యువ సామ్రాట్ నాగచైతన్య, సాయిపల్లవి హీరోహీరోయిన్లుగా నటించిన తండేల్ సినిమా బాక్సాఫీస్ వద్ద సక్సెస్ అయింది. నిజజీవిత ఘటనల ఆధారంగా తెరకెక్కిన ఈ రొమాంటిక్ థ్రిల్లర్ చిత్రం ఫిబ్రవరి 7వ తేదీన థియేటర్లలో విడుదలైంది. రూ.100కోట్లకు పైగా కలెక్షన్లతో బ్లాక్‍బస్టర్ సాధించింది. ఓటీటీలోనూ ఈ చిత్రం అదరగొట్టింది. ఇప్పుడు తొలిసారి టీవీలో ప్రసారమయ్యేందుకు తండేల్ మూవీ రెడీ అయింది.

టెలికాస్ట్ డేట్, టైమ్

తండేల్ సినిమా జూన్ 29వ తేదీన సాయంత్రం 6 గంటలకు జీ తెలుగు టీవీ ఛానెల్‍లో టెలికాస్ట్ కానుంది. కొంతకాలంగా త్వరలో ప్రసారం అంటూ ఆ ఛానెల్ చెబుతూ వస్తోంది. ఎట్టకేలకు ఇప్పుడు డేట్, టైమ్ కన్ఫర్మ్ చేసింది. జూన్ 29న సాయంత్రం 6 గంటలకు తండేల్ టీవీ ప్రీమియర్ అంటూ జీ తెలుగు అధికారికంగా ఓ ప్రోమో తీసుకొచ్చింది.

మత్స్యకారుడిగా చైతూ.. యథార్థ ఘటనల ఆధారంగా..

తండేల్ చిత్రంలో మత్య్సకారుడు రాజు పాత్రను నాగచైతన్య పోషించారు. పాకిస్థాన్ జైలులో కొన్ని నెలల పాటు చిత్రహింసలు అనుభవించి స్వదేశం భారత్‍కు తిరిగి వచ్చిన శ్రీకాకుళం మత్స్యకారుల నిజజీవిత ఘటనల ఆధారంగా ఈ చిత్రం రూపొందింది. ఈ సినిమాను డైరెక్టర్ చందూ మొండేటి తెరకెక్కించారు. లవ్ స్టోరీ, ఎమోషన్స్, దేశభక్తి అంశాలతో ఈ చిత్రాన్ని రూపొందించారు. ఈ మూవీలో బుజితల్లి అలియాజ్ సత్య పాత్రను సాయిపల్లవి పోషించారు.

తండేల్ కలెక్షన్లు

తండేల్ సినిమా పాజిటివ్ టాక్‍తో థియేట్రికల్ రన్‍లో అదరగొట్టింది. ఈ చిత్రం సుమారు రూ.100కోట్ల గ్రాస్ కలెక్షన్లను సొంతం చేసుకుంది. ఈ మూవీకి దాదాపు రూ.75కోట్ల బడ్జెట్ అయిందని అంచనా. ఈ సినిమాను గీతా ఆర్ట్స్ పతాకంపై బన్నీ వాసు నిర్మించగా.. అల్లు అరవింద్ సమర్పించారు.

ఏ ఓటీటీలో..

తండేల్ సినిమా నెట్‍ఫ్లిక్స్ ఓటీటీ ప్లాట్‍ఫామ్‍లో స్ట్రీమ్ అవుతోంది. తెలుగుతో పాటు హిందీ, తమిళం, కన్నడ, మలయాళంలో అందుబాటులో ఉంది. ఓటీటీలోనూ ఈ సినిమాకు భారీగానే వ్యూస్ దక్కాయి. స్ట్రీమింగ్ తర్వాత కూడా పాజిటివ్ రెస్పాన్స్ దక్కించుకుంది. మరి జూన్ 29న జీ తెలుగులో ప్రసారమయ్యే ఈ చిత్రానికి ఎంత టీఆర్పీ వస్తుందనేది చూడాలి.

తండేల్ చిత్రంలో నాగచైతన్య, సాయిపల్లవి సహా ఆడుకాలం నరేన్, ప్రకాశ్ బెలవాది, దివ్య పిళ్లై కరుణాకరన్, బబ్లూ పృథ్విరాజ్, చరణ్‍దీప్, కల్పలత కీలకపాత్రల్లో నటించారు. ఈ సినిమాకు దేవీశ్రీప్రసాద్ సంగీతం అందించారు. ఈ మూవీ సక్సెస్‍కు మ్యూజిక్ కూడా ఓ కారణంగా నిలిచింది. ఈ చిత్రానికి షందత్ సైనుద్దీన్ సినిమాటోగ్రఫీ చేశారు.