప్పటివరకూ రూ.50 కోట్లు కూడా కలెక్ట్ చేయలేకపోయింది. 9 రోజుల్లో ఇండియాలో రూ.44.75 కోట్ల నెట్ కలెక్షన్లు మాత్రమే రాబట్టిందని సక్నిల్క్ వెబ్ సైట్ వెల్లడించింది. 37 ఏళ్ల తర్వాత కమల్ హాసన్, మణిరత్నం తిరిగి సినిమా చేశారు. కానీ ఆ మ్యాజిక్ పనిచేయలేకపోయింది.