ధనుష్, నాగర్జున, రష్మిక మందన్న మరియు ఇతరులు నటించిన తెలుగు-తమిళ చిత్రం కుబేర శుక్రవారం (జూన్ 20) థియేటర్లలో విడుదలైంది. శేఖర్ కమ్ముల దర్శకత్వంలో తెరకెక్కిన ఈ చిత్రం తెలుగు ప్రేక్షకుల నుంచి మంచి స్పందనను పొందుతోంది. బాక్స్ ఆఫీస్ వసూళ్లు మొదటి రోజు నుంచి బలంగా ఉన్నాయి. ఈ నేపథ్యంలో శనివారం (జూన్ 21) కుబేర మూవీ సక్సెస్ మీట్ నిర్వహించారు. ఇందులో మాట్లాడుతూ నాగార్జున్ ఇంట్రెస్టింగ్ కామెంట్లు చేశారు.

తన పాత్ర చుట్టూ

శనివారం జరిగిన కుబేర చిత్ర విజయోత్సవ సభలో, చిత్రంలో చాలా ముఖ్యమైన పాత్ర పోషించిన నాగార్జున తన పాత్ర చిత్రంలో ప్రధాన పాత్ర అని, కథ అంతా తన చుట్టూ తిరుగుతుందని చెప్పారు.

“ఈ చిత్రంలో నేనే ప్రధాన పాత్రని. మిగతావన్నీ నా చుట్టూ తిరుగుతాయి. నాకు దక్కిన స్క్రీన్ స్పేస్ వేరేగా ఉండవచ్చు. కానీ అది నాకు ప్రమాణం కాదు. మొదటి నుంచి చివరి వరకు ఇది దీపక్ చిత్రం. శేఖర్ కూడా నాకు వివరించినప్పుడు అలాగే చెప్పాడు. నా పాత్ర కూడా అలాగే ఉంది. అందుకే నాకు నచ్చింది’’ అని నాగార్జున అన్నారు.

గ్రే షేడ్స్ ఉన్న క్యారెక్టర్

కుబేర చిత్రంలో నాగర్జున గ్రే షేడ్స్ ఉన్న పాత్ర పోషించారు. విలనిజం పండించారు. అలాగే తర్వాత మరో యాంగిల్ లోనూ అలరించారు. కుబేర సినిమాలో తెలుగు నటుడు నాగార్జున మాజీ సీబీఐ అధికారి దీపక్ తేజ్ పాత్రను పోషించారు. ఛాలెంజింగ్ గా ఉండే ఆ పాత్ర లో తెలివితేటలుండే మాజీ ఆఫీసర్, గ్రే షేడ్స్ ఉన్న వ్యక్తిగా నాగార్జున అదరగొట్టారు. కుబేర సినిమాలో నాగార్జున యాక్టింగ్ వేరే లెవల్ అంటూ ఫ్యాన్స్ తో పాటు సెలబ్రిటీలు కూడా తెగ పొగిడేస్తున్నారు.

రూ.13 కోట్లు

శేఖర్ కమ్ముల దర్శకత్వం వహించిన కుబేర మూవీ తొలి రోజు కలెక్షన్లు ఫర్వాలేదనిపించాయి. ఇండియాలో ఈ సినిమా రూ. 13 కోట్లు నెట్ వసూలు చేసింది. ధనుష్ ఈ చిత్రంలో ఓ భిక్షగాడి పాత్ర పోషించగా, అతని నటన పై కూడా అభిమానులు, విమర్శకులు ప్రశంసలు కురిపిస్తున్నారు.

నాగార్జున తదుపరి లోకేష్ కనగరాజ్ దర్శకత్వంలో వచ్చే రజినీకాంత్ కూలీ చిత్రంలో ముఖ్యమైన పాత్ర పోషిస్తున్నారు. ఈ చిత్రం ఆగస్టు 14న థియేటర్లలో విడుదల కానుంది. ఇందులో ఉపేంద్ర, ఆమిర్ ఖాన్, సౌబిన్ షాహిర్ మరియు ఇతరులు నటించారు.