ఏపీ లిక్కర్ కేసులో కీలక పరిణామాలు చోటు చేసుకుంటున్నాయి. ఓవైపు సిట్ విచారణ వేగవంతం చేస్తుండటంతో పాటు మరోవైపు అరెస్టులపర్వం కూడా కొనసాగుతోంది. తాజాగా ఇదే కేసులో వైసీపీ మాజీ ఎమ్మెల్యే చెవిరెడ్డి భాస్కర్ రెడ్డిని సిట్ అరెస్ట్ చేసింది.

ఏ 38గా చెవిరెడ్డి పేరు…!

బెంగుళూరు ఎయిర్‌పోర్ట్‌లో చెవిరెడ్డి భాస్కర్ రెడ్డిని సిట్ అధికారులు అదుపులోకి తీసుకున్నారు. ఆయనతో పాటు వెంకటేశ్‌నాయుడిని (ఏ-34) కూడా అరెస్ట్ చేసింది. లిక్కర్ కేసులో చెవిరెడ్డిని ఏ -38గా చేర్చారు . తాజాగా జరిగిన అరెస్టులతో కలిపి ఈ కేసులో ఇప్పటివరకు మొత్తం 9 మందిని సిట్ అరెస్ట్ చేసింది. మరికొంత మందిని కూడా అరెస్ట్ చేసే అవకాశం ఉంది.

చెవిరెడ్డి భాస్కర్ రెడ్డిని విజయవాడ ఆఫీస్‌కు తరలించనున్నారు. ఈ కేసుకు సంబంధించి విచారించే అవకాశం ఉంది. ఆపై కోర్టులో హాజరుపరుస్తారని తెలుస్తోంది. ఇక ఈ కేసులో చెవిరెడ్డి కుమారుడైన మోహిత్ రెడ్డి పేరును కూడా సిట్ చేర్చింది. ఆయన్ను ఏ 39గా పేర్కొంటూ కోర్టులో మంగళవారం మెమో దాఖలైంది.

ఏపీ లిక్కర్ కేసు రాజ్ కసిరెడ్డి చుట్టూ తిరుగుతోంది. అయితే ఆయనకు అందిన ముడుపుల్లో కొంతమేరు చెవిరెడ్డికి కూడా అందినట్లు సిట్ అధికారులు భావిస్తున్నారు. ఆ డబ్బులను గత ఎన్నికల్లో పోటీ చేసిన పలువురు అభ్యర్థులకు చేరవెశారన్న అభియోగాలు తెరపైకి వస్తున్నాయి. ఈ కోణంలోనే చెవిరెడ్డిని అరెస్ట్ చేసిన సిట్ అధికారులు… లిక్కర్ కేసుకు సంబంధించి లోతుగా విచారించే అవకాశం కనిపిస్తోంది.