వైద్య కళాశాలల్లో అండర్ గ్రాడ్యుయేట్ కోర్సుల్లో ప్రవేశానికి ఉద్దేశించిన నీట్ యూజీ 2025 ఫలితాలు ఇటీవల వెలువడ్డాయి. ఈ ప్రతిష్టాత్మక పరీక్షలో తెలుగు రాష్ట్రాలకు చెందిన చాలా మంది విద్యార్థులు ఉత్తీర్ణత సాధించారు. నీట్ యూజీ 2025 ఫలితాల తరువాత ప్రక్రియ అయిన కౌన్సెలింగ్ కు సంబంధించి పూర్తి వివరాలను ఇక్కడ తెలుసుకోండి.

ఆన్లైన్ కౌన్సెలింగ్ ప్రక్రియ

• నీట్ యూజీ 2025 లో విజయం సాధించిన అభ్యర్థులకు తదుపరి దశ ఆన్లైన్ కౌన్సెలింగ్ ప్రక్రియకు దరఖాస్తు చేయడం.
• ఎంబీబీఎస్, బీడీఎస్ సీట్లకు ఆలిండియా కోటా, స్టేట్ కోటా అనే రెండు రకాల కౌన్సెలింగ్ ఉంటుంది.
• ఆలిండియా కోటాలో నీట్ యూజీ కౌన్సెలింగ్ ను మెడికల్ కౌన్సెలింగ్ కమిటీ లేదా ఎంసీసీ నిర్వహిస్తుంది. రాష్ట్ర కౌన్సెలింగ్ ను ఆయా రాష్ట్ర అధికారులు నిర్వహిస్తారు.
• ఎంబీబీఎస్, బీడీఎస్ కాకుండా వెటర్నరీ, లైఫ్ సైన్సెస్, నర్సింగ్ వంటి కోర్సులకు నీట్ యూజీ స్కోరును ఉపయోగించి (అండర్ గ్రాడ్యుయేట్ స్థాయిలో) దరఖాస్తు చేసుకోవచ్చని అభ్యర్థులు తెలుసుకోవాలి.

ఎంసీసీ నీట్ యూజీ కౌన్సెలింగ్ అంటే ఏమిటి?

ఎంసీసీ ఈ కింది సీట్లకు సంబంధించి నీట్ కౌన్సెలింగ్ నిర్వహిస్తుంది. అవి..

• 15 శాతం ఆలిండియా కోటా సీట్లు ఎంబీబీఎస్/ బీడీఎస్ సీట్లు (కేంద్రపాలిత ప్రాంతమైన జమ్ముకశ్మీర్ భాగస్వామ్యం వారి వాటాకు లోబడి ఉంటుంది).
• బీహెచ్యూలో మొత్తం 100 శాతం ఎంబీబీఎస్/ బీడీఎస్ సీట్లు.
• దేశవ్యాప్తంగా ఎయిమ్స్ లలో మొత్తం 100 శాతం ఎంబీబీఎస్ సీట్లు.
• 100 శాతం జిప్మర్ సీట్లు (పుదుచ్చేరి/ కరైకల్)
• 100 శాతం ఏఎంయూ సీట్లు
• డీయూ/ ఐపీ యూనివర్సిటీ (వీఎంఎంసీ/ ఏబీవీఐఎంఎస్/ ఈఎస్ఐసీ డెంటల్)లలో 85 శాతం సీట్లు
• ఫ్యాకల్టీ ఆఫ్ డెంటిస్ట్రీ (జామియా మిలియా ఇస్లామియా) లో 100 శాతం సీట్లు. వీటిలో జామియా విద్యార్థుల 5 శాతం ఇంటర్నల్ కోటా, ఈఎస్ఐసీలో 15 శాతం ఐపీ కోటా సీట్లు కూడా ఉన్నాయి.

ఆన్ లైన్ ప్రక్రియ

సీట్ల కేటాయింపు వరకు ఎంసీసీ నీట్ యూజీ కౌన్సెలింగ్ ఆన్లైన్ ప్రక్రియగా ఉంటుందని, ఆ తర్వాత షార్ట్ లిస్ట్ చేసిన అభ్యర్థులు తమకు కేటాయించిన మెడికల్ కాలేజీల్లో రిపోర్టు చేసి అడ్మిషన్ కన్ఫర్మ్ చేసుకోవాల్సి ఉంటుంది. గత ఏడాది రెండు విడతల్లో కౌన్సెలింగ్ నిర్వహించగా, ఆ తర్వాత స్ట్రే వేకెన్సీ (stray vacancy) రౌండ్, ప్రత్యేక స్ట్రే వేకెన్సీ (special stray vacancy) రౌండ్ నిర్వహించారు. దరఖాస్తు చేసుకునే ముందు అభ్యర్థులు తమ అర్హతను ధృవీకరించడానికి, ఇతర వివరాల కోసం అధికారిక వెబ్సైట్లో అప్లోడ్ చేసే బ్రోచర్ ను పూర్తిగా చదవండి.