ఈ రోజుల్లో మీ ఫోన్‌లో చూస్తే ఏదో ఒక కొత్త ఆరోగ్య ట్రెండ్ కనిపిస్తూనే ఉంటుంది. ఈ మధ్య కాలంలో బాగా ప్రాచుర్యం పొందుతున్న పానీయాలలో ఒకటి నెయ్యి కాఫీ. పోషకాహార నిపుణుల నుండి సెలబ్రిటీల వరకు, అందరూ దీని గురించి మాట్లాడుకుంటున్నారు. ‘నెయ్యి కాఫీ’ లేదా ‘నెయ్యి టీ’ గురించి పోస్ట్‌లు పెడుతూ, దీనిని ఆయుర్వేద నివారణిగా లేదా చిన్నప్పటి నుండి తాగుతున్న పానీయంగా పేర్కొంటున్నారు.

మీరు దీన్ని ఇప్పటివరకు ప్రయత్నించారా? లేకపోతే, బహుశా ఇప్పుడు సరైన సమయం కావచ్చు. ఈ సాధారణ పానీయం మీ మెటబాలిజంను పెంచడానికి, గుండె ఆరోగ్యాన్ని కాపాడటానికి, పీరియడ్స్ నొప్పిని తగ్గించడానికి కూడా సహాయపడుతుందని తెలిస్తే మీరు ఆశ్చర్యపోతారు. నెయ్యి కాఫీ కేవలం ఒక ట్రెండీ పానీయం కంటే ఎక్కువ ఎందుకు అనేది తెలుసుకుందాం.

నెయ్యి కాఫీ అంటే ఏమిటి?

నెయ్యి కాఫీని బుల్లెట్ ప్రూఫ్ కాఫీ అని కూడా అంటారు. ఇది బ్లాక్ కాఫీ, నెయ్యి మిశ్రమం. ఇది క్రీమీగా, చిక్కగా ఉండే పానీయం. దీనిని ఉదయం పూట తాగుతారు. కాఫీకి నెయ్యి ద్వారా ఆరోగ్యకరమైన కొవ్వు తోడవడంతో ఇది స్థిరమైన శక్తిని అందిస్తుంది. ఏకాగ్రతను మెరుగుపరుస్తుంది. ఎక్కువసేపు కడుపు నిండిన అనుభూతిని కలిగిస్తుంది. ఇది తక్కువ కార్బ్, ఆయుర్వేద ఆహారాలలో ప్రాచుర్యం పొందింది.

కాఫీలో నెయ్యి వేయడం వల్ల కలిగే ప్రయోజనాలు ఏమిటి?

కాఫీలో నెయ్యిని కలిపి ప్రతిరోజూ తాగడం వల్ల కలిగే 6 ఆరోగ్య ప్రయోజనాలు ఇక్కడ ఉన్నాయి.

1. ముఖ్యమైన పోషకాలతో నిండి ఉంటుంది

అన్ని కొవ్వులు మన ఆరోగ్యానికి చెడ్డవి కావు. “నెయ్యి ఒమేగా-3, ఒమెగా 6, ఒమెగా 9 వంటి ఆరోగ్యకరమైన కొవ్వులతో సమృద్ధిగా ఉంటుంది. ఇది విటమిన్లు A, E, మరియు K లకు సహజ వనరు. మరోవైపు కాఫీలో కెఫిన్, కాఫెస్టోల్, కహ్వియోల్, క్లోరోజెనిక్ యాసిడ్ పుష్కలంగా ఉంటాయి. ఇవన్నీ రోగనిరోధక శక్తికి అండగా ఉంటాయి” అని పోషకాహార నిపుణురాలు విధి చావ్లా అంటున్నారు. ‘ట్రెండ్స్ ఇన్ ఫుడ్ సైన్స్ & టెక్నాలజీ’లో ప్రచురితమైన ఒక అధ్యయనం రోగనిరోధక వ్యవస్థను బలోపేతం చేయడంలో కాఫీ ప్రయోజనాలను హైలైట్ చేస్తుంది.

2. జీర్ణక్రియను ప్రోత్సహిస్తుంది

ఖాళీ కడుపుతో కాఫీ తాగడం వల్ల ఎసిడిటీ వస్తుందని మీరు నమ్ముతుంటే.. దానిని వదిలించుకోవడానికి నెయ్యితో బ్లాక్ కాఫీని ప్రయత్నించండి. నెయ్యిలో ఉండే బ్యుటిరిక్ యాసిడ్ జీర్ణక్రియకు సహాయకారిగా ఉంటుంది. ప్రేగులలో మంటను తగ్గిస్తుంది. పొట్ట ఉబ్బరంతో బాధపడేవారికి నెయ్యి కాఫీ ముఖ్యంగా సహాయపడుతుంది.

3. కొలెస్ట్రాల్ స్థాయిలను మెరుగుపరుస్తుంది

బ్లాక్ కాఫీని నెయ్యితో కలపడం వల్ల గుండె ఆరోగ్యానికి ప్రయోజనకరంగా ఉంటుంది. నెయ్యి మంటను తగ్గించడానికి, కొలెస్ట్రాల్‌ను సమతుల్యం చేయడానికి సహాయపడుతుంది. నిజానికి, ‘ఓచ్స్నర్ జర్నల్’లో ప్రచురితమైన ఒక అధ్యయనం కాఫీ గుండె జబ్బుల ప్రమాదాన్ని తగ్గించగలదని, రక్తపోటును తగ్గించగలదని, కొలెస్ట్రాల్ స్థాయిలను మెరుగుపరచగలదని చూపిస్తుంది.

