తిరుపతి వెళ్లే ప్రయాణికులకు దక్షిణ మధ్య రైల్వే మరో అప్డేట్ ఇచ్చింది. చర్లపల్లి నుంచి తిరుపతి మధ్య నడిచే ప్రత్యేక రైళ్లను పొడిగించింది. మొత్తం 26 రైళ్లను పొడిగించినట్లు దక్షిణ మధ్య రైల్వే అధికారులు ఓ ప్రకటన ద్వారా వెల్లడించారు. దీంతో తిరుమలకు వెళ్లే భక్తులకు… మరికొన్ని రోజులు ఈ సేవలు అందుబాటులో ఉండనున్నాయి.

26 ప్రత్యేక రైళ్లు పొడిగింపు..

దక్షిణ మధ్య రైల్వే వెల్లడించిన వివరాల ప్రకారం….చర్లపల్లి – తిరుపతి (నంబర్ 07017) మధ్య నడిచే ప్రత్యేక రైలు… జూలై 4 నుంచి జూలై 27వ తేదీ వరకు అందుబాటులో ఉంటుంది. ప్రతి శుక్ర, ఆదివారాల్లో రాత్రి 9:45 నిమిషాలకు చర్లపల్లి నుంచి బయలుదేరి, మరుసటి రోజు ఉదయం 11:15 నిమిషాలకు తిరుపతికి చేరుకుంటుంది. మొత్తం 8 సర్వీసులు అందుబాటులో ఉంటాయి. ఇక తిరుపతి – చర్లపల్లి ( నంబర్ 07018) మధ్య నడిచే ప్రత్యేక రైలు.. జూలై 5 నుంచి జూలై 28వ తేదీ వరకు ప్రతి సోమ, శనివారాల్లో అందుబాటులో ఉంటుంది. ఇవి కూడా 8 సర్వుసులు ఉంటాయి.

ఈ ప్రత్యేక రైళ్లు మల్కాజ్‌గిరి, కాచిగూడ, ఉమ్దానగర్, షాద్‌నగర్, జడ్చర్ల, మహబూబ్‌నగర్, వనపర్తి రోడ్, గద్వాల, కర్నూలు సిటీ, డోన్, గుత్తి, తాడిపత్రి, యర్రగుంట్ల, కడప, ఒంటిమిట్ట, రాజంపేట, రేణిగుంట మీదుగా రాకపోకలు సాగిస్తాయి. ఆయా స్టేషన్లలో ప్రయాణికులు ఎక్కవచ్చు.

మరోవైపు చర్లపల్లి – తిరుపతి (ట్రైన్ నంబర్ 07251) ట్రైన్… జూలై 2 నుంచి జూలై 30 వ తేదీ వరకు అందుబాటులో ఉంటుంది. ఈ ప్రత్యేక రైలు ప్రతి బుధవారం సాయంత్రం 6:50 నిమిషాలకు చర్లపల్లి నుంచి బయలుదేరి, మరుసటి రోజు తెల్లవారుజామున 6:55 నిమిషాలకు తిరుపతికి చేరుకుంటుంది. మొత్తం 5 సర్వీసులు ఉంటాయి.

ఇక తిరుపతి – చర్లపల్లి (నెంబర్ 07252) జూలై 3 నుంచి జూలై 31వ తేదీ వరకు రాకపోకలు సాగిస్తుంది. ఇవి 5 సర్వీసుల ఉంటాయి. ఈ ప్రత్యేక రైలు ప్రతి గురువారం సాయంత్రం 6:55 నిమిషాలకు తిరుపతి నుంచి బయలుదేరి, మరుసటి రోజు తెల్లవారుజామున 6 గంటలకు చర్లపల్లికి చేరుకుంటుంది.

ఈ ప్రత్యేక రైళ్లు జనగామ, కాజీపేట, వరంగల్, నెక్కొండ, మహబూబాబాద్, ఖమ్మం, విజయవాడ, తెనాలి, చీరాల, ఒంగోలు, నెల్లూరు, గూడూరు, వెంకటగిరి, శ్రీకాళహస్తి, రేణిగుంట స్టేషన్లలో ఆగుతాయి. మొత్తంగా 26 సర్వీసులు అందుబాటులో ఉంటాయి. ఈ సేవలను వినియోగించుకోవాలని అధికారులు ఓ ప్రకటన ద్వారా కోరారు.