తెలంగాణలో అత్యవసర సేవల కోసం కొత్త నెంబర్ అమల్లోకి వచ్చింది. ఇక మీదట అన్ని అత్యవసర సేవలకు 112కు డయల్ చేయాలని ప్రభుత్వం ప్రకటన చేసింది. పోలీస్‌, ఫైర్‌, రోడ్డు ప్రమాదాలు, మెడికల్‌, ఉమెన్‌, చిల్డ్రన్ వంటి అత్యవసర సేవల కోసం ఈ నెంబర్ ను సంప్రదించాలని సూచించింది. 112కు డయల్‌ చేయగానే జీపీఎస్‌ ద్వారా ట్రాక్‌ చేసి నేరుగా సేవలు అందుతాయని పేర్కొంది. ప్యానిక్‌ బటన్‌ని గట్టిగా నొక్కితే ఆండ్రాయిడ్‌ ఫోన్‌ నుంచి 112కి కాల్ వెళ్తుందని తెలిపింది.

నిరంతర సేవలు…

దేశవ్యాప్తంగానూ ఇదే అత్యవసర సేవల నంబర్‌గా కొనసాగుతోంది. తాజాగా మన రాష్ట్రంలోనూ అమలు చేస్తున్నారు. హైదరాబాద్ లోని ఇంటిగ్రేటెడ్‌ కమాండ్‌ అండ్‌ కంట్రోల్‌ సెంటర్‌ కేంద్రంగా ఎమర్జెన్సీ రెస్పాన్స్‌ సపోర్ట్‌ సిస్టమ్‌ (ఈఆర్‌ఎస్‌ఎస్‌) రూపంలో ఈ సరికొత్త వ్యవస్థ అందుబాటులోకి వచ్చింది. 24 గంటలపాటు ఈ సేవలు అందించేలా ఏర్పాట్లు చేశారు.

• ఈ 112 నెంబర్ మొబైల్ లేదా ల్యాండ్‌లైన్ నుండి 24×7 పని చేస్తుంది.
• నేరాలు, ఫైర్, రోడ్డుప్రమాదాలాంటి ఘటనలు చోటుచేసుకున్న సందర్భాల్లో బాధితులు ఈ నంబర్‌కు డయల్‌ చేసి ఆయా విభాగాల నుంచి సహాయం పొందేలా వ్యవస్థను రూపొందించారు.
• కాల్ చేసిన వెంటనే జీపీఎస్ ద్వారా కాలర్ యొక్క లొకేషన్ ఆటోమేటిక్‌గా ట్రాక్ చేస్తారు. దీనివల్ల సమీపంలోని పోలీసు వాహనం, అంబులెన్స్ లేదా అగ్నిమాపక వాహనం త్వరగా సంఘటన స్థలానికి చేరుకుంటుంది.
• స్మార్ట్‌ఫోన్ వినియోగదారులు ఫోన్‌లో పవర్ బటన్‌ను మూడు సార్లు వేగంగా నొక్కితే 112కి పానిక్ కాల్ యాక్టివేట్ అవుతుంది.
• 112 ఇండియా మొబైల్ యాప్ కూడా అందుబాటులో ఉంది. దీన్ని గూగుల్ ప్లే స్టోర్, యాపిల్ స్టోర్‌ నుంచి డౌన్లోడ్ చేసుకోవచ్చు.
• ప్రస్తుతం తెలంగాణ ఇంటిగ్రేటెడ్‌ కమాండ్‌ అండ్‌ కంట్రోల్‌ సెంటర్‌ లో ప్రయోగాత్మకంగా అందిస్తున్న ఈ సేవలను త్వరలోనే పూర్తిస్థాయిలో అందుబాటులోకి తీసుకురానున్నారు.