మధ్యప్రాచ్యంలో పరిస్థితులు ఒక థ్రిల్లర్​ సినిమాను తలపిస్తూ సోమవారం అర్థరాత్రి కీలక మలుపులు తిరిగాయి. తమ అణు కేంద్రాలపై అమెరికా దాడులు చేయడంతో.. ప్రతీకారం తీర్చుకునేందుకు, ఖతార్​లోని అగ్రరాజ్య మిలిటరీ స్థావరాలపై ఇరాన్​ దాడులు చేసింది. వాస్తవానికి ఈ పరిణామాలు ప్రపంచ దేశాలను అత్యంత ఆందోళనకు గురిచేశాయి. కానీ.. దాడులు ముగిసిన కొద్దిసేపటికే, అమెరికా అధ్యక్షుడు డొనాల్డ్​ ట్రంప్​ తన ట్రూత్​ సోషల్​ మీడియా వేదికగా ఒక కీలక ప్రకటన చేశారు. ఇజ్రాయెల్​- ఇరాన్​ మధ్య పూర్తిస్థాయి కాల్పుల విరమణ అమలవుతుందని తెలిపారు. ఫలితంగా, 12 రోజుల యుద్ధానికి ముగింపు పడినట్టు వెల్లడించారు.

అమెరికా స్థావరాలపై ఇరాన్​ దాడులు..

ప్రపంచంలోనే అత్యంత శక్తివంతమైన బీ-2 బాంబర్లను ఉపయోగించి.. గత శనివారం అర్థరాత్రి ఇరాన్​లోని 3 కీలక అణు స్థావరాలపై అమెరికా దాడులు చేసిన విషయం తెలిసిందే (పూర్తి వివరాల కోసం ఇక్కడ క్లిక్​ చేయండి). ఆ దాడులను తీవ్రంగా పరిగణించిన ఇరాన్​.. ప్రతీకారం తీర్చుకుంటామని ప్రకటించింది. ఈ నేపథ్యంలోనే ఖతార్​లోని అమెరికా మిలిటరీ స్థావరమైన అల్​- అదీద్​ ఎయిర్​ బేస్​పై ఇరాన్​ మిసైల్​ దాడులకు పాల్పడింది. ఈ అల్​- అదీద్​ ఎయిర్​బేస్​ అనేది మధ్యప్రాచ్యంలో అమెరికాకు అతిపెద్ద వ్యూహాత్మక స్థావరం.

“ఇరాన్​ అణు స్థావరాలపై అమెరికా ఎన్ని మిసైళ్లతో దాడి చేసిందో, అన్నే మిసైళ్లతో మేము ఈరోజు దాడులు చేశాము. ఖతార్​లోని పట్టణ, నివాస ప్రాంతాలకు దూరంగా, పౌరులకు ఎలాంటి హాని కలగకుండా ఉండే విధంగా మా టార్గెట్​ని ఎంచుకున్నాము,” అని ఇరాన్​ సుప్రీమ్​ నేషనల్​ సెక్యూరిటీ కౌన్సిల్​ ఒక ప్రకటన చేసింది.

ఈ పరిణామాలతో ప్రపంచం ఉల్లిక్కిపడింది. ఖతార్, ఇరాక్​, యూఏఈ, బహ్రైన్​, కువైట్​లు​ తన గగనతలాన్ని మూసివేశాయి. అనేక దేశాలు ఖతార్​కు విమాన సేవలను నిలిపివేశాయి. మధ్యప్రాచ్యంలోని భారతీయులు సహనంతో, జాగ్రత్తగా ఉండాలని భారత్​ సూచించింది.

అయితే ఇరాన్​ దాడులు జరిగిన కొన్ని గంటలకు.. ఈ పూర్తి వ్యవహారంపై అమెరికా అధ్యక్షుడు డొనాల్డ్​ ట్రంప్​ స్పందించారు. తమ మిలిటరీ స్థావరాలపై దాడులు చేయబోతున్నట్టు ఇరాన్​ తమకు ముందే చెప్పిందని, తద్వారా ఎలాంటి ప్రాణ నష్టం జరగలేదని పేర్కొన్నారు.

“ఒక్క అమెరికా పౌరుడికి కూడా హానీ జరగలేదని చెప్పేందుకు నాకు సంతోషంగా ఉంది. అసలు మనకి డ్యామేజ్​ కూడా జరగలేదు. ఇక భవిష్యత్తులో ఎలాంటి ధ్వేషం ఉండదని భావిస్తున్నాను. ఇక ఇరాన్​ ఇప్పుడు ఆ ప్రాంతంలో శాంతి కోసం అడుగులు వేయొచ్చు. ఇజ్రాయెల్​ కూడా అదే పని చేయాలని నేను ప్రోత్సహిస్తాను. ప్రపంచానికి నా శుభాకాంక్షలు. ఇది శాంతి సమయం,” అని ట్రంప్​ అన్నారు.

ఇజ్రాయెల్​- ఇరాన్​ కాల్పుల విరమణ!

అనంతరం.. ఇజ్రాయెల్​- ఇరాన్​ మధ్య కొనసాగుతున్న ఉద్రిక్తతలకు ముగింపు పడినట్టు అమెరికా అధ్యక్షుడు డొనాల్డ్​ ట్రంప్​ ప్రకటించారు. ఈ మేరకు.. 12 రోజుల యుద్దం అధికారికంగా ముగిసిందని ఆయన తన ట్రూత్​ సోషల్​ మీడియా వేదికగా వ్యాఖ్యానించారు.

“అందరికి శుభాకాంక్షలు. ఇజ్రాయెల్​- ఇరాన్​ దేశాలు పూర్తిస్థాయి కాల్పుల విరమణకు అంగీకరించాయి. (ఇప్పటి నుంచి ఆరు గంటల్లో కాల్పుల విరమణ ఉంటుంది. ఈలోపు ఇరు వర్గాలు మొదలుపెట్టిన ఫైనల్​ మిషన్స్​ని పూర్తి చేసుకుంటాయి). 24 గంటల్లోపు దశలవారీగా కాల్పుల విరమణ అమలవుతుంది. ఆ తర్వాత యుద్ధం పూర్తిగా ముగిసిపోయిందని మనం అనుకోవచ్చు,” అని ట్రంప్​ అన్నారు.

కాగా ట్రంప్​ కాల్పుల విరమణ ప్రకటనపై ఇజ్రాయెల్​, ఇరాన్​లు ఇంకా ఎలాంటి ప్రకటన చేయలేదు.

“యుద్ధం ఏళ్ల తరబడి కొనసాగేది. మధ్యప్రాచ్యాన్ని పూర్తిగా నాశనం చేసేది. కానీ అలా జరగలేదు. అలా జరగదు,” అని ట్రంప్​ చెప్పుకొచ్చారు.