పాన్ ఇండియా స్థాయిలో ప్రతిష్టాత్మకంగా విడుదల కాబోతున్న మూవీ కన్నప్ప. ఇందులో మంచు విష్ణు లీడ్ రోల్ పోషిస్తున్న విషయం తెలిసిందే. అయితే ఈ మూవీ ద్వారానే విష్ణు చిన్న కుమారుడు అవ్రామ్ (7) ఇండస్ట్రీలోకి అడుగుపెడుతున్నాడు. దీనిపై విష్ణు తన ఆనందాన్ని పంచుకున్నాడు. ఇది తన జీవితంలో అత్యంత భావోద్వేగ క్షణాలలో ఒకటి అని విష్ణు అన్నాడు.

విష్ణు మంచు ఏమన్నాడంటే?

విష్ణు మంచు తన ఎక్స్ (గతంలో ట్విట్టర్) ఖాతాలో ఒక తెరవెనుక (BTS) వీడియోను షేర్ చేశాడు. ఆ వీడియోలో అవ్రామ్ సినిమా సెట్‌లో ఎంతో చురుగ్గా అటూ ఇటూ తిరుగుతూ, తాను నటించిన సీన్లను చూసుకుంటూ కనిపిస్తున్నాడు. అవ్రామ్ తన తండ్రితో మాట్లాడుతూ, కాస్ట్యూమ్‌లు వేసుకుంటూ, తన డైలాగులు ప్రాక్టీస్ చేస్తూ కనిపించాడు.

ఈ వీడియోను విష్ణు షేర్ చేస్తూ ఎమోషనల్ పోస్ట్ చేశాడు. ఏడేళ్ల వయసులోనే తెరంగేట్రం చేస్తున్న తన కొడుకుని చూసి అతడు గర్వపడుతున్నాడు. వీడియో చివర్లో అవ్రామ్.. సెట్‌లో విల్లు, బాణాలతో ఆడుకోవడం కూడా చూడొచ్చు.

ఇది జీవితాంతం నిలిచిపోయే జ్ఞాపకం

ఈ ప్రత్యేక సందర్భాన్ని పురస్కరించుకుని విష్ణు చేసిన పోస్ట్ ఇప్పుడు వైరల్ అవుతోంది. “నా చిట్టి అవ్రామ్, కన్నప్పతో అరంగేట్రం చేస్తున్నాడు. వాడు సెట్‌లోకి అడుగు పెట్టడం, డైలాగులు చెప్పడం, తన కలను సాకారం చేసుకోవడం అనేది నా జీవితంలో అత్యంత భావోద్వేగ క్షణాలలో ఒకటి.

ఒక తండ్రిగా, నేను ఒకప్పుడు కన్న కలలనే నా కొడుకు కూడా నిజం చేసుకోవడం చూడటం కంటే గొప్ప సందర్భం మరొకటి లేదు. ఇది కేవలం అరంగేట్రం కాదు. ఇది జీవితాంతం నిలిచిపోయే జ్ఞాపకం” అని విష్ణు అభిప్రాయపడ్డాడు.

“మీరు నాకు ఎల్లప్పుడూ ఇచ్చిన ప్రేమ, ఆశీర్వాదాలను వాడిపై కూడా కురిపిస్తారని ఆశిస్తున్నాను. అవ్రామ్ ప్రయాణం మొదలవుతుంది. అది కన్నప్పతోనే మొదలవుతుంది. హర్ హర్ మహాదేవ్ ” అని విష్ణు అన్నాడు.

కన్నప్ప మూవీ గురించి..

ఈ పౌరాణిక ఫాంటసీ థ్రిల్లర్ మూవీని శివుడికి గొప్ప భక్తుడైన కన్నప్ప పురాణం ఆధారంగా రూపొందించారు. ఈ మూవీలో విష్ణు మంచు కన్నప్ప పాత్రలో నటిస్తుండగా.. మోహన్ బాబు, శరత్‌కుమార్, ప్రభాస్, మోహన్ లాల్ వంటి నటీనటులు ఇతర ముఖ్య పాత్రలు పోషించారు.

ఈ సినిమాలో అక్షయ్ కుమార్ శివుడిగా, మోహన్‌లాల్ కిరాతుడిగా, ప్రభాస్ రుద్రుడిగా, కాజల్ అగర్వాల్ పార్వతి దేవిగా కనిపించనున్నారు. ఈ మూవీ జూన్ 27న థియేటర్లలో విడుదల కానుంది.