మహారాష్ట్రలో అత్యంత దారుణ ఘటన వెలుగులోకి వచ్చింది! నీట్​ మాక్​ టెస్ట్​లో తక్కువు మార్కులు వచ్చాయన్న కారణంతో సొంత కూతురిని దారుణంగా కొట్టి చంపేశాడు ఓ తండ్రి. అనంతరం పోలీసుల వద్ద నేరాన్ని అంగీకరించాడు.

ఇదీ జరిగింది..

మహారాష్ట్ర సాంగ్లీలో కొన్ని రోజుల క్రితం జరిగింది ఈ ఘటన. సాధ్న భోన్స్​లే ఒక టాపర్​! క్లాస్​ 10 బోర్డు పరీక్షల్లో 92.60శాతం సాధించింది. అనంతరం ఎంబీబీఎస్​ చేసేందుకు బైపీసీలో చేరింది. కాగా ఇటీవలే ఆమె నీట్​ (నేషనల్​ ఎలిజిబిలిటీ కమ్​ ఎంట్రెన్స్​ టెస్ట్​) మాక్​ టెస్ట్​ రాసింది. ఆ ప్రాక్టీస్​ టెస్ట్​లో ఆమెకు తక్కువ మార్కులు వచ్చాయి. ఇది ఆ 17ఏళ్ల బాలిక తండ్రి ధోందిరామ్​ భోన్స్​లేకి నచ్చలేదు.

ధోందిరామ్​ ఒక స్కూల్​ టీచర్​. తక్కువ మార్కులు వస్తే, నిరుత్సాహపడకుండా మళ్లీ ప్రయత్నించాలని చెప్పాల్సింది పోయి.. కన్న కూతురిని దారుణంగా కొట్టాడు ఆ తండ్రి. కర్రతో ఇష్టమొచ్చినట్టు కొట్టాడు. ఆ 12వ తరగతి విద్యార్థికి తీవ్ర గాయలయ్యాయి. ఆమెను ఆసుపత్రికి తరలించగా గత శుక్రవారం ప్రాణాలు విడిచింది.

సాధ్న భోన్స్​లే తలకు గాయమవ్వడంతో మరణించిందని సాంగ్లీలోని ఉషాకల్​ ఆసుపత్రి వర్గాలు తెలిపాయి. చికిత్స ప్రారంభించడానికి ముందే ఆమె మృతిచెందినట్టు వెల్లడించాయి.

తన భర్తపై ఆ కుతురి తల్లి పోలీసులకు ఫిర్యాదు చేసింది.

“బాలిక తల్లి నుంచి జూన్​ 22న మాకు ఫిర్యాదు వచ్చింది. నీట్​ మాక్​ టెస్ట్​లో తక్కువ మార్కులు వచ్చాయన్న కారణంతో తన భర్త, కూతురిని దారుణంగా కొట్టినట్టు ఆ మహిళ ఫిర్యాదులో పేర్కొంది,” అని పోలీసులు చెప్పారు.

ఘటనపై స్పందించిన పోలీసులు కేసు నమోదు చేసుకుని నిందితుడిని అరెస్ట్​ చేశారు. కాగా, దర్యాప్తులో ఆ నిందితుడు తన నేరాన్ని అంగీకరించినట్టు తెలుస్తోంది.

దేశంలోనే అత్యంత కఠినమైన పరీక్షల్లో నీట్​ ఒకటి. యేటా లక్షలాది మంది విద్యార్థులు ఈ పరీక్షలను రాస్తుంటారు. వీరిలో ఒత్తిడి స్థాయి అత్యధికంగా ఉంటుంది. ఆ ఒత్తిడి, తల్లిదండ్రులు అంచనాలు- ఆశలను తట్టుకోలేక ప్రతియేటా భారీ సంఖ్యలో విద్యార్థులు ఆత్మహత్యలకు పాల్పడుతున్నారు. కుటుంబం పిల్లలకు అండగా నిలబడాల్సిన సమయం ఇది. విఫలమైతే ఏమవ్వదు, విఫలమవ్వకపోతే సక్సెస్​ విలువ తెలియదు అని చెప్పాల్సింది పోయి.. మాక్​ టెస్ట్​లో తక్కువ మార్కులు వచ్చాయని కొట్టి చంపడం మానవజాతికే సిగ్గుచేటు!