తెలంగాణ కేబినెట్‌ సుదీర్ఘంగా కొనసాగింది. ముఖ్యమంత్రి రేవంత్ రెడ్డి అధ్యక్షతన జరిగిన ఈ సమావేశంలో కీలక నిర్ణయాలు తీసుకున్నారు. చౌటుప్పల్ నుంచి సంగారెడ్డి వరకు ఉన్న రీజనల్ రింగ్ రోడ్డు పనుల నిర్మాణ కోసం మంత్రివర్గం గ్రీన్ సిగ్నల్ ఇచ్చింది. కాళేశ్వరం ప్రాజెక్టుపై పీసీ ఘోష్‌ కమిషన్‌ రాష్ట్ర ప్రభుత్వానికి రాసిన లేఖపై సుదీర్ఘ చర్చ జరిగింది. పీసీ ఘోష్ కమిషన్‌కు ఈ నెల 30లోగా పూర్తి వివరాలు ఇవ్వాలని కేబినెట్‌ నిర్ణయం తీసుకుంది. కేబినెట్ నిర్ణయాలను మంత్రి పొంగులేటి శ్రీనివాస్ రెడ్డి వెల్లడించారు.

తెలంగాణ కేబినెట్ భేటీ – నిర్ణయాలు:

• మంగళవారం రైతు భరోసా విజయోత్సవ సభ నిర్వహణ ఉంటుంది. కేబినెట్ మంత్రులు అందరూ హాజరు అవుతారు. రాష్ట్రంలోని అన్ని మండల కేంద్రాలు , గ్రామాల్లో కూడా సంబరాలు నిర్వహించాలని నిర్ణయం.
• రాష్ట్రంలోని అన్ని జిల్లా కలెక్టరేట్ లలో తెలంగాణ తల్లి విగ్రహం, నవంబర్ 9 లోపు ఏర్పాటుకు నిర్ణయం.
• RRR చౌటుప్పల్ నుండి సంగారెడ్డి వరకు ఉన్న రీజినల్ రింగ్ రోడ్డు కు ఆమోదం.
• బనకచర్ల ప్రాజెక్ట్ పై కేబినెట్ సుదీర్ఘ చర్చ. గోదావరి వాటా విషయంలో ఒక్క చుక్క కూడా వదులుకోవద్దని నిర్ణయం. దీనికోసం ఎంత దూరమైన వెళ్ళడానికి సిద్ధంగా ఉన్నట్లు మంత్రి పొంగులేటి వెల్లడించారు.
• BRS ఉండగానే బనకచర్ల మొదలైందని మంత్రి పొంగులేటి తెలిపారు. పూర్తి వివరాలు కొద్ది రోజుల్లో ప్రజా ప్రతినిదులు అందరితో మళ్లీ ఒక ప్రజెంటేషన్ ఉంటుందని చెప్పారు.
• విభజన సమస్యల పై ఇప్పటికే ఉన్న కమిటీలతో త్వరలోనే హై లెవల్ మీటింగ్ కు కేబినెట్ నిర్ణయం.
• కొత్త క్రీడా పాలసీకి రాష్ట్ర కేబినెట్ ఆమోదం
• నెలకు రెండు సార్లు కేబినెట్ సమావేశం కావాలని నిర్ణయం. ఈ సమావేశాల ప్రోగ్రెస్ పై ప్రతి మూడు నెలలకు ఒకసారి సమీక్ష.
• జిన్నారం , ఇస్నాపూర్ లను మున్సిపాలిటీలుగా ఏర్పాటు చేస్తూ కేబినెట్ నిర్ణయం.