ఫార్ములా ఈ రేసు కేసు విచారణలో భాగంగా బీఆర్ఎస్ వర్కింగ్ ప్రెసిడెంట్ కేటీ రామారావు (కేటీఆర్) సోమవారం తెలంగాణ ప్రభుత్వ అవినీతి నిరోధక శాఖ (ఏసీబీ) విచారణకు హాజరయ్యారు.

ఏసీబీ కార్యాలయానికి వెళ్లే ముందు బీఆర్ఎస్ ప్రధాన కార్యాలయంలో మీడియాతో మాట్లాడిన కేటీఆర్, తనపై జరుగుతున్న విచారణను “రాజకీయ వేధింపు”గా అభివర్ణించారు. కాంగ్రెస్ ప్రభుత్వం ఎన్నికల హామీలను నెరవేర్చడంలో “విఫలం” కావడంతో ప్రజల దృష్టిని మళ్లించడానికి ప్రయత్నిస్తోందని ఆయన ఆరోపించారు.

“బహుశా, వారు నన్ను అరెస్టు చేయవచ్చు. కానీ, ఒక విషయం మాత్రం ఖాయం. తెలంగాణ రాష్ట్ర సాధన కోసం మేం గతంలో జైలుకు వెళ్ళాం. హైదరాబాద్ బ్రాండ్ ఇమేజ్‌ను ప్రోత్సహించడానికి తీసుకున్న నిర్ణయంపై మళ్ళీ జైలుకు వెళ్ళడానికి సిద్ధంగా ఉన్నాం. వందసార్లు జైలుకు వెళ్ళడానికైనా సిద్ధం. కానీ, కాంగ్రెస్ ప్రభుత్వాన్ని దాని ఎన్నికల హామీల విషయంలో వదిలిపెట్టం” అని కేటీఆర్ అన్నారు. చివరికి సత్యమే గెలుస్తుందని కూడా ఆయన ధీమా వ్యక్తం చేశారు.

గత బీఆర్ఎస్ ప్రభుత్వంలో పురపాలక శాఖ మంత్రిగా ఉన్న కేటీఆర్, ఈ ఫార్ములా ఈ రేసు కేసు విషయంలో ఈ సంవత్సరం జనవరిలో కూడా ఏసీబీ విచారణను ఎదుర్కొన్నారు. గత బీఆర్ఎస్ ప్రభుత్వం అధికారంలో ఉండగా 2023 ఫిబ్రవరిలో హైదరాబాద్‌లో ఫార్ములా ఈ రేసు నిర్వహణకు సంబంధించి అక్రమ చెల్లింపులు జరిగాయని, వాటిలో ఎక్కువ భాగం అనుమతులు లేకుండా విదేశీ కరెన్సీలో ఉన్నాయని ఆరోపణలు రావడంతో ఏసీబీ ఆయనపై కేసు నమోదు చేసింది.

2024 ఫిబ్రవరిలో కూడా ఈ రేసు జరగాల్సి ఉన్నప్పటికీ, 2023 డిసెంబర్‌లో కాంగ్రెస్ ప్రభుత్వం అధికారంలోకి వచ్చిన తర్వాత అది రద్దయింది. హైదరాబాద్ బ్రాండ్ ఇమేజ్‌ను పెంచడానికి బీఆర్ఎస్ ప్రభుత్వం చేసిన ప్రయత్నాల్లో ఈ రేసు, దానికి సంబంధించిన చెల్లింపులు భాగమే అని బీఆర్ఎస్ నాయకుడు కేటీఆర్ చెబుతున్నారు.