ఎంతో ఆసక్తిగా ఎదురుచూసిన పంచాయత్ సీజన్ 4 వచ్చేసింది. కానీ, ఈసారి ప్రేక్షకులు నిరాశకు గురయ్యారు. గత మూడు సీజన్లతో పోలిస్తే ఈ సీజన్ ఆకట్టుకోలేకపోయింది. అంతేకాదు చివరి ఎపిసోడ్ మాత్రం చాలా మందికి నచ్చలేదని ఐఎండీబీ రేటింగ్ చూస్తే స్పష్టమవుతోంది. గత మూడు సీజన్లలో చివరి ఎపిసోడ్ కు అతి తక్కువగా 8.8 రేటింగ్ రాగా.. ఈసారి అంతకంటే కూడా దారుణమైన రేటింగ్ నమోదైంది.

పంచాయత్ 4.. నచ్చని క్లైమ్యాక్స్

పంచాయత్ కొత్త సీజన్ ఎప్పుడు వచ్చినా.. ఏదో ఒక కొత్తదనాన్ని అందిస్తూ వస్తుంది. ప్రారంభం నుంచి ఎన్నో మరపురాని జ్ఞాపకాలు, ఆనందాన్ని అభిమానులకు అందించింది. కానీ సీజన్ 4 మాత్రం గతంలో మాదిరిగా లేదు. సీజన్ 3 నుంచే ఈ మార్పుకు సంకేతాలు కనిపించాయి. ఇప్పుడు సీజన్ 4 ఆ సందేహాలను నిజం చేసింది. పంచాయత్ సిరీస్ ఐదో సీజన్‌తో ముగుస్తుందని తెలుస్తున్నప్పటికీ, సీజన్ 4 ముగింపు మాత్రం చాలా మందిని నిరాశపరిచింది.

ఐఎండీబీ రేటింగ్ చూస్తే ఈ విషయం తెలుస్తోంది. పంచాయత్ 4 చివరి ఎపిసోడ్ కు 8.2 రేటింగ్ మాత్రమే నమోదైంది. సిరీస్ ప్రారంభం నుంచి గతంలో వచ్చిన మూడు సీజన్లలోని చివరి ఎపిసోడ్ రేటింగ్స్ కంటే కూడా ఇది తక్కువగా ఉండటం గమనించాల్సిన విషయం.

గతంలో చివరి ఎపిసోడ్లు ఇలా..

పంచాయత్ మొదలైనప్పుడు, సీజన్ 1 ముగింపుకు 8.8 రేటింగ్ వచ్చింది. ఇది ప్రస్తుత ఎపిసోడ్‌ల రేటింగ్‌లకు చాలా దగ్గరగా ఉంటుంది. సీజన్ 4లోని కొన్ని ఎపిసోడ్‌లు కూడా ఇదే రేటింగ్‌ను కలిగి ఉన్నాయి. పంచాయత్ సీజన్ 2తో ప్రేక్షకులు తీవ్రమైన మార్పును గుర్తించారు. ఆ సీజన్ ముగింపుకు 9.6తో అత్యధిక రేటింగ్ నమోదైంది. ఏ సీజన్లో లేని విధంగా రెండో సీజన్ క్లైమ్యాక్స్ ప్రేక్షకులను భావోద్వేగానికి గురి చేసింది. దీంతో దానికి అత్యుత్తమ రేటింగ్ నమోదైంది.

ఇక అంతంతమాత్రంగానే అనిపించిన సీజన్ 3 ముగింపు కూడా పర్ఫెక్ట్ 9 స్కోర్ చేసింది. ఆ సీజన్ చివరి ఎపిసోడ్లో ప్రధాన్ పై దాడి జరగడం చూడొచ్చు. కానీ సీజన్ 4 మాత్రం ప్రేక్షకులను చాలా వరకు నిరాశపరిచినట్లు రేటింగ్ చూస్తే తెలుస్తోంది. 8.2 రేటింగ్ పంచాయత్ సిరీస్ రేంజ్ కు చాలా తక్కువే అని చెప్పాలి. క్లైమ్యాక్స్ లో ఏం జరిగిందన్నది చెబితే ఈ కొత్త సీజన్ చూసిన మజా ఉండదు. అందుకే ఆ ట్విస్ట్ ఏంటన్నది మీరు సిరీస్ చూసే తెలుసుకోండి.

పంచాయత్ సీజన్ 5తో ముగుస్తుందా?

పంచాయత్ సీజన్ 4 ఒక ఊహించని మలుపుతో ముగిసింది. సిరీస్ అలా ముగియకూడదని అభిమానులంతా ఆశించారు. సచివ్ జీ (జితేంద్ర కుమార్) ప్రియురాలు రింకీ పాత్ర పోషించిన నటి సాన్విక కూడా పంచాయత్ సీజన్ 5 వర్క మొదలైందని చెప్పింది.

అయితే ఈ సీజన్ తోనే ఇక ఈ సూపర్ హిట్ వెబ్ సిరీస్ కు ముగింపు పలకబోతున్నట్లు కూడా తెలుస్తోంది. ముఖ్యంగా సీజన్ 4 ముగిసిన తీరును బట్టి కొత్త సీజన్ ఎలా ఉండనుందో అన్న ఆసక్తి మొదలైంది. అయితే చివరి సీజన్ మాత్రం అభిమానులు ఆశించినట్లుగా ఉంటుందా లేదా అన్నది చూడాలి. ఈ నాలుగో సీజన్ కు వచ్చిన మిక్స్‌‌డ్ రివ్యూలతో మేకర్స్ ఐదో సీజన్ ను ఎలా ముగిస్తారో చూడాలి.