ఇజ్రాయెల్ తో ఘర్షణ నేపథ్యంలో ఉత్తర కొరియా గురువారం ఇరాన్ కు మద్దతు తెలిపింది. ఉత్తర కొరియా విదేశాంగ మంత్రిత్వ శాఖ అధికార ప్రతినిధి ఇరాన్ పై ఇజ్రాయెల్ సైనిక దాడి గురించి “తీవ్రమైన ఆందోళన” వ్యక్తం చేశారు. మిడిల్ ఈస్ట్ లో యుద్ధం జరిగే ప్రమాదాన్ని ఇజ్రాయెల్ లేవనెత్తుతోందని ఆరోపించారు.

ఇజ్రాయెల్ కేన్సర్ వంటిది..

అమెరికా, పాశ్చాత్య దేశాల అండదండలతో ఉన్న ఇజ్రాయెల్ మధ్యప్రాచ్యంలో శాంతికి కేన్సర్ లాంటిదని, ప్రపంచ శాంతి, భద్రతలను నాశనం చేయడంలో ప్రధాన దోషి అని ఉత్తర కొరియా ఆరోపించింది. ఇరాన్ సార్వభౌమత్వాన్ని, ప్రాదేశిక సమగ్రతను ఉల్లంఘిస్తున్న ఇజ్రాయెల్ దారుణమైన దురాక్రమణ చర్యకు పాల్పడిందని విమర్శించింది. “మధ్యప్రాచ్యంలో కొత్త యుద్ధాన్ని తీసుకువచ్చిన జియోనిస్టులు, వారిని ఉత్సాహభరితంగా ఆదరించే, మద్దతు ఇచ్చే తెరవెనుక దళాలు అంతర్జాతీయ శాంతి మరియు భద్రతను నాశనం చేయడానికి పూర్తిగా బాధ్యత వహిస్తాయి” అని ఉత్తర కొరియా విదేశాంగ మంత్రిత్వ శాఖ అధికార ప్రతినిధి స్పష్టం చేశారు.

1973 నుంచి..

ఇజ్రాయెల్ కు వ్యతిరేకంగా ఉత్తర కొరియా చేసిన ప్రకటన ఇరాన్ తో ఉత్తర కొరియాకు ఉన్న సన్నిహిత సంబంధాలను ప్రతిబింబిస్తోంది. ఆయుధ, అణు కార్యక్రమాల వల్ల అమెరికా మరియు పాశ్చాత్య దేశాల నుండి ఆంక్షలను ఎదుర్కొన్న 1973 నాటి నుంచి ఇరాన్, ఉత్తర కొరియాలు సన్నిహిత సంబంధాలను కొనసాగిస్తున్నాయి. ప్రస్తుతం ‘ఆపరేషన్ రైజింగ్ లయన్’ పేరుతో ఇజ్రాయెల్ సైనిక దాడి తర్వాత ఇరాన్, ఇజ్రాయెల్ మధ్య వివాదం కొత్త పుంతలు తొక్కింది. మరోవైపు, ఈ వివాదంలో జోక్యం చేసుకోవాలని అమెరికా యోచిస్తోంది. ఈ దాడుల్లో ఇరాన్ లో 224 మంది, ఇజ్రాయెల్ లో 24 మంది చనిపోయారు.