మలయాళం థ్రిల్లర్, క్రైమ్ థ్రిల్లర్ సినిమాలు ఊహించని ట్విస్టులు, గ్రిప్పింగ్ స్క్రీన్‌ప్లేతో అలరిస్తాయి. అలా ఇప్పుడు కొల్లా (Kolla) అనే మరో మూవీ తెలుగులో రాబోతోంది. థియేటర్లలో రిలీజైన రెండేళ్లకు తెలుగులో ఓటీటీలోకి వస్తున్న ఈ మూవీ ట్రైలర్ ను బుధవారం (జూన్ 18) ఈటీవీ విన్ ఓటీటీ రిలీజ్ చేసింది. ఆ ట్రైలర్, మూవీ విశేషాలేంటో ఇక్కడ చూడండి.

కొల్లా మూవీ ట్రైలర్

కొల్లా మూవీ 2023లోనే రిలీజైనా.. తెలుగులో మాత్రం ఇప్పుడు వస్తోంది. ఈ విషయాన్ని ఒక రోజు ముందే ఈటీవీ విన్ ఓటీటీ వెల్లడించింది. గురువారం (జూన్ 19) నుంచి మూవీని స్ట్రీమింగ్ చేయనున్నట్లు కూడా తెలిపింది. ఇక తాజాగా తెలుగు ట్రైలర్ రిలీజ్ చేసింది. అందులో ఇద్దరు అమ్మాయిలు ఓ ఊరికి వస్తారు. అక్కడ ఓ బ్యూటీ పార్లర్ తెరవడానికి ప్లాన్ చేస్తారు.

తమ మాటతీరు, అందంతో అక్కడి వాళ్లను త్వరగానే ఆకర్షిస్తారు. అయితే దీని వెనుక వాళ్లది పెద్ద ప్లానే ఉంటుంది. పక్కనే ఉండే బ్యాంకును దోచుకోవడమే ఆ ప్లాన్. ఈ మూవీ ట్రైలర్ కూడా ఆసక్తికరంగా సాగింది. ఆ ఇద్దరు అమ్మాయి, బ్యాంకు దోపిడీ, తర్వాత పోలీసుల దర్యాప్తుతో ఉత్కంఠ రేపింది.

“కొల్లా.. అధికారిక ట్రైలర్ వచ్చేసింది. ఓ బ్యూటీ పార్లర్, ఓ సీక్రెట్ ప్లాన్. ఓ డేరింగ్ దోపిడీ. ఇప్పటి వరకూ చూడని గ్రిప్పింగ్ క్రైమ్ థ్రిల్లర్ చూడటానికి సిద్ధంగా ఉండండి. తెలుగులో కొల్లా మూవీని జూన్ 19 నుంచి ఈటీవీ విన్ లో చూడండి” అనే క్యాప్షన్ తో ఆ ఓటీటీ ఈ విషయం తెలిపింది. అయితే ట్రైలర్లో మాత్రం పొరపాటున జులై 19 నుంచి అంటూ ఇవ్వడం గమనార్హం.

కొల్లా మూవీ గురించి..

కొల్లా అనే ఈ మలయాళం మూవీ 2023, జూన్ 9న థియేటర్లలో రిలీజైంది. కొల్లా అంటే దోపిడీ అని అర్థం. ఇది ఆనీ (రజిషా విజయన్), శిల్పా (ప్రియా ప్రకాష్ వారియర్) అనే ఇద్దరు అమ్మాయిల చుట్టూ తిరిగే కథ. ఈ ఇద్దరూ ఓ బ్యాంకు దోపిడీ చేస్తారు. ఓ చిన్న ఊళ్లో బ్యూటీ పార్లర్ పెట్టి.. పక్కనే ఉన్న కోఆపరేటివ్ బ్యాంకు దోపిడీకి ప్లాన్ చేస్తారు. అనుకున్నట్లే దోచేస్తారు.

వాళ్లు ఆ దోపిడీ ఎందుకు చేస్తారు? పోలీసులకు ఎలా చిక్కుతారు? వాళ్ల నుంచి తప్పించుకోవడానికి ఎలాంటి మాస్టర్ ప్లాన్ వేస్తారు? వాళ్ల భవిష్యత్తు ఏం కానుంది అన్నదే ఈ కొల్లా మూవీ స్టోరీ. ఈ సినిమాను సూరజ్ వర్మ డైెరెక్ట్ చేశాడు. దీనికి ఐఎండీబీలో 5.5 రేటింగ్ నమోదైంది.

కేవలం రెండు గంటల నిడివి ఉన్న ఈ సినిమాకు థియేటర్లలో పెద్దగా రెస్పాన్స్ రాలేదు. తర్వాత ప్రైమ్ వీడియోలో మలయాళం ఆడియోతో స్ట్రీమింగ్ కు వచ్చింది. ఇక ఇప్పుడు ఈటీవీ విన్ ఓటీటీలో తెలుగు డబ్బింగ్ వెర్షన్ స్ట్రీమింగ్ కానుంది.