ఓటీటీలోకి ఈ వారం ఎన్నో ఇంట్రెస్టింగ్ మూవీస్, వెబ్ సిరీస్ వస్తున్నాయి. అయితే ఒక్క సన్ నెక్ట్స్ ఓటీటీలోకే రెండు రోజుల వ్యవధిలో రెండు సూపర్ హిట్ సినిమాలు రానుండటం విశేషం. వీటిలో ఒకటి వరలక్ష్మి శరత్ కుమార్ నటించిన క్రైమ్ థ్రిల్లర్ ది వర్డిక్ట్ ఒకటి కాగా.. మరొకటి మలయాళం థ్రిల్లర్ మూవీ ఆజాదీ.

సన్ నెక్ట్స్ ఓటీటీలోకి రెండు సినిమాలు

ప్రముఖ ఓటీటీ సన్ నెక్ట్స్ ఈవారం రెండు ఇంట్రెస్టింగ్ సినిమాలను ప్రేక్షకుల ముందుకు తీసుకొస్తోంది. ముందుగా వచ్చే గురువారం (జూన్ 26) వరలక్ష్మి శరత్ కుమార్ నటించిన తమిళ క్రైమ్ డ్రామా ది వర్డిక్ట్ (The Verdict)ను తీసుకొస్తోంది. ఆ మరుసటి రోజే అంటే శుక్రవారం (జూన్ 27) మలయాళం థ్రిల్లర్ సినిమా ఆజాదీ (Azadi) కూడా ఈ ఓటీటీలోకే రానుంది.

ఈ రెండు సినిమాల స్ట్రీమింగ్ విషయాన్ని కొన్ని రోజులుగా చెబుతూ వస్తున్న సన్ నెక్ట్స్.. తాజాగా సోమవారం (జూన్ 23) మరోసారి తన ఎక్స్ అకౌంట్ లో ఈ విషయం తెలిపింది. ఈ రెండింటికీ థియేటర్లలో ఓ మోస్తరు రెస్పాన్స్ వచ్చింది. వీటిలో ఆజాదీ మూవీ ఇటు సన్ నెక్ట్స్ తోపాటు అదే రోజు మనోరమ మ్యాక్స్ ఓటీటీలోనూ స్ట్రీమింగ్ కానుంది.

ది వర్డిక్ట్ మూవీ గురించి..

ది వర్డిక్ట్ మూవీని కృష్ణ శంకర్ డైరెక్ట్ చేశాడు. ఓ ధనవంతురాలైన ఓ అమెరికన్ మహిళను హత్య చేసినట్లుగా ఓ ఇండియన్ మహిళపై ఆరోపణలు వస్తాయి. ఆమెను ఎంతగానో ప్రేమించే భర్త.. తన భార్యను ఈ కేసు నుండి బయటపడేయడానికి ప్రయత్నిస్తాడు. ఇందులో నమ్రత అనే ఇండియన్ మహిళ పాత్రలో శృతి హరహరన్ నటించింది.

ఇక హత్యకు గురయ్యే అమెరికన్ మహిళ ఎలిజాగా సుహాసిని కనిపించింది. నమ్రత తరఫున కోర్టులో వాదించే లాయర్ గా వరలక్ష్మి శరత్ కుమార్ ఈ సినిమాలో నటించింది. ఈ సినిమా ఓ కోర్ట్ రూమ్ డ్రామానే కాదు.. ఇందులో ఓ లవ్ స్టోరీ, రివేంజ్, థ్రిల్లర్ అంశాలు కూడా ఉన్నాయని రిలీజ్ కు ముందు శృతి చెప్పింది.

ది వర్డిక్ట్ మూవీలో నమ్రత, ఎలిజా మంచి ఫ్రెండ్స్ గా ఉంటారు. ఎలిజా తన వీలునామాను నమ్రతకు కూడా భారీ లబ్ధి చేకూరేలా రూపొందిస్తుంది. దీంతో ఎలిజా హత్యలో నమ్రతే ప్రధాన అనుమానితురాలిగా ఉంటుంది. మరి ఆమె నిజంగానే తన ఫ్రెండ్ ను చంపిందా లేదా అన్నదే ఈ ది వర్డిక్ట్ మూవీ కథ. అడ్వొకేట్ మాయ పాత్రలో వరలక్ష్మి నటించింది.

ఆజాదీ మూవీ గురించి..

ఆజాదీ మూవీని జో జార్జ్ డైరెక్ట్ చేశాడు. ఇందులో మంజుమ్మెల్ బాయ్స్ మూవీ హీరో శ్రీనాథ్ భాసితోపాటు వాణీ విశ్వనాథ్, లాల్, సైజు కురుప్, రవీనా రవిలాంటి వాళ్లు నటించారు. ఈ సినిమాను నిజ జీవిత ఘటనల ఆధారంగా తెరకెక్కించారు. ఈ మూవీ కొట్టాయం మెడికల్ కాలేజీలోనే ఎక్కువగా ఉంటుంది. గంగా అనే ఓ మహిళ చుట్టూ తిరిగే కథ. గర్భవతి అయిన ఆమె ఓ రాజకీయ నేత కొడుకు హత్య కేసులో జైలుకు వెళ్తుంది.

అయితే ప్రసవం కోసం ఆమెను హాస్పిటల్లో చేరుస్తారు. అక్కడి నుంచే ఆమెను తప్పించేందుకు భర్త ప్లాన్ చేస్తాడు. అయితే వాళ్ల గతం ఆ ప్లాన్ ను దెబ్బ తీస్తుంది. వాళ్ల ప్రత్యర్థులు ఆ హాస్పిటల్లోకి ప్రవేశిస్తారు. అక్కడి నుంచి వాళ్లు తప్పించుకోవడం కాదు కదా.. తమ ప్రాణాలు కాపాడుకోవడానికే కష్ట పడాల్సి వస్తుంది. మరి ఆ భార్యాభర్తలు అక్కడి నుంచి తప్పించుకుంటారా లేదా అన్నదే ఈ ఆజాదీ మూవీ స్టోరీ.