దంగల్ ఫేమ్, నటి ఫాతిమా సనా షేక్ తెలుసు కదా. ఆమె ఈ జులైలో రెండు రొమాంటిక్ డ్రామాల్లో కనిపించబోతోంది. అనురాగ్ బసు దర్శకత్వంలో 2007లో వచ్చిన హిట్ మూవీ ‘లైఫ్ ఇన్ ఎ మెట్రో’కి సీక్వెల్‌గా వస్తున్న ‘మెట్రో ఇన్ దినో’లో ఆమె నటించింది. ఆ తర్వాత, నెట్‌ఫ్లిక్స్ సినిమా ‘ఆప్ జైసా కోయి’లో ఆర్. మాధవన్‌తో కలిసి కనిపించనుంది. అయితే, బిజీ షెడ్యూల్ ఉన్నప్పటికీ, ఫాతిమా వ్యక్తిగత జీవితం కూడా వార్తల్లో నిలిచింది. ఆమె తమన్నా ఎక్స్ బాయ్‌ఫ్రెండ్ విజయ్ వర్మతో డేటింగ్ చేస్తుందని వార్తలు వచ్చాయి. దీనిపై ఫాతిమా స్పందించింది.

ప్రేమపై ఫాతిమా అభిప్రాయం ఇదీ..

మాధవన్ తో కలిసి ఆమె నటించిన ఆప్ జైసా కోయి మూవీ ట్రైలర్ లాంచ్ బుధవారం (జూన్ 25) ముంబైలో జరిగింది. దీనికి ఫాతిమా తన సహనటుడు ఆర్. మాధవన్‌తో కలిసి హాజరయ్యింది. ‘మీనాక్షి సుందరేశ్వర్’ ఫేమ్ వివేక్ సోని దర్శకత్వం వహించిన ఈ చిత్రం ప్రేమ, సంబంధాలలో సమానత్వం అనే థీమ్‌ తో రాబోతోంది.

ఈ సందర్భంగా ప్రేమ గురించి తన అభిప్రాయాన్ని పంచుకుంటూ ఫాతిమా ఇలా చెప్పింది. “ప్రేమలో సమానత్వం అంటే ఇద్దరు వ్యక్తులు ఒకరినొకరు గౌరవించుకోవాలి. ఒకరి మాట మరొకరు వింటారు, కాదనరు. ప్రస్తుతం అదే ఒక సరిసమాన బంధం అని నేను అనుకుంటున్నాను. ఇద్దరూ రాజీ పడాలి. మీరు ఒక పార్ట్‌నర్‌షిప్ లోకి వచ్చినప్పుడు, మిమ్మల్ని మీరు కోల్పోకుండా దానిని రిలేషన్షిప్ లోకి తీసుకెళ్లడం కోసం కృషి చేస్తారు. అదే ఒక విజయవంతమైన రిలేషన్షిప్ కు మార్గం అని నేను అనుకుంటున్నాను” అని ఫాతిమా చెప్పింది.

‘మంచి అబ్బాయిలు సినిమాల్లోనే ఉంటారు’

ఈ సమయంలో మీడియా వాళ్లు ఆమెను వ్యక్తిగత జీవితం గురించి ప్రశ్నించడానికి ప్రయత్నించారు. మీకు అలాంటి వ్యక్తి ఎవరైనా దొరికారా అని అడిగారు. దీనికి నటి స్పందిస్తూ.. “ఎవరూ లేరు. మంచి అబ్బాయిలు లేరు. వాళ్లు కేవలం సినిమాల్లోనే ఉంటారు” అని బదులిచ్చింది.

ఆమె ఎవరి పేరు చెప్పనప్పటికీ, విజయ్‌తో సంబంధం ఉందనే పుకార్లు వచ్చిన కొన్ని రోజులకే తను సింగిల్ అని ఫాతిమా చెప్పడంతో ఆ పుకార్లపై ఆమె స్పందనగా దీనిని భావిస్తున్నారు. ఇక ఆప్ జైసా కోయి మూవీలో మాధవన్ తో కలిసి నటించడంపై స్పందిస్తూ..

“సినిమా కథ నాకు నచ్చింది. అది ఒక నిజాయితీ గల కథ. ఇలాంటి లేయర్‌డ్ పాత్రను నేను ఇంతకుముందు ఏ ప్రేమకథలోనూ చేయలేదు. మాధవన్‌తో నటించాలని ఎవరు మాత్రం అనుకోరు? మాధవన్‌తో కలిసి పనిచేయడానికి నేను చాలా ఉత్సాహంగా ఉన్నాను” అని నటి చెప్పింది.