4. పీరియడ్స్ నొప్పికి సహాయపడుతుంది

నెయ్యిలో యాంటీఆక్సిడెంట్లు, యాంటీ ఇన్‌ఫ్లమేటరీ సమ్మేళనాలు ఉంటాయి. ఇవి పీరియడ్ క్రాంప్స్ తీవ్రతను తగ్గించవచ్చు. “ఇది శక్తిని పెంచడానికి, ఆరోగ్యకరమైన రుతుక్రమ చక్రానికి మద్దతు ఇవ్వడానికి హార్మోన్ల సమతుల్యతను కూడా అందిస్తుంది” అని చావ్లా వివరిస్తున్నారు.

5. ఆకలిని తగ్గిస్తుంది

ఉదయం నెయ్యి కాఫీ తాగడం వల్ల ఆకలిని నియంత్రించవచ్చు. ఆరోగ్యకరమైన కొవ్వులు మీకు ఎక్కువసేపు కడుపు నిండిన అనుభూతిని కలిగిస్తాయి. కాబట్టి మీరు అనవసరంగా స్నాక్స్ తినే అవకాశం తక్కువగా ఉంటుంది. ఇది ఆరోగ్యకరమైన బరువు నిర్వహణకు తోడ్పడుతుంది.

6. శక్తిని అందిస్తుంది

కాఫీ తక్షణ శక్తిని ఇస్తుందని అంటారు. అలాగే నెయ్యిలోని కొవ్వులు కెఫిన్ శోషణను నెమ్మదిస్తాయి. మీకు నిలకడైన శక్తిని అందిస్తాయి. ‘జర్నల్ ఆఫ్ ది ఇంటర్నేషనల్ సొసైటీ ఆఫ్ స్పోర్ట్స్ న్యూట్రిషన్’లో ఒక అధ్యయనం ఈ నిలకడైన శక్తి విడుదల కొవ్వులు, కెఫిన్ కలయిక వల్లనే అని పేర్కొంది.

బ్లాక్ కాఫీని నెయ్యితో తాగడం వల్ల ఏదైనా దుష్ప్రభావాలు ఉన్నాయా?

ఈ బుల్లెట్ కాఫీ లేదా నెయ్యి కాఫీని రోజూ ఆనందించవచ్చు. కానీ మీరు దానిని అతిగా తీసుకోకుండా చూసుకోండి. నెయ్యిలో సంతృప్త కొవ్వులు పుష్కలంగా ఉంటాయి. కాబట్టి ఎక్కువ తీసుకోవడం వల్ల బరువు పెరగడం, అధిక కొలెస్ట్రాల్ లేదా అధిక కేలరీల వినియోగం జరగవచ్చు. “గుండె జబ్బులు లేదా అధిక కొలెస్ట్రాల్ ఉన్నవారు ఎక్కువ జాగ్రత్తగా ఉండాలి” అని చావ్లా హెచ్చరిస్తున్నారు. అలాగే, రోజుకు చాలా కప్పుల కాఫీ తాగడం వల్ల మీ కెఫిన్ తీసుకోవడం పెరుగుతుంది. ఇది జీర్ణ అసౌకర్యం లేదా ఇతర సమస్యలను కలిగించవచ్చు. కాబట్టి, రోజుకు ఒకటి లేదా రెండు కప్పుల బ్లాక్ కాఫీని నెయ్యితో తీసుకోండి.

ఇంట్లో నెయ్యి కాఫీ ఎలా తయారు చేయాలి?

• ఒక సాస్ పాన్ తీసుకుని, 1 కప్పు నీరు, 1 టేబుల్ స్పూన్ కాఫీ (మీరు చిక్కగా ఇష్టపడితే ఎక్కువ కాఫీ కలపండి) వేయండి.
• అది కొద్దిగా మరిగే వరకు ఉంచండి.
• వేడి కాఫీలో 1 టీస్పూన్ నెయ్యి వేసి, మరో 2 నిమిషాలు మరిగించండి.
• మంట ఆపి బ్లెండ్ చేయడానికి ముందు కొద్దిగా చల్లబరచండి.
• కాఫీని బ్లెండర్ లోకి పోయండి. లేదా హ్యాండ్ బ్లెండర్ ఉపయోగించండి.
• మీరు ఇష్టపడితే పాలు కలుపుకోవచ్చు.
• మెత్తగా, క్రీమీగా అయ్యే వరకు 15-20 సెకన్లు బ్లెండ్ చేయండి.
• కప్పులో పోసి, వెచ్చగా ఉన్నప్పుడే ఆనందించండి. (అతిగా బ్లెండ్ చేయవద్దు. ఎందుకంటే ఎక్కువ బ్లెండింగ్ కొవ్వును వేరు చేస్తుంది.)

నెయ్యి కాఫీ లేదా బుల్లెట్ కాఫీ ఎప్పుడు తాగాలి?

“ఉత్తమ ఫలితాల కోసం, నెయ్యి కాఫీని ఉదయం ఖాళీ కడుపుతో తాగండి” అని చావ్లా సూచిస్తున్నారు. ఇది మీ మెటబాలిజంను ప్రారంభించడానికి, జీర్ణక్రియకు సహాయకారిగా ఉండడానికి, రోజంతా స్థిరమైన శక్తిని అందించడానికి సహాయపడుతుంది. నిజానికి, ఉదయం పూట మీ చక్కెర పానీయాలైన నారింజ రసం లేదా టీకి ఇది ఒక గొప్ప ప్రత్యామ్నాయం.