సూపర్ నేచురల్ హారర్ థ్రిల్లర్ సిరీస్‌లో ఫైనల్ డెస్టినేషన్ ఫ్రాంచైజీ గురించి తెలియని మూవీ లవర్స్ ఉండరు. వెంట్రుక వాసు తప్పుతో ఎంతో మంది మరణిస్తుంటారు. నిర్లక్ష్యంతో చేసే ఒక చిన్న తప్పు ఎందరో ప్రాణాలను బలిగొంటుంది. ఆ ప్రమాదాల నుంచి బయటపడిన వాళ్లను కూడా మృత్యువు వెంటాడుతుంది.

ఇప్పటికీ ఐదు సినిమాలు

ఊహిస్తేనే ఎంతో భయంకరంగా ఉండే ఈ కాన్సెప్టుతో సినిమాలను తెరకెక్కించి సూపర్ హిట్ ఫ్రాంచైజీగా పేరు తెచ్చుకుంది ఫైనల్ డెస్టినేషన్. ఈ మూవీ సిరీస్‌లో ఇప్పటికీ ఐదు సినిమాలు వచ్చాయి. అన్ని మంచి సక్సెస్ సాధించాయి. రీసెంట్‌గా గత నెలలో ఫైనల్ డెస్టినేషన్ ఫ్రాంచైజీ నుంచి ఆరో మూవీ వచ్చింది.

ఒకరోజు ముందుగా ఇండియాలో

ఫైనల్ డెస్టినేషన్ బ్లడ్‌లైన్స్ టైటిల్‌తో వచ్చిన ఈ సినిమా 2025 మే 16న వరల్డ్ వైడ్‌గా విడుదలైతే ఇండియాలో ఒకరోజు ముందే మే 15న థియేటర్లలో రిలీజ్ అయింది. అది కూడా తెలుగు భాషలో ప్రేక్షకుల ముందుకు వచ్చింది. 2011 తర్వాత సుమారు 14 ఏళ్ల తర్వాత ఈ ఫ్రాంచైజీ నుంచి కొత్త మూవీ రావడంతో అంచనాలు భారీగా పెరిగాయి.

బడ్జెట్-కలెక్షన్స్

ఆ అంచనాలను తగినట్లుగా ఫైనల్ డెస్టినేషన్ బ్లడ్‌లైన్స్ ఆకట్టుకుంది. 50 మిలియన్ డాలర్లతో నిర్మించిన ఫైనల్ డెస్టినేషన్ 6 మూవీ బాక్సాఫీస్ వద్ద దాదాపుగా 271.1 మిలియన్ డాలర్స్ కొల్లగొట్టి బ్లాక్ బస్టర్ హిట్‌గా నిలిచింది. అంతేకాకుండా ఐఎమ్‌డీబీ నుంచి పదికి 7 రేటింగ్ సాధించింది.

అమెజాన్ ప్రైమ్ ఓటీటీలో

ఇలాంటి ఫైనల్ డెస్టినేషన్ బ్లడ్‌లైన్స్ ఓటీటీలోకి సడెన్‌గా వచ్చేసింది. అమెజాన్ ప్రైమ్‌‌లో ఫైనల్ డెస్టినేషన్ బ్లడ్‌లైన్స్ ఓటీటీ స్ట్రీమింగ్ అవుతోంది. అమెజాన్ ప్రైమ్ వీడియోతోపాటు యాపిల్ ప్లస్ టీవీలో కూడా ఫైనల్ డెస్టినేషన్ 6 ఓటీటీ రిలీజ్ అయింది. అయితే, ఈ రెండింట్లో రెంటల్ విధానంలో ఈ మూవీ డిజిటల్ ప్రీమియర్ అవుతోంది.

ఇదే ట్విస్ట్

కానీ, ఇక్కడే ఓ చిన్న ట్విస్ట్, నిరాశ ఉంది. హారర్ థ్రిల్లర్ మూవీ ఫైనల్ డెస్టినేషన్ బ్లడ్‌లైన్స్ ప్రస్తుతం ఇండియాలోని ఓటీటీల్లో అందుబాటులో లేదు. ఇతర దేశాల్లోని ప్రైమ్ వీడియో, యాపిల్ ప్లస్ టీవీ ఓటీటీల్లో ఫైనల్ డెస్టినేషన్ 6 డిజిటల్ స్ట్రీమింగ్ అవుతోంది. భారతదేశంలోకి మరో వారం రోజుల్లో వచ్చే అవకాశం ఉందని సమాచారం.

రన్ టైమ్

ఇదిలా ఉంటే, ఫైనల్ డెస్టినేషన్ 6 సినిమాకు జాక్ లిపోవ్స్కీ, అడమ్ స్టేయిన్ దర్శకత్వం వహించారు. సుమారు గంట 49 నిమిషాల రన్‌టైమ్ ఉన్న ఫైనల్ డెస్టినేషన్ బ్లడ్‌లైన్స్ చిత్రంలో బ్రెక్ బసింగర్, విలియమ్ బ్లడ్‌వర్త్, రిచర్డ్ హార్మోన్, క్యాథలీన్ శాంటా జువానా, టియో బ్రియోన్స్, ఓవెన్ జాయ్‌నర్ తదితరులు కీలక పాత్రలు పోషించారు.