దుబాయ్‌లో నివసిస్తున్న ఒక భారతీయ వ్యాపారవేత్త చేసిన పని ఇప్పుడు సోషల్​ మీడియాలో వైరల్​గా మారింది. ఫాధర్స్​ డే సందర్భంగా.. ఏడాది వయస్సున్న తన కూతురికి ఆయన కస్టమైజ్డ్​ పింక్ రోల్స్ రాయిస్ కారును బహుమతిగా ఇచ్చాడు.

ఏడాది వయస్సున్న కూతురికి రోల్స్​ రాయిస్​..

ఇన్‌స్టాగ్రామ్‌లో షేర్ చేసిన ఒక వీడియోలో.. ANAX డెవలప్‌మెంట్స్ వ్యవస్థాపకుడు సతీష్ సాన్‌పాల్, తన భార్య తబిందా సాన్‌పాల్‌తో కలిసి తమ ఏడాది కూతురు ఇసాబెల్లా సాన్‌పాల్‌కు లగ్జరీ కారు తాళాలను బహుమతిగా ఇస్తూ కనిపించారు.

ఆ వీడియోలో మెరిసే మెటాలిక్ పింక్ కారు, దాని లోపల ఉన్న ఆల్-పింక్ లగ్జరీ ఇంటీరియర్స్ కనిపించాయి. కారు నేమ్‌ప్లేట్‌పై “అభినందనలు, ఇసాబెల్లా” అని రాసి ఉంది. అలాగే, కారు లోపల కింద ఉన్న ఒక చిన్న నోట్ ప్రకారం.. ఈ కారును పసిపాప కోసం ఇంగ్లాండ్‌లో కస్టమ్-మేడ్ చేసి, ఈ సందర్భం కోసం యూఏఈకి దిగుమతి చేసుకున్నారు. కారు సీట్లపై చిన్నారి పేరులోని మొదటి అక్షరాలు కూడా ఉన్నాయి.

వీడియో క్లిప్‌లో.. ఈ కుటుంబం తమ రోల్స్ రాయిస్ కారులో వచ్చి చిన్నారికి బహుమతిగా తెచ్చిన కస్టమ్ కారును తీసుకెళ్లడం చూడవచ్చు. కారు తాళాలు అందజేసే ముందు చిన్నారిని నృత్యం, సంగీతంతో అలరించారు. అనంతరం ఆమె తన కారులో మొదటిసారి కూర్చుంది. “సతీష్ సాన్‌పాల్ ఫాధర్స్​ డే విజేతగా నిలిచాడు. అతను తన అమూల్యమైన చిన్నారి ఇసాబెల్లా సతీష్ సాన్‌పాల్ కోసం దుబాయ్‌లో కస్టమ్-బిల్ట్ రోల్స్ రాయిస్‌ను బహుమతిగా ఇచ్చాడు. ఇది ఒక ‘దుబాయ్ డాడ్’ యాక్ట్​,” అని ఆ పోస్ట్ క్యాప్షన్ పేర్కొంది.

వీడియోను ఇక్కడ చూడండి:

గతంలోనూ భారీ వేడుకలు..

ఈ భారతీయ వ్యాపారవేత్త తన చిన్నారి కోసం ఇలా భారీగా ఖర్చు చేయడం ఇదే మొదటిసారి కాదు! గత ఫిబ్రవరిలో, సాన్‌పాల్ తన కుమార్తె మొదటి పుట్టినరోజును దుబాయ్‌లోని అట్లాంటిస్ ది రాయల్‌లో అత్యంత ఘనంగా జరిపారు. ఈ అల్ట్రా-లగ్జరీ వేడుకలో రాహత్ ఫతే అలీ ఖాన్, తమన్నా భాటియా, అతిఫ్ అస్లాం, నోరా ఫతేహి వంటి ప్రముఖ బాలీవుడ్ సెలబ్రిటీలు పాల్గొన్నారు.

ఆ లగ్జరీ హోటల్‌ను వింటర్ వండర్‌ల్యాండ్‌గా మార్చారు. ఇందులో మంచుతో చేసిన షాన్డిలియర్‌లు, నేలపై కృత్రిమ మంచు, శీతాకాలపు తెల్లని చెట్లు ఏర్పాటు చేశారు. గత సంవత్సరం లండన్‌లో ఫిబ్రవరి 25న పుట్టిన ఆ చిన్నారి, డిస్నీ ప్రిన్సెస్‌కు సరిపోయే బాల్ గౌను ధరించి, ఒక అద్భుతమైన క్యారేజ్‌లో వేడుకకు చేరుకుంది.