మెటబాలిక్ హెల్త్ కోచ్ కరణ్ సారిన్ ఒక ముఖ్యమైన విషయాన్ని చెబుతున్నారు. బెల్లమైనా, ఏ ఇతర తీపి పదార్థమైనా సరే, చాలా తక్కువ మోతాదులో మాత్రమే తీసుకోవాలట. ఎందుకంటే, ఆయన దృష్టిలో ‘చక్కెర అనేది కొత్త పొగాకు’ లాంటిది.

మీరు బరువు తగ్గాలని చూస్తున్నా, లేదంటే మంచి ఆహారపు అలవాట్లు అలవర్చుకోవాలనుకుంటున్నా తెల్ల చక్కెరను తగ్గించడం సరైన దారి.

‘మెడికల్ న్యూస్ టుడే’ ప్రకారం కేవలం అరకప్పు చక్కెరలో దాదాపు 385 కేలరీలు, 100 గ్రాముల చక్కెర ఉంటాయి. అయినా సరే, చాలా మందికి ఉదయం కాఫీ నుండి తీపి వంటల వరకు చక్కెర లేకుండా రోజు గడవదు. మనకు బెల్లం లాంటి ప్రత్యామ్నాయాలు ఉన్నాయి. కానీ, ఇది నిజంగా తెల్ల చక్కెర కంటే ఆరోగ్యకరమైందా? ఇక్కడ చూద్దాం.

బెల్లం, చక్కెర.. ఏది మెరుగైనది?

హెచ్‌టీ లైఫ్‌స్టైల్‌కు ఇచ్చిన ఇంటర్వ్యూలో,మెటబాలిక్ హెల్త్ కోచ్ కరణ్ సారిన్ బెల్లం గురించి ప్రచారంలో ఉన్న ఒక అపోహను బయటపెట్టారు. “అవును, బెల్లం సహజమైనది. శుద్ధి చేయనిది. కొందరైతే దీనిని ‘ఔషధ చక్కెర’ అని కూడా పిలుస్తారు. భారతదేశంలో చాలా కాలంగా, తెల్ల చక్కెర కంటే బెల్లమే ఆరోగ్యకరమని తరతరాలుగా నమ్ముతున్నారు. పైపైన చూస్తే బెల్లమే మంచిదనిపిస్తుంది. కానీ, ఇది నిజంగా మీ రక్తంలో చక్కెర స్థాయిలకు మేలు చేస్తుందా? ఇన్సులిన్ రెసిస్టెన్స్, షుగర్ వ్యాధి ఉన్నవారు, లేదా సాధారణంగా తమ శరీరాన్ని ఆరోగ్యంగా ఉంచుకోవాలనుకునేవారు.. బెల్లం వాడకానికి ఎలాంటి మినహాయింపు లేదు. అన్ని రకాల తీపి పదార్థాల మాదిరిగానే, దీనిని కూడా నిర్దిష్ట మోతాదులోనే తీసుకోవాలి. ఎందుకంటే, చివరికి చక్కెర అనేది పొగాకు లాంటిదే. దీనిని తగ్గించడమే మంచిది..” అని పేర్కొన్నారు.

“శుద్ధి చేసిన చక్కెర దాదాపు స్వచ్ఛమైన సుక్రోజ్ (sucrose) అయితే, బెల్లం తయారీలో తక్కువ ప్రాసెసింగ్ ఉంటుంది. అందుకే దీనిలో ఐరన్, పొటాషియం, మెగ్నీషియం, కొన్ని యాంటీఆక్సిడెంట్లు లాంటి ఖనిజాలు కొద్ది మొత్తంలో మిగిలి ఉంటాయి. ఈ కారణంగానే బెల్లం కేవలం తీపి కోసం కాకుండా, పోషకాలను అందించేదిగా ప్రచారం పొందింది” అని ఆయన తెలిపారు.

బెల్లం కూడా చక్కెరే

ఇక్కడే అసలు విషయం ఉంది. “బెల్లం రకాన్ని బట్టి, దాని అణు నిర్మాణాన్ని పరిశీలిస్తే, ఇది కూడా 65 నుంచి 90 శాతం వరకు చక్కెర (సుక్రోజ్) మాత్రమే. కేలరీల విషయంలో తెల్ల చక్కెరతో దాదాపు సమానం. మరి శరీరంలో జీర్ణమయ్యే విషయంలోనా? అక్కడే పెద్ద ఆశ్చర్యం ఉంది” అని కరణ్ అన్నారు.

ఆహారం తిన్న తర్వాత రక్తంలో చక్కెర స్థాయిలు ఎంత వేగంగా పెరుగుతాయో చెప్పే గ్లైసెమిక్ ఇండెక్స్ (GI) వేరే కథ చెబుతుంది. “తెల్ల చక్కెర జీఐ సుమారు 65 అయితే, మనం ఎక్కువగా వాడే చెరకు బెల్లం జీఐ ఇంకా ఎక్కువ. తరచుగా 84 లేదా అంతకంటే ఎక్కువ. సింపుల్‌గా చెప్పాలంటే, మీరు తెల్ల చక్కెరకి బదులు వాడే బెల్లం, రక్తంలో చక్కెరను మరింత వేగంగా పెంచుతుంది” అని వివరించారు.

“నేను స్వయంగా దీనిని నిరంతర గ్లూకోజ్ పర్యవేక్షణ ద్వారా పరీక్షించాను. మామూలు చక్కెరతో చేసిన టీకి, బెల్లంతో చేసిన టీకి నా రక్తంలో చక్కెర స్పందనను పోల్చి చూసినప్పుడు, రెండింటిలోనూ దాదాపు ఒకే విధంగా, వేగంగా, చెప్పుకోదగ్గ స్థాయిలో చక్కెర పెరిగింది. బెల్లం వల్ల గ్లూకోజ్ నెమ్మదిగా పెరుగుతుందనే ఆలోచన నిజం కాదని తేలింది” అని ఆయన వివరించారు.

ఇది కేవలం తన వ్యక్తిగత అనుభవం మాత్రమే కాదని కరణ్ స్పష్టం చేశారు. “2022లో ప్రచురించిన ఒక అధ్యయనం (జర్నల్ ఆఫ్ ఫ్యూచర్ ఫుడ్స్‌లో) టైప్ 2 షుగర్ ఉన్న రోగులలో కొబ్బరి బెల్లం, చెరకు చక్కెరను పోల్చి చూసింది. భోజనం తర్వాత రక్తంలో చక్కెర స్థాయిలలో ఈ రెండు తీపి పదార్థాల మధ్య ఎలాంటి పెద్ద తేడాను గుర్తించలేదు. ఆరోగ్యకరమైనవిగా భావించే బెల్లం రకాలు కూడా గ్లూకోజ్‌ని నియంత్రించడంలో పెద్దగా ప్రయోజనం చూపలేదు” అని ఆయన అన్నారు.

మరి ఆ ఖనిజాలు, యాంటీఆక్సిడెంట్ల సంగతేంటి?

“అవును, బెల్లంలో ఖనిజాలు, యాంటీఆక్సిడెంట్లు ఉంటాయి. కానీ మనం సాధారణంగా తీసుకునే మోతాదులో వాటి వల్ల చెప్పుకోదగ్గ ఆరోగ్య ప్రయోజనాలు ఉండవు. నిజంగా ఏదైనా ప్రయోజనం పొందాలంటే రక్తంలో చక్కెరను అదుపులో ఉంచాలి..” అని కరణ్ చెప్పారు.

సురక్షితమైన ప్రత్యామ్నాయాలు ఏమిటి?

అన్ని బెల్లం రకాలు ఒకేలా ఉండవని కరణ్ తెలిపారు. “పామిరా పామ్ బెల్లం (palmyra palm jaggery) వంటి కొన్ని రకాల పామ్ బెల్లానికి తక్కువ జీఐ (సుమారు 35) ఉందని పరిశోధనల్లో తేలింది. కానీ ఈ రకం చాలా తక్కువగా లభిస్తుంది. భారతదేశంలో వాణిజ్యపరంగా లభించే బెల్లంలో ఎక్కువ భాగం ఇంకా చెరకు ఆధారితమే. అది ఎక్కువ జీఐ ఉన్న రకం. చాలా మందికి తెలియకుండానే దీన్ని వాడేస్తున్నారు..’ అని వివరించారు.

‘సురక్షితమైన ప్రత్యామ్నాయాలను కోరుకునేవారు మోంక్ ఫ్రూట్ (Monk Fruit), స్టీవియా (Stevia), అల్లులోస్ (Allulose) వంటి కొన్ని సహజమైన, సున్నా కేలరీల తీపి పదార్థాలను ఉపయోగించవచ్చు. ఇవి రక్తంలో చక్కెరను గణనీయంగా పెంచకుండా తీపిని అందిస్తాయి” అని ఆయన సూచించారు.

“బెల్లం సహజమైనదిగా అనిపించవచ్చు. కానీ మీ శరీరం తీపి పదార్థాలను అవి ఎంత సంప్రదాయబద్ధంగా ఉన్నాయనే దాని ఆధారంగా గుర్తించదు. ఒకసారి శరీరంలోకి వెళ్ళాక అది గ్లూకోజ్, ఫ్రక్టోజ్‌లను మాత్రమే చూస్తుంది. దానికి అనుగుణంగానే స్పందిస్తుంది.” అని కరణ్ వివరించారు.

(పాఠకులకు ముఖ్య గమనిక: ఈ కథనం కేవలం సమాచారం కోసమే. ఇది వైద్య సలహాకు ప్రత్యామ్నాయం కాదు. ఏదైనా ఆరోగ్య సమస్యలు ఉంటే లేదా ఆహారంలో మార్పులు చేసుకోవాలంటే తప్పకుండా మీ డాక్టర్‌ను సంప్రదించండి.)