బ్లూమ్బెర్గ్ నివేదిక ప్రకారం, రాబోయే రోజుల్లో ఇరాన్ పై సైనిక దాడికి అమెరికా సిద్ధమవుతోంది. చర్చలు చురుగ్గా జరుగుతున్నప్పటికీ తుది నిర్ణయం తీసుకోలేదని పరిస్థితి తెలిసిన వ్యక్తులను ఉటంకిస్తూ ఆ నివేదిక పేర్కొంది. కొన్ని వర్గాలు ఈ వారాంతం లోనే ఇరాన్ పై అమెరికా ముమ్మర దాడులకు దిగుతుందని పేర్కొన్నాయి. అయితే, ఈ విషయంలో తుది నిర్ణయం అధ్యక్షుడు ట్రంప్ తీసుకుంటారని తెలిపాయి.

నేనేం చేస్తానో ఎవరికీ తెలియదు

ఇరాన్ ను లక్ష్యంగా చేసుకుని సైనిక దాడి ప్రణాళికను ట్రంప్ ఈ వారం ప్రారంభంలోనే ఆమోదించారని, అయితే, తమ డిమాండ్ల విషయంలో ఇరాన్ స్పందించడానికి వీలుగా తుది అనుమతిని నిలిపివేశారని వాల్ స్ట్రీట్ జర్నల్ నివేదించింది. అమెరికా అధ్యక్షుడు డోనాల్డ్ ట్రంప్ బుధవారం ఇరాన్ పై దాడుల గురించి మాట్లాడుతూ.. నేను చేయొచ్చు. లేదా చేయకపోవచ్చు. నేను ఏం చేయబోతున్నానో ఎవరికీ తెలియదు’’ అని వైట్ హౌస్ వెలుపల విలేకరులతో అన్నారు. ‘చివరి నిమిషంలో నిర్ణయాలు తీసుకోవడానికి నేను ఇష్టపడతాను’ అని ట్రంప్ వ్యాఖ్యానించారు.

భారీగానే దాడులు

అమెరికా ఇంటెలిజెన్స్ వర్గాలను ఉటంకిస్తూ, ఇరాన్ పై యూఎస్ చేసే ఏ ఆపరేషన్ అయినా ఒకే దెబ్బ కాకుండా బహుళ సమన్వయ దాడులను కలిగి ఉంటుందని బ్లూమ్ బర్గ్ నివేదిక సూచించింది. ట్రంప్ మంగళవారం దాడి ప్రణాళికను ఆమోదించారని, అయితే తన షరతులకు ఇరాన్ ఇంకా అంగీకరిస్తుందనే ఆశతో తుది ఆమోదాన్ని నిలిపివేసినట్లు వాల్ స్ట్రీట్ జర్నల్ పేర్కొంది.

ప్రతీకారం తప్పదు

ఇజ్రాయెల్ తో తమ ఘర్షణలో అమెరికా చేరితే ప్రతీకారం తీర్చుకుంటామని ఇరాన్ సుప్రీం లీడర్ అయతుల్లా ఖమేనీ బుధవారం అమెరికాను హెచ్చరించారు. ఇజ్రాయెల్ దాడిలో వాషింగ్టన్ చేరితే ఈ ప్రాంతంలోని అమెరికా స్థావరాలపై దాడి చేస్తామని ఇరాన్ తెలిపింది. ప్రస్తుతం మధ్యప్రాచ్యం అంతటా పదుల సంఖ్యలో అమెరికన్ దళాలు మోహరించినట్లు ఆ వార్తా సంస్థ తెలిపింది. కాగా, ఖమేనీ హెచ్చరికపై ట్రంప్ స్పందిస్తూ.. ‘గుడ్ లక్ ‘ అని సమాధానమిచ్చారు. ‘ఇరాన్ కు అణ్వస్త్రం అందనివ్వం. నేను చాలా కాలంగా చెబుతున్నాను. నేను ఇంతకుముందెన్నడూ చెప్పనంతగా ఇప్పుడు చెబుతున్నాను.” అన్నారు.

ఇరాన్, ఇజ్రాయెల్ యుద్ధం

ఇజ్రాయెల్ తొలి దాడి చేసిన తర్వాత గత శుక్రవారం నుంచి ఇరాన్, ఇజ్రాయెల్ క్షిపణి దాడులు జరుపుతున్నాయి. ఇజ్రాయెల్ పై ఇరాన్ 400 బాలిస్టిక్ క్షిపణులు, వందలాది డ్రోన్లను ప్రయోగించిందని, 24 మంది మరణించారని, 800 మందికి పైగా గాయపడ్డారని ఇజ్రాయెల్ అధికారులు తెలిపారు. దీనికి ప్రతిగా ఇజ్రాయెల్ వైమానిక దాడుల్లో 224 మంది ఇరానియన్లు మరణించారని, టెహ్రాన్ లోని అణు, క్షిపణి కేంద్రాలతో సహా 20కి పైగా లక్ష్యాలపై దాడులు చేసినట్లు సమాచారం